9
Tamwarrit n Ayub x Bildad
1 Yarra-dd Ayub, inna:
2 Ssneɣ nican, aqa ammu i teǧa,
maɣar mammec ɣa yiři bnadem
d amsegged ɣar Arebbi? ◘9:2 Izhd. 143:2
3 Mařa Netta ixs akides imcarreɛ,
iři netta war izemmar ad xas dd-yarr
uřa d ict n twařa x wařef n twařawin.
4 Netta d amiɣis n wuř
d bu-tzemmar ijehden,
man wen izemmaren
ad isseqseḥ ixef nnes ḍidd nnes
uca ad iqqim iddar di řaman?
5 Netta d wenni issmuṭṭuyen idurar
am war tt tticin iwdan,
d wenni ten issneqřaben
deg weɣḍab nnes,
6 Netta d wenni issenhezzan tammurt
zeg wemcan nnes,
d wenni iggin ipilaren nnes ad arjijen,
7 Netta d wenni ittamaren tafuct
ařami war dd-tenqir,
d wenni ittcemmaɛen itran!
8 Netta s Yixef nnes waha
ittbezzaɛ ijenwan,
Netta iṣurruf tiwa
n tɛurar n řemwaj n waman. ◘9:8 Amz. 1:6
9 Netta d wenni iggin awraf n itran
n Ddub Ameqqran d Uryun,
agraw n Sebɛa n Itran
d Ixammen n Ljanub,
10 Netta d wenni iggin
timesřayin timeqqranin,
- war izemmar bnadem ad tent ifhem -
uřa d řeɛjayeb břa řeḥsab. ◘9:10 Ayub 5:9; Izhd. 72:18; 77:15; 86:10; Rum. 11:33
11 Xzar, Netta iɛeddu xafi, war t ẓarreɣ,
iẓekkwa, necc war kides ttaciɣ.
12 Xzar, mařa ixḍef Netta,
man wen i t ɣa imenɛen?
Man wen izemmaren ad as yini:
‘Min din tᵉttegged Cek?’
13 Arebbi war ittarri aɣḍab nnes
ad dd-idweř,
sadu nnes uḍaren imɛawanen n ‘Rahab’. ◼9:13 Rahab - ixs ad yini: ‘wenni issaggʷaden’. ‘Rahab’ d isem n řhaycet. Řhaycet-a aqa-tt d tammurt n Miṣra, tenni am řeḥwec di řebḥar (ixs ad yini: ‘iɣzar n Nil’) issaggʷad řegnus s jjehd nnes cciṭani.
14 Mammec i ɣa ggeɣ ad xas dd-arreɣ,
mammec i ɣa farzeɣ
awařen inu mliḥ zzates?
15 Waxxa necc d amsegged,
war zemmareɣ ad xas dd-arreɣ,
maca ad zawgeɣ Řqaḍi inu
maḥend ad xafi iḥinn,
16 Mařa xafi dd-yarr řami řaɣiɣ,
war ttɣiřeɣ aqa Netta ad iseř
ɣar tmijja inu.
17 Aqa Netta iřebbez ayi s ict n tḥaryaḍt
u yarenni deg iyezzimen inu baṭeř.
18 Netta war d ayi ittejji ad arreɣ nnefs,
maca issjawan ayi s tarzugi.
19 Mařa teqqim tmesřact di jjehd,
aqa Netta ijhed qaɛ,
mařa di ccreɛ, iqqar:
‘Wi d ayi ɣa iɛarḍen?’
20 Waxxa necc d amsegged,
ɛad aqemmum inu ad xafi iḥkem,
waxxa necc břa řɛib,
ɛad Netta ad ayi iɛeyyeb.
21 Waxxa necc břa řɛib i ǧiɣ,
war ssineɣ řeɛmar inu nican,
tudart inu ḥessbeɣ tt d walu.
22 X uya i ɣa iniɣ: ‘Qaɛ d ict!
Am wenni iǧan břa řɛib
am wenni iǧan d aɛeffan,
Netta ad ten iqḍa s tnayen idsen!’ ◘9:22 Amb. 9:2, 3; Mal. 3:14
23 Mařa arekkuḍ ineqq deg ict n tecti,
xenni Netta istehezza
zi řeqḍeɛ n řayas i imezdagen.
24 Tammurt ad temmewc
deg ufus n uɛeffan.
Iɣembab n řquḍat nnes ittřeḥḥef asen.
Mařa war t iggi Netta, man wen xenni?
25 Deɣya x wenni ittazzřen
aqa ttqeǧiqen wussan inu,
arewřen ɣar din, war twiřin řxar. ◘9:25 Ayub 7:6, 7
26 Kkin am tɣarruba n uɣanim,
am ugider iḥewwmen x zzardet.
27 Mařa nniɣ: ‘Ad ttuɣ acetci inu,
ad beddřeɣ aɣembub iceḍnen inu,
ad ssfirnineɣ!’,
28 ammu i tteggʷedeɣ zi marra řeḥriq inu.
Necc ssneɣ Cek war zzayi tᵉttbarrid.
29 Necc d aɛeffan,
mayemmi ssḥissifeɣ i walu?
30 Mařa ssirdeɣ s waman n wedfeř,
ad ssizedgeɣ ifassen inu s llixiya, ◘9:30 Irm. 2:22
31 ɛad ad ayi tnetyed
deg weḥfur yarṣuden,
ař d ayi ɣa iɛiff warruḍ inu.
32 Maɣar Netta war iǧi d bnadem am necc,
wenni xef zemmareɣ ad dd-arreɣ,
xmi nettaweḍ ɣar taddart n ccreɛ
ak-d wayawya. ◘9:32 Amb. 6:10; Irm. 49:19
33 War din iǧi řɛadeř jar aneɣ,
wenni izemmaren ad issars afus nnes
xaneɣ s tnayen idneɣ.
34 Ejj i-t ad xafi iksi aɛmud nnes,
war d ayi issnexřiɛ ɛad uhuddi nnes, ◘9:34 Ayub 13:20; 33:7
35 xenni ad ssiwřeɣ
nhřa ad zzayes ggʷedeɣ,
maɣar necc war ǧiɣ ammu i yixef inu.
◘9:2 9:2 Izhd. 143:2
◘9:10 9:10 Ayub 5:9; Izhd. 72:18; 77:15; 86:10; Rum. 11:33
◼9:13 9:13 Rahab - ixs ad yini: ‘wenni issaggʷaden’. ‘Rahab’ d isem n řhaycet. Řhaycet-a aqa-tt d tammurt n Miṣra, tenni am řeḥwec di řebḥar (ixs ad yini: ‘iɣzar n Nil’) issaggʷad řegnus s jjehd nnes cciṭani.
◘9:22 9:22 Amb. 9:2, 3; Mal. 3:14
◘9:32 9:32 Amb. 6:10; Irm. 49:19
◘9:34 9:34 Ayub 13:20; 33:7