1 “Asem-dd, ad dd-nedweř ɣar SIDI, maɣar Netta iqezzar, maca ad aneɣ issgenfa, Netta iwta, maca ad aneɣ icfen. 2 Awarni tnayen n wussan ad aneɣ yarr ɣar tudart, deg wass wiss třata ad aneɣ issnekkar u neccin ad neddar zzat i wudem nnes. 3 Xenni ad nessen, ad neḍfar maḥend ad nessen SIDI. Aḍhar nnes imten am tuffut n řefjar. Ad ɣarneɣ dd-yas am wenẓar, am wenẓar n arbiɛ nni issarḍaben tammurt.” ◼6:3 arbiɛ - niɣ ‘tafsut’  ◘6:3 Izhd. 19:5, 6

4 “Min akidek ɣa ggeɣ, a Ifrayim, min akidek ɣa ggeɣ, a Yahuda. Tamexsiwt nwem icewwaren tᵉttegg am useynu ɣar teffut u am nnda igeɛɛden uca xenni iqeṭṭa. 5 X uya Necc qesseɣ ten s tmijja n inabiyyen am s ijj n uyeřzim. Necc nɣiɣ ten s wawařen n uqemmum inu. Řeḥkamat xak amecnaw tfawt innufsřen. 6 Minzi ttexseɣ tamexsiwt icewwaren, war iǧi taɣarṣt, u tussna n SIDI ttexseɣ tt x tɣarṣa n wecmaḍ.” ◘6:6 Mt. 9:13; 12:7

7 “Nitni ɛeddan x Řɛahd am Adam. Dinni i d ayi ɣdaren. ◘6:7 Ḥuc. 8:1 8 Jilɛad d ict n tendint n yinni itteggen řmuɛṣiyyet, teccur s idammen. 9 Am yijj n bandiyya n ixewwanen i ittrajan ca n yijjen, ammu i teǧa terfiqt n ikehhanen. Nitni neqqen deg webrid i dd ittawyen ɣar Cakim, maɣar nitni tteggen řefḍayeḥ waha. 10 Necc ttwařiɣ tamesřact tessnexřaɛ di taddart n Israil, xzar, farq-ccɣeř n Ifrayim, Israil tessexmej ixef nnes.”

11 “Waxxa amenni, a Yahuda, aqa temmars ict n ṣṣabet i cek, xmi dd ɣa ssɛeqbeɣ imeḥbas n řgens inu.”