1 Deg useggʷas wiss tesɛa n řeḥkamet nnes, deg uyur wiss ɛecra, deg wass wiss ɛecra n uyur, imsar aqa yusa-dd Nabuxadnaṣṣar, ajeǧid n Babil, ɣar Urcalim, netta ak-d marra řɛeskar nnes. Iḥṣar i-tt uca nitni quwwaren as s ict n řgeɛɛdet i tɛessast. ◘25:1 2 Im. 36:17 Irm. 32:2; 39:1; 52:4 2 Ḥṣaren tandint ař aseggʷas wiss ḥiṭac n ujeǧid Ṣidqiya. 3 Deg wass wiss tesɛa n uyur wiss arebɛa idweř řaẓ imɣar di tendint ařami war tuɣi ɛad macca ɣar řgens n temmurt. ◘25:3 Irm. 52:6 4 Xenni tᵉttwarẓ tendint u marra iɛeskariyyen arewřen di ǧiřet x webrid n tewwart i iǧan jar tnayen n řeḥyuḍ nni iǧan ɣar weḥwic n ujeǧid, waxxa Ikaldaniyyen tuɣa quwwaren i tendint, uca ajeǧid yuyur deg webrid n Řewḍa. 5 Maca řɛeskar n Ikaldaniyyen ḍfaren ajeǧid u nitni ḥarten xas di řewḍat n Ariḥa u marra řɛeskar nnes bezzɛen t xas. 6 Ṭṭfen ajeǧid uca iwyen t ɣar ujeǧid n Babil, ɣar Ribla, uca ḥekmen xas. 7 Nitni ɣarṣen i iḥenjiren n Ṣidqiya zzat i tiṭṭawin nnes, ssdarɣřen tiṭṭawin n Ṣidqiya uca carfen t s tnayen n ssnaseř n nnḥas, iwyen t ɣar Babil.

8 Awarni as deg uyur wiss xemsa, deg wass wiss xemsa n uyur - tuɣa-t deg useggʷas wiss tseɛṭac n Nabuxadnaṣṣar, ajeǧid n Babil - yusa-dd Nabuzaradan, řqebṭan n iɛessasen n arrimet, amsexxar n ujeǧid n Babil, di Urcalim. 9 Issecmeḍ Taddart n SIDI d taddart n ujeǧid d marra tudrin n Urcalim uřa kuř taddart d tameqqrant issarɣ as timessi. 10 Řeḥyuḍ i dd-innḍen i Urcalim ɣeḍřen ten marra řɛeskar n Ikaldaniyyen nni dd-yusin ak-d řqebṭan n iɛessasen n arrimet. 11 Min iceṭṭen zi řgens nni ittwajjen di tendint, ixs ad yini marra inni tuɣa iɛdun ɣar ujeǧid n Babil d min iceṭṭen zi řɣaci, indeh i-ten Nabuzaradan, řqebṭan n iɛessasen n arrimet, ɣar lmenfa. 12 Řqebṭan n iɛessasen n arrimet ijja mɣir ca n imezřaḍ n temmurt am ayt n bu-tzayart d ifeǧaḥen.

13 Ipilaren n nnḥas di Taddart n SIDI d tkarrutin d trimant n nnḥas nni tuɣa din ɣar Taddart n SIDI, arẓin ten Ikaldaniyyen uca arbun marra nnḥas ɣar Babil.◼25:13 tarimant - s Tɛibranit ‘řebḥar’ niɣ ‘il’.  ◘25:13 2 Ij. 20:17; Irm. 20:5; 27:19 14 Uřa d tiydurin, d iɣenjayen, d tjeqqaḍin, d tɣenjayin uřa d marra řeqcuɛ n nnḥas i zi tuɣa ttsexxaren, iwyen ten. 15 Řqebṭan n iɛessasen n arrimet yiwi-dd timejmarin d ṭṭawyat i urucci, marra min tuɣa iǧan qaɛ n wureɣ niɣ n nnuqart. 16 Uřa d tnayen n ipilaren d trimant d tkarrutin nni tuɣa igga Suliman i Taddart n SIDI. Tuɣa war izemmar ad weznen nnḥas n marra řeqcuɛ-a. 17 Řuɛřa n ijj n upilar tuɣa dayes tmenṭac n iɣaǧen, u ttaj i xas, tuɣa n nnḥas. Řuɛřa n ttaj tuɣa-t třata n iɣaǧen. , u tiracciwin d iremmamen i d as dd-innḍen i ttaj tuɣa aten marra n nnḥas. Ammu i tuɣa uřa ɣar upilar wiss tnayen, x tracca i xas iǧan.◘25:17 1 Ij. 7:15; 2 Im. 3:15; Irm. 52:21

