30
Ayub issiweř x řemḥayem nnes n yiḍa
1 Řexxu maca tuɣa ḍeḥḥcen xafi iḥudriyyen
nni iǧan d imeẓyanen xafi deg wussan,
inni babatsen war ɣari sekkwin
maḥend ad ten ggeɣ
ɣar yiṭan i iǧan x wuǧi inu.
2 Min ɣa ggeɣ xenni s jjehd n ifassen nsen?
Aqa ifna jjehd nsen zi ssibbet n tewsar.
3 Zi řqiǧet u zi řaẓ dewřen isriwen,
ttmeɣzazen di řwaṭa yuẓɣen
di tubbarcent teccur
s ureddeǧ d urebbej.
4 Nitni řeqqḍen řebzar ameǧaḥ jar cbarq,
iẓewran n uzezzu d aɣrum nsen.
5 Uẓẓřen xasen zi tmunet n iwdan,
kkwaren ten am yixewwanen,
6 ḥima ad zedɣen di teɣzurin issaggʷaden,
deg ifran n ucař u di řejruf.
7 Sɣuyyun jar cbarq,
sadu tizeggwarin ssmunan.
8 Tarwa n ibuhařiyyen d tarwa břa isem,
d inni uẓẓřen xasen zi temmurt s uzeǧaḍ.
9 Řexxu maca aqa ayi
deg izři nsen n tẓawart,
dewřeɣ asen i řhard. ◼30:9 izři nsen tẓawart - s Tɛibranit ‘azenzun nsen’. ◘30:9 Ayub 17:6; Izhd. 69:13; Igjd. 3:14, 63
10 Carrhen ayi, ttaggʷajen xafi,
war ttseḍḥin ca
maḥend ad ssusfen x uɣembub inu. ◘30:10 Ayub 19:19
11 Maɣar Netta issefsi asɣun n tqiḍunt inu
uca issehwa ayi.
Nitni nḍaren ssrimet nsen zzati. ◼30:11 zzati - s Tɛibranit ‘zzat i uɣembub inu’.
12 Ɣar uɣezdis afusi inu
kkaren-dd xafi iɣeddiwen n tarrawt,
ɛarrnen iḍaren inu,
ssgeɛɛaden xafi imesraq n arẓiyyet nsen.
13 Abrid inu arẓin t,
arennyen tamara x tamara inu
waxxa nitni simant nsen
war ɣarsen iǧi wi d asen ɣa iwcen afus.
14 Axmi dd-ttasen
zeg ijj n unuqqib d miriw,
ttakkwaḍen am řemwaj yareddǧen.
15 Ttwakebben-dd xafi inexřiɛen,
am usemmiḍ ḍeffaren nitni ccan inu,
iḍwa zzhar inu am yijj n useynu.
16 S uya ifessi řexxu řeɛmar inu dayi,
ussan n řeɣben mennɛen ayi.
17 Di ǧiřet issnuqqub ayi
iɣsan inu i dayi iǧan,
řeḥriq i d ayi ittɣezzan war yaressi.
18 Ittwabeddeř warrud inu
s jjehd nnes ameqqran
ařami war xafi tteɛqiřen ɛad.
Icarf ayi am tma i innḍen
i warzem n yiri deg warruḍ.
19 Inḍar ayi deg ubeǧaɛ,
dewřeɣ am ucař d yiɣɣeḍ.
20 Sɣuyyuɣ ɣarek,
maca Cek war xafi dd-tᵉttarrid,
necc beddeɣ da
uca Cek tᵉqqimed tḥeṭṭid dayi.
21 Cek tdewřed ayi am yijj n bu-řexcunet,
tᵉttdarraced xafi s ufus nnec ijehden.
22 Cek tessgeɛɛaded ayi
u tneddhed ayi deg usemmiḍ,
tessefraɣed qaɛ addud inu.
23 Maɣar necc ssneɣ
aqa Cek ad ayi tnedhed ɣar řmewt,
ɣar taddart mani ttmunen
marra inni iddaren. ◘30:23 Ɛbr. 9:27
24 Ma war ineṭṭar bnadem afus nnes
mařa iwḍa ḥed,
ma war isɣuyyu walu qaɛ
ɣar arẓiyyet nnes?
25 Ma war ruɣ x wenni tuɣa ɣar iǧa
wussan n tamara,
ma war icḍin buḥbeř inu x umezřuḍ? ◘30:25 Izhd. 35:13, 14; Rum. 12:15
26 Umi ssitmeɣ ɣar min iṣebḥen,
aqa yusa-dd min iǧan d aɛeffan,
umi rajiɣ tafawt, tusa-dd taǧest.
27 Adan inu ttnennan, war arsin,
iwḍen-dd wussan n tamara ɣari.
28 Necc ad uyureɣ deg wecḍan,
břa řehmu n tfuct.
Ad kkareɣ deg wegraw n řgens
uca ad qqimeɣ sɣuyyuɣ deg ujenna.
29 I wuccanen n řexřa
dewřeɣ d umatsen zzaysen,
i yessis n nnɛamet d amɛacar. ◘30:29 Izhd. 102:7
30 Tiřmect inu tedweř xafi
d akarkuc abarcan,
zi tmessi cemmḍen iɣsan inu. ◘30:30 Izhd. 119:83; Igjd. 4:8; 5:10
31 Tedweř tirart n řgambri inu i wecḍan,
tamja inu i řḥess n imeṭṭawen.
◼30:9 30:9 izři nsen tẓawart - s Tɛibranit ‘azenzun nsen’.
◘30:9 30:9 Ayub 17:6; Izhd. 69:13; Igjd. 3:14, 63
◘30:10 30:10 Ayub 19:19
◼30:11 30:11 zzati - s Tɛibranit ‘zzat i uɣembub inu’.
◘30:25 30:25 Izhd. 35:13, 14; Rum. 12:15
◘30:29 30:29 Izhd. 102:7
◘30:30 30:30 Izhd. 119:83; Igjd. 4:8; 5:10