1 Suliman iḥseb sebɛin-ařef n yeryazen i trebbut n řehmeř d tmenyin-ařef n yeryazen ḥima ad xeddmen am yisuydayen x idurar uřa d třata-ařaf u setta-mya n yinni xasen iǧan d iweqqafen. ◘2:1 [1 Ij. 5:15-32] 2 Xenni issekk Suliman ijj n ureqqas ɣar Ḥiram, ajeǧid n Ṣur, inna: “Egg akidi am mammec teggid ak-d baba Dawud, tessekked ɣares akeccuