1 Yusa-dd ɣari wawař n SIDI, inna: 2 “Uyur, barreḥ deg umezzuɣ n Urcalim, ini: ‘Ammu i iqqar SIDI: Necc ttxarraṣeɣ dayem, di tmexsiwt icewwaren n temẓi nnem, x tayri n wussan n tnexḍabt nnem, umi dd ayi dd-teḍfared di řexřa, di temmurt tamessucit. 3 Israil tuɣa d amqeddes i SIDI, tamezwarut n ṣṣabet nnes. Marra wi zzayes iccen, iddakkwař dayes řɛib, iwḍa-dd xasen řɣar, ammu i iqqar SIDI.’ ”

4 “Sřem i wawař n SIDI, kenniw zi taddart n Yaɛqub, d marra řaǧat n taddart n Israil. 5 Ammu i iqqar SIDI: ‘Man řɣecc nni dayi ufin řejdud nwem ařami xafi ḥeyyḍen uca ḍfaren l’aṣnam ibeṭṭřen uca dewřen simant nsen di řbaṭeř, ◘2:5 Mixa 6:3, 4 6 war sseqsin: Mani iǧa SIDI, wenni d aneɣ dd-issuffɣen zi Miṣra, wenni d aneɣ issecnen abrid di řexřa, x ict n temmurt n řexřa d ixendraq, x ict n temmurt n řaẓaɣ d tiři n řmewt, x ict n temmurt war xas iɛdu uřa d ijj u war dayes izdiɣ uřa d ijj n bnadem? 7 Necc iwyeɣ kenniw ɣar ict n temmurt isseɣmayen ḥima ad zzayes teccem řɣiǧet d řxar. Maca umi din tiwḍem, tessxemjem tammurt inu u tarrim tasɣart inu d jjɛifect. 8 Ikehhanen war sseqsin: Mani iǧa SIDI?, uca inni tuɣa iḥeṭṭan Ccariɛa war d ayi ssinen u imeksawen ɛeddun-dd xafi u inabiyyen ttnabben s Baɛal uca ḍfaren min war ineffɛen. ◼2:8 imeksawen - niɣ ‘iničan’.  ◘2:8 Rum. 2:20 9 S uya Necc ad arniɣ ad mcubbceɣ akidwem, uřa ak-d iḥenjiren n iḥenjiren nwem ad mcubbceɣ, ammu i iqqar SIDI.’ ”

10 “Ẓwam ɣar tegzirin n ayt n Kittim, aqa sekkem ireqqasen ɣar Qidar, beytem uca xzarem mliḥ, ma imsar ɛemmarṣ am man aya! ◼2:10 Kittim - ixs ad yini ‘Qubrus’. Qidar - ict n jjihet n jjwayeh n temmurt n Weɛraben. 11 Ma ɛemmarṣ ibeddeř ca n řgens irebbiten nnes, waxxa war ǧin d irebbiten? Řgens inu maca iwca řɛezz nnes deg wemcan n min war ineffɛen. ◘2:11 Izhd. 106:20 12 Iřim d ignawen x man aya, kenniw a ijenwan, ggʷedem, nxeřɛem ař ṭṭarf, ammu i iqqar SIDI. ◘2:12 Aɛwd. 32:1; Ica. 1:2 13 Maɣar řgens inu igga tnayen n řeɛyub: Necc, Řɛunṣar n waman iddaren, aqa semḥen dayes maḥend ad ɣzan anuten i yixef nsen, anuten s tazzect i ixwan zeg waman.◘2:13 Izři 4:15; Irm. 17:13 14 Ma Israil d ismeɣ niɣ d ijj ittwaru d ismeɣ di taddart? Mayemmi idweř i zzardet xenni? 15 Ssbuɛruten xas wayraden imeẓyanen, ggin ad sřen i tmijja nsen. Nitni arrin tammurt nnes d ict n řqecɛet n unexřiɛ tineddam nnes ttwasscemḍent ařami war iqqim izeddeɣ daysent uřa d ijj. ◘2:15 Ica. 5:29; Irm. 4:7 16 Ɛad ḥeffen ayt n Nuf d Taḥfanis aceqquf n uzeǧif nnec. 17 Ma war teggid ca manawya i yixef nnem, minzi cem tsemḥed di SIDI, AREBBI nnem am Netta indeḥ i cem deg webrid?”

18 “Řexxu, min din jar am d jar webrid n Miṣra maḥend ad teswed din aman zi Cixur, zeg iɣzar d abarcan? Min jar am d jar webrid n Accur ařami din i ɣa teswed aman n iɣzar n Lfuraṭ? ◼2:18 Cixur - wanita d isem nneɣni i yeɣzar n ‘Nil’. Cixur ixs ad yini ‘abarcan’, minzi iɣzar n Nil idweř d abarcan zi ssibbet n ubeǧaɛ d ubaryuḍ i dayes iǧan.  ◘2:18 Ica. 31:1 19 Tuɛeffna nnem ad cek tarebba u ibriden n uweddar nnem ad cem ɛaqben. Ssen u xzar, mammec war iḥři u mecḥař yarzeg aqa tsemḥed di SIDI, AREBBI nnem, u war zzayi tᵉtteggʷeded, ammu i iqqar Sidi inu, SIDI n řɛeskarat.” ◘2:19 Ica. 3:9; Ḥuc. 5:5

