16
Ayub iřaɣa x Arebbi am dd-ittarra x Ilifaz
1 Xas uca yarra-dd Ayub, inna:
2 Manawya sřiɣ as aṭṭas,
kenniw marra idwem
tessbeṭṭřem ayi afewwej. ◘16:2 Ayub 13:4
3 Ma ad qḍan wawařen ixwan?
Niɣ min cek iɛarrnen ɛad
ad dd-tarred awař?
4 Uřa d necc zemmareɣ
ad ssiwřeɣ am kenniw,
mařa aqa kenniw deg wemcan inu.
Iři ad mudeɣ awařen xawem
u ad xawem hezzeɣ azeǧif inu.
5 Ad kenniw ssmeḥḍeɣ s uqemmum inu
u afewwej n iyencicen inu
ad awem yawi řefsaset.
6 Mařa ssiwřeɣ, war xafi ittejji řeḥřiq inu
u mařa sseɣdeɣ, ma ad xafi iḥeyyed?
7 Řexxu issiḥeř ayi Netta,
tessarjfed Cek marra tawacunt inu.
8 Cek tessduruyed ayi s teqcurt n teřmect,
tenni d tacehhadt xafi,
uca tekkar xafi arrimet inu tamusriwt,
tᵉttcetca zzayi deg uɣembub inu.
9 Aɣḍab nnes imezzeq, iḍeffar ayi-dd.
Netta ittɣezza ɣari tiɣmas.
Aɣrim inu issqeṭṭaɛ-dd ɣari tiṭṭawin. ◘16:9 Ayub 10:16, 17; 13:24
10 Nitni ttcarragen aqemmum nsen xafi,
ccaten ayi s řḥegra ɣar uqabsi,
ttekkaren xafi ttmunen.
11 Isellem ayi Arebbi
i yijj n mmis n řmuɛṣiyyet,
iɛarren ayi deg ufus n iɛeffanen.
12 Tuɣa ayi di řhudnet,
maca Netta yarẓa ayi,
icebbar ayi deg ijiman, iřbez ayi.
Issbedd ayi d taḥjurt i Yixef nnes. ◘16:12 Ayub 7:20; Igjd. 3:12
13 Imjebbaden nnes n řqews nnḍen ayi-dd,
Netta issnuqqub ayi tiẓẓař břa ahaweř,
ittzeǧaɛ ɣar temmurt iẓi inu, ◼16:13 tiẓẓař - niɣ ‘tigeẓřin’.
14 yareẓẓa ayi tareẓẓit
awarni i treẓẓit nneɣni,
iɛref-dd xafi am bu-teɣruḍt.
15 Xeyyḍeɣ taxancet n wecḍan
i teřmect inu,
icc inu sswessxeɣ di tɛejjact. ◘16:15 Ayub 30:19
16 Aɣembub inu izweɣ zeg imeṭṭawen,
tiři n řmewt aqa-tt x wabřiwen inu,
17 waxxa war yarsi lɛunf x ifassen inu
u taẓaǧit inu teṣfa.
18 Uh tammurt, war ddař idammen inu,
war ttejji iɣuyyan inu
ad afen amcan i arraḥet!
19 Xzar, uřa d řexxu,
Acehhad inu deg ujenna,
Amcafeɛ inu x řegɛudi.
20 Imeddukkař inu d yinni zzayi isthezzan,
maca tᵉttru tiṭṭ inu ɣar Arebbi.
21 Ejj-i-t ad iwwet ddeɛwet
x weryaz ɣar Arebbi,
am ijj n mmis n bnadem
x umeddukkeř nnes. ◘16:21 Ayub 31:35; Amb. 6:10; Ica. 45:9; Rum. 9:20
22 Maɣar drus n iseggʷusa
i-dd ɣa yasen ɛad,
qbeř i ɣa uyureɣ abrid
war zzayes ttɛiqqibeɣ.
◘16:9 16:9 Ayub 10:16, 17; 13:24
◘16:12 16:12 Ayub 7:20; Igjd. 3:12
◼16:13 16:13 tiẓẓař - niɣ ‘tigeẓřin’.
◘16:15 16:15 Ayub 30:19
◘16:21 16:21 Ayub 31:35; Amb. 6:10; Ica. 45:9; Rum. 9:20