1 “Sřem aya, kenniw ikehhanen, ḥḍam kenniw ayt n taddart n Israil u wcem amezzuɣ, kenniw, aytbab n taddart n ujeǧid, maɣar tdewřem d ijj n řfex di Miṣfat d ict n tracca yarezmen x wedrar n Tabur. 2 Inni i dd-itteffɣen zeg webrid ssiǧɣen tasraft n wenɣay, maca Necc ad ten ɛaqbeɣ marra. 3 Necc ssneɣ Ifrayim u Israil war izemmar ad zzayi innuffar. Maɣar řexxu issefsed Ifrayim ixef nnes, Israil issexmej ixef nnes. 4 Timegga nsen tmennɛent i-ten ad dd-dewřen ɣar AREBBI, maɣar ijj n buḥbeř n farq-ccɣeř aqa-t di řwesṭ nsen uca war ssinen SIDI. ◘5:4 Ḥuc. 4:12 5 Aɛeffar n Israil ad xas idɛa s bṭayṭay. Israil d Ifrayim ad nqarḍen zi řmuɛṣiyyet nsen uřa d Yahuda ad kidsen inqarḍ. ◘5:5 Ḥuc. 7:10 6 Nitni ad aggʷejen ak-d wuǧi nsen d ifunasen d tfunasin nsen, ḥima ad arzun x SIDI, maca nitni war t ttifen. Netta aqa issnuffar ixef nnes xasen. 7 Nitni ɣdaren SIDI maɣar nitni jjin-dd tarwa n farq-ccɣeř. Řexxu ad ten yecc uyur amaynu ak-d tseqqař nsen n řwart.”

8 “Suḍem deg uyicc n icarri di Jibɛa, di řbuq di Rama, ad sɣuyen imezdaɣ n Bayt-Awan: ‘Awarni ac, a Binyamin!’ 9 Ifrayim ad idweř d ict n řqecɛet n unexřiɛ deg wass n lɛiqab. Necc barrḥeɣ jar tqebbař n Israil min ittwagg ad imsar. 10 Řḥukkam n Yahuda tteggen am yinni issmuṭṭuyen iẓra n weymir. Necc ad xasen zeǧɛeɣ aduqqez inu n ufugem am waman.”

11 “Ifrayim ittwaḥṣar, řḥeqq ittwařbez, maɣar iɛjeb as maḥend ad iḍfar ict n tewṣeyyet n řbaṭeř. 12 Necc am tcinda i Ifrayim u am ureṣṣuḍ i taddart n Yahuda. 13 Umi iẓra Ifrayim řehřac nnes u Yahuda tareḥsit nnes, yuyur Ifrayim ɣar Accur, issekk ijj n ureqqas ɣar ujeǧid Yarib. Maca wanita war izemmar ad kenniw issgenfa u war xawem ikessi tareḥsit nwem. ◼5:13 Yarib - isem-a wanita ixs ad yini ‘amcubbec’. 14 Maɣar Necc ad iřiɣ i Ifrayim am weyrad izehharen u am weyrad ameẓyan i taddart n Yahuda. Necc, wah Necc, ad mezzqeɣ u xenni ad uyureɣ, ad t awyeɣ uca war din wi ɣa ifekken. 15 Necc ad ffɣeɣ u xenni ad ɛeqbeɣ ɣar wemcan inu, ař ɣa neɛmen u ad arzun udem inu. Di řeḥṣaret nsen ad xafi arzun zic ɣar ṣṣbeḥ.”