17
Ayub issiweř ak-d Ilifaz x řemḥayem nnes
1 Buḥbeř inu yarjef,
ussan inu ineggura xesyen,
mɣir imeḍřan d ayi iqqimen.
2 S tidett, inni istehzan aqa aten ɣari,
u tiṭṭ inu tessɛeddu ǧiřet
jar ixarriṣen nsen imarzagen!
3 Egg Ixef nnec d aḍman i necc din ɣarek.
Man wen xenni i ɣa iwten afus nnes
deg ufus inu i man aya? ◘17:3 2 Kur. 5:19
4 Maɣar Cek tekksed
marra řefhamet x wuř nsen,
x uya Cek war ten tessɛuǧid ca.
5 Wi ɣa iɣdaren imeddukkař nnes
di ṭṭweɛ n tkeccaḍt,
tiṭṭawin n iḥenjiren nnes ad nɛedment.
6 Netta igga ayi d lmatal jar řegnus,
ařami dewřeɣ am yijjen
ssusufen as x uɣembub. ◘17:6 Ayub 30:9
7 S uya i teɛmec tiṭṭ inu zeg wecḍan,
marra iɣezdisen inu aqa aten am tiři.
8 Inni igguren nican
ttnexřaɛen zi man aya,
amezdag ittneqřab x umnafeq.
9 Amsegged imenneɛ deg webrid nnes,
wenni ɣar iǧa ifassen imezdagen,
yarenni di jjhed.
10 Maca marra kenniw, dewřem-dd,
asettiw-dd da,
maɣar war ufiɣ
uřa d ijj n umiɣis jar awem. ◘17:10 Ayub 6:29
11 Ɛdun wussan inu,
ttwaqeḍɛen inwayen inu,
marra meẓri n wuř inu. ◘17:11 Ayub 7:6; 9:25
12 Ǧiřet tteggen tt d ass,
qqaren: aqa tafawt tᵉttades-dd
xmi dd ɣa tewḍa taǧest.
13 Mařa ssitmeɣ ɛad, ssitimeɣ
aqa řaxart ad tiři d taddart inu,
ad bezzɛeɣ tassut inu di taǧest.
14 Ɣar weḥfur n turṣuḍi řaɣiɣ:
‘Cek d baba!’,
ɣar ikecca: ‘Yemma!’ d: ‘Učma!’
15 Mani iǧa xenni řayas inu?
Řayas inu,
man wen izemmaren ad t iẓar?
16 Ad hwan ɣar ṭṭrufa n řaxart,
xmi i ɣa naf nmun arraḥet deg ucař. ◘17:16 Ayub 3:17, 18, 19; 30:23, 24