1 Suliman ibda řebni n Taddart n SIDI di Urcalim x wedrar n Muriya, mani dd-iban SIDI i babas Dawud u mani issewjed Dawud ijj n wemcan x unedrar n Uyabusi Urnan. ◘3:1 [1 Ij. 6:1-38; 7:13-51] 2 Netta ibda řebni deg uyur wiss tnayen, deg wass wiss tnayen deg useggʷas wiss arebɛa n tgelda nnes. 3 Wanita d dsas i issars Suliman i řebni n Taddart n AREBBI: tuzzeggart nnes deg iɣaǧen ɛlaḥsab řeqyas amezwaru tuɣa-tt settin n iɣaǧen, d tiru nnes tuɣa-t ɛicrin n iɣaǧen. 4 Asqif n wadaf, nni tuɣa iǧan ɣar zzat n tuzzeggart n Taddart, tuɣa-t dayes ɛicrin n iɣaǧen umi t ɛebbaren ɣar zzat n tiru n Taddart, u řuɛřa nnes tuɣa-t dayes mya u-ɛicrin n iɣaǧen. Tuɣa idřa wesqif n wadaf ɣar daxeř s wureɣ iṣfan. 5 Taddart tameqqrant igga as taẓeqqa s ukeccuḍ n tcejjart n umerzi uca yarni xas wureɣ iṣfan u izewweq i-t s tcejjura n tini d ssnaseř izewwqen. ◼3:5 amerzi - niɣ ‘ameḍzi’. 6 Ɛawed izewweq netta Taddart s yiẓra iɣřan. Ureɣ tuɣa d ureɣ zi Farawayim. 7 Ammu i idřa netta Taddart, tiḥenya, tinebdatin, řeḥyuḍ nnes d tewwura nnes s wureɣ, uca inqec ikiruben di řeḥyuḍ. ◼3:7 ikiruben - ict n marka n lmalakat.

8 Netta igga uřa d axxam n Weqdas x Uqeddas. Tuzzeggart nnes dayes ɛicrin n iɣaǧen umi t ɛebbaren ɣar zzat n tiru n Taddart. Uřa d tiru nnes tuɣa-t dayes ɛicrin n iɣaǧen. Netta idřa řeḥyuḍ ɣar daxeř n wexxam s setta-mya talint n wureɣ iṣfan. 9 Řewzen n imesmaren isekkwa xemsin ciqlu n wureɣ. Idřa uřa d tiɣurfatin n sennej s wureɣ. 10 Deg wexxam n Weqdas x Uqeddas igga tnayen n ikiruben, am řxedmet n wenqac, u iřeḥḥef i-ten s wureɣ. 11 Afriwen n ikiruben jmiɛ ɛebbaren ɛicrin n iɣaǧen di tuzzeggart. Afriw amezwaru iɛebbar xemsa n iɣaǧen n tuzzeggart, ittakkʷaḍ řḥiḍ n Taddart, uca afriw nneɣni n xemsa n iɣaǧen ittakkwaḍ afriw n ukirub nneɣni. 12 Afriw n ukirub nneɣni iɛebbar uřa d xemsa n iɣaǧen, ittakkwaḍ řḥiḍ n Taddart. Afriw nneɣni n xemsa n iɣaǧen iřeqqef afriw n ukirub nneɣni. 13 Afriwen n ikiruben-a ttwabezzɛen ɛicrin n iɣaǧen u nitni bedden x iḍaren nsen d iɣembab nsen ssewḍen ɣar daxeř. 14 Netta igga uřa d ařeḥḥaf s řeqṭen adeḥmi d arjuwani d azeggʷaɣ iḥedqen u s řeqṭen azdad, uca igga xas ikiruben.

15 Ɣar zzat n Taddart igga netta tnayen n ipilaren s ict n tuzuggart n xemsa u-třatin n iɣaǧen. Ttajj x tqiccat nnes tuɣa-t xemsa n iɣaǧen. 16 Netta igga uřa d ssnaseř izewwqen am tinni deg Wexxam n Daxeř n Zzawect uca igga i-tent x tqiccatin n ipilaren. Igga uřa d mya n iremmamen uca icedd i-ten ɣar ssnaseř izewwqen. 17 Netta issbedd ipilaren ɣar zzat n Zzawect Tameqqrant, ijjen x yefus u ijjen x uzeřmaḍ. Wenni ɣar yefus igga as Yaxin u wenni x uzeřmaḍ igga as Buɛaz.