1 Deg wussan nnes igeɛɛed Nabuxadnaṣṣar, ajeǧid n Babil, u Yahuyaqim idweř iṭaɛ as třata n iseggʷusa. Xenni inneqřeb uca iɣewweɣ xas. ◘24:1 2 Im. 36:6 2 Issekk-dd ɣares SIDI bandiyyat n Ikaldaniyyen d bandiyyat n Aram d bandiyyat n Mu’ab d bandiyyat n ayt n Ɛammun. Netta issekk i-ten ɣar Yahuda, ḥima ad tt xarrben ɛlaḥsab awař n SIDI i tuɣa issiweř s uqemmum n imsexxaren nnes, inabiyyen. ◼24:2 s uqemmum - s Tɛibranit ‘s ufus’.  ◘24:2 2 Ij. 20:17; 23:27 3 Wah, man aya imsar ak-d Yahuda ɛlaḥsab řumur n SIDI, ḥima ad t issiggʷej x wudem nnes di ssibbet n ddnub n Manassa, di ssibbet n marra min igga wanita. ◼24:3 ɛlaḥsab řumur n SIDI - s Tɛibranit ‘x uqemmum n SIDI’. 4 Uřa di ssibbet n idammen imezdagen i issizzeř řami tuɣa zzaysen iccur Urcalim. S uya SIDI tuɣa war ixs ad as iɣfar.

5 Imezruyen iqqimen n Yahuyaqim d marra min igga, ma man aya marra war ittwazemmem ca deg wedlis n imezruyen n ijeǧiden n Yahuda? 6 Yahuyaqim igga ad yareyyeḥ jar řejdud nnes. Mmis Yahuyakin idweř d ajeǧid deg wemcan nnes.

7 Ajeǧid n Miṣra war iffiɣ ɛad ɣar umenɣi zi temmurt nnes, maɣar ajeǧid n Babil tuɣa iksi marra min tuɣa iǧan n ujeǧid n Miṣra zi Teɣzart n Miṣra ař iɣzar n Lfuraṭ.

8 Yahuyakin tuɣa ɣares tmenṭac n iseggʷusa umi idweř d ajeǧid. Netta iḥkem třata n iyuren di Urcalim. Yemmas qqaren as Neḥucṭa, yeǧis n Il-Natan zi Urcalim. ◘24:8 [2 Im. 36:9-10] 9 Netta igga min iǧan d aɛeffan di tiṭṭawin n SIDI, nican am mammec t igga babas. 10 Di řweqt nni ffɣen imsexxaren n Nabuxadnaṣṣar, ajeǧid n Babil, ɣar Urcalim uca tᵉttwaḥsar tendint. ◘24:10 Dan. 1:1 11 Uřa Nabuxadnaṣṣar, ajeǧid n Babil, netta simant nnes yusa-dd ɣar tendint am tt ḥṣaren imsexxaren nnes. 12 Xenni iffeɣ Yahuyakin, ajeǧid n Yahuda, zi tendint, yuyur ɣar ujeǧid n Babil, netta ak-d yemmas d imsexxaren nnes d řḥukkam nnes d imsexxaren nnes icennɛen. Ajeǧid n Babil iḥebbes i-t deg useggʷas wiss tmenya n tgelda nnes. 13 Netta iḥewwes ssenni marra tixubay zi Taddart n SIDI d txubay zi taddart n ujeǧid uca ikkes ureɣ x marra řeqcuɛ n wureɣ nni tuɣa igga Suliman, ajeǧid n Israil, di Zzawect Tameqqrant n SIDI, am mammec tuɣa issiweř SIDI. ◘24:13 2 Im. 20:17; Ica. 39:6 14 Netta yiwi-dd marra Urcalim ak-d marra řḥukkam d marra ayt n bu-teɣruḍt imeḥḍen, ɛecra-ařaf n imeḥbas, uřa d kuř aneqqac n ukeccuḍ d weẓru d imziřen. War ijji uřa d ijj mɣir imezřaḍ n řgens n temmurt. 15 Netta indeh Yahuyakin ɣar Babil. Yemmas n ujeǧid d temɣarin n ujeǧid d imsexxaren nnes icennɛen d marra ayt n jjehd di temmurt yiwyi ten di lmenfa zi Urcalim ɣar Babil. ◘24:15 2 Im. 36:10; Ist. 2:6 16 Marra iryazen imeḥḍen, sebɛa-ařaf n yeryazen, uřa d ineqqacen n ukeccuḍ d weẓru d imziřen, ařef n yeryazen, d marra abarru n ayt n bu-teɣruḍt inni ittqeddan x umenɣi, aqa ajeǧid n Babil indeh i-ten marra di lmenfa ɣar Babil. ◘24:16 Irm. 52:28 17 Ajeǧid n Babil igga Mattanya, ɛemmis, d ajeǧid deg wemcan nnes uca ibeddeř isem nnes ɣar Ṣidqiya.◘24:17 Irm. 37:1; 52:1

18 Ṣidqiya tuɣa ɣares waḥit u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Yemmas qqaren as Ḥamuṭal, yeǧis n Irmiya, zi Libna. ◘24:18 [2 Im. 36:11-21, Irm. 52:1-30] 19 Netta igga min iǧan d aɛeffan di tiṭṭawin n SIDI, nican am mammec t igga Yahuyaqim. 20 Zi ssibbet n weɣḍab n SIDI, aqa imsar i Urcalim d Yahuda ařami ten-i-dd issekk zi zzat i wudem nnes. Awarni as iɣewweɣ Ṣidqiya x ujeǧid n Babil.