18 Yiwi-dd řqebṭan n iɛessasen n arrimet ɛawed Saraya, akehhan ameqqran, d Ṣafanya, akehhan wiss tnayen, uřa d třata n iɛessasen n tewwart. ◼25:18 Ṣafanya - isem-a wanita ixs ad yini ‘wenni t issnuffaren SIDI’. 19 Netta yiwi-dd ijj n umsexxar amcenneɛ wenni ittwařeqqmen x iɛeskariyyen d xemsa n yeryazen imeḥḍen zeg imtiqqan n ujeǧid, inni ittwafen di tendint, jmiɛ ak-d umarir n ukumandar n řɛeskar nni izemmemen řgens n temmurt i umenɣi, uřa d settin n yeryazen zi řgens n temmurt nni ittwafen di tendint. 20 Yiwi ten Nabuzaradan, řqebṭan n iɛessasen n arrimet uca yuyur akidsen ɣar ujeǧid n Babil, ɣar Ribla. 21 Ajeǧid n Babil iwwet i-ten, inɣa i-ten di Ribla di temmurt n Ḥamat. Ammu i ittwandeh Yahuda zi temmurt nnes ɣar lmenfa. 22 X řgens i tuɣa iqqimen di temmurt n Yahuda, i tuɣa ijja din Nabuxadnaṣṣar, ajeǧid n Babil, aqa igga xasen Jadalya, mmis n Axiqam, mmis n Cafan. ◘25:22 Irm. 40:5, 9 23 Umi sřin ikumandaren n řɛeskarat, nitni d yeryazen nsen, belli ajeǧid n Babil igga Jadalya d awkiř, usin-dd nitni ɣar Jadalya di Miṣfa: Ismaɛil, mmis n Natanya, Yuḥanan, mmis n Qariḥa, Saraya, mmis n Tanḥumat, Anaṭufati, d Yazanyahu, mmis n Umaɛki, nitni ak-d yeryazen nsen. ◘25:23 Irm. 40:7 24 Jadalya ijjuǧ asen u i yeryazen nsen, inna asen: “War tteggʷdem zeg imsexxaren n Ikaldaniyyen. Qqimem di temmurt uca sexxarem i ujeǧid n Babil, xenni ad tiřim mliḥ.”

25 Maca deg uyur wiss sebɛa yusa-dd Ismaɛil, mmis n Natanya, mmis n Ilicamaɛ, wenni dd-iqqarṣen zeg ujeǧid, ak-d ɛecra n yeryazen. Nitni wtin Jadalya ařami immut uřa d Iyahudiyyen d Ikaldaniyyen inni ɣares iǧan di Miṣfa. 26 Xenni ikkar marra řgens, am umeẓyan am umeqqran, uřa d ikumandaren n řɛeskar, ffɣen ɣar Miṣra, minzi ggʷeden zeg Ikaldaniyyen.

27 Deg useggʷas wiss sebɛa u-třatin n lmenfa n Yahuyakin, ajeǧid n Yahuda, deg uyur wiss tenɛac, deg wass wiss sebɛa u-ɛicrin n uyur, imsar, aqa Iwil-Marudax, ajeǧid n Babil, deg useggʷas i di idweř d ajeǧid, iḍřeq-dd i Yahuyakin, ajeǧid n Yahuda, zi řeḥbes. ◘25:27 [Irm. 52:31-34] 28 Netta issiweř akides s řeḍrafet u igga řkursi nnes tiwa i řkarasi n ijeǧiden nneɣni i tuɣa ɣares iǧan di Babil. 29 Ibeddeř Yahuyakin arruḍ nnes n řeḥbes uca idweř ittett řebda ɣares marra ussan n tudart nnes. 30 X řɛuč nnes, aqa immewc as zeg ujeǧid řebda ijj n řɛuč aqedda n wass x wass nnes, marra ussan n tudart nnes.