20 “Aṭṭas zeg wami tarẓid azayřu nnem, tcarrged iceddiyyen nnem. Cem tennid: ‘War xseɣ ad ac sexxareɣ!’ Minzi x kuř řgeɛɛdet yuɛřan u sadu kuř tacejjart tazizawt tuḍared am temɣart n farq-ccɣeř. ◼2:20 tacejjart - niɣ ‘addag’ (‘iddagen’). 21 Necc maca tuɣa ẓẓuɣ cem d tazayart taḥurrit, d zzariɛet icnan aṭṭas. Mammec tdewřed ɣar tseḍwin n tzayart n řexřa tabarranect? ◘2:21 Uf. 15:17; Izhd. 44:3; 80:9 22 Waxxa tessirded ixef nnem s llixiyya uca tarnid asray s ṣṣabun, ɛad ad teqqim řmuɛṣiyyet nnem zzat i wudem inu, ammu i iqqar Sidi inu, SIDI.” ◘2:22 Ayub 9:30

23 “Mammec tzemmared ad tinid: ‘Necc war ttwassxemjeɣ ca, necc war ḍfareɣ ca ‘Ibaɛlen!’ Xzar ɣar webrid nnem di teɣzurt, ɛqeř min teggid, cem d tařɣemt tefsus tᵉttazzeř, tenni ittemxarwaḍen deg ibriden nnes! 24 Aqa-tt d taɣyuč n řexra, innumen di řexřa, tenni ittcemman arriḥ deg wenẓar nnes umi tḥaj. Wi tt i ɣa issbedden di nnecwet nnes? Qaɛ wi tt yarezzun war iḥdij ad issiḥeř ixef nnes, ad tt yaf deg uyur n nnecwet nnes. 25 Ḥḍa war ittiři uḍar nnem břa tisiřa uřa tmijja nnem war tᵉttiẓeɣ s ufadi! Cem maca teqqared: ‘War xas nessiwiř, ɛemmarṣ! Maɣar necc ɛecqeɣ di midden, xseɣ ad uyureɣ awarni asen!’ ”

26 “Am uxewwan inneḥṣeř iseḍḥa, ammu i ɣa seḍḥan inni n taddart n Israil, nitni d ijeǧiden nsen d řḥukkam nsen d ikehhanen nsen d inabiyyen nsen. 27 Nitni qqaren i ukeccuḍ: ‘Cek d baba!’, u i weẓru: Cek tejjid ayi-dd!, maɣar nitni wcin ayi s weɛrur, war iǧi s uɣembub, maca di řeḥṣaret nsen qqaren: ‘Kkar, senjem aneɣ!’ 28 Mani ǧan řexxu irebbiten nnec, inni teggid i yixef nnec? Ejj i-ten ad dd-kkaren, mařa zemmaren ad cek fekken ɣar řweqt n řeḥṣaret nnec, maɣar irebbiten nwem am lɛadad n tneddam nnec, a Yahuda!” ◘2:28 Ica. 2:8; Irm. 11:13

29 “Mayemmi akidi temcubbucem kenniw? Kenniw marra tᵉttɛeddam xafi, ammu i iqqar SIDI. 30 X baṭeř i wtiɣ iḥenjiren nwem, war jjin ixef nsen ad areyyḍen. Ssif nwem icca inabiyyen nwem am wayrad iɣarrṣen. ◘2:30 Ica. 1:5; Irm. 5:3 31 A kenniw, a jjiř n yiḍa, ḥḍam awař n SIDI. Ma tuɣa ayi d řexřa i Israil, niɣ d tammurt n taǧest d tabarcant? Mayemmi xenni iqqar řgens inu: ‘Aqa neccin nennufṣeř zzayek, war i dd ɣarek neddikkwiř ɛad’? ◘2:31 Mt. 23:26-39 32 Ma ad tᵉttu teɛzarect talwizt nnes niɣ ad tᵉttu tesřit taḥezzamt nnes izewwqen? Waxxa amenni i d ayi ittu řgens inu aṭṭas n wussan břa řeḥsab. ◘2:32 Irm. 3:21 33 Mecḥař tessned mliḥ ad tarzud abrid n tayri? S uya i tessřemded di ibriden nnem timesřayin tiɛeffanin i yixef nnem. 34 Uřa deg ubeḥrur n warruḍ nnem ufin idammen n řeɛmurat iḍeɛfen izdigen, inni war temniɛed umi ucaren tudrin, wah, zi ssibbet n marra man aya aqa imsar. ◼2:34 zi ssibbet n marra man aya - idammen war uzziřen ca umi ṭṭfen iceffaren niɣ ixewwanen di Israil uca nɣin ten, maca idammen uzzřen umi nɣin inabiyyen n SIDI (xzar 2 Ij. 21:16 u 2 Ij. 24:4). Tuɣa ayt n Israil d ixewwanen d idarɣařen di řmeɛna arruḥani umi ɛebden laṣnam ifennan, war iǧi AREBBI i iǧan i řebda.  ◘2:34 Amb. 11:9 35 Uca ɛad teqqared: ‘S tidett, necc d tamezdagt, aqa aɣḍab nnes iḥeyyed xafi!’ Xzar, Necc ad kim carrɛeɣ, minzi teqqared: ‘Necc war ggiɣ ddnub!’ 36 Mayemmi tᵉtteggʷjed aṭṭas uca tbeddřed řebda abrid nnem? Uřa tammurt n Miṣra ad cem tecmet, am mammec i d am tecmet Accur. 37 Uřa ssenni ad teggʷejed s ifassen nnem x uzeǧif, maɣar SIDI inḍar marra inni x tᵉttecřed, ařami war ittiři aya uřa akidsen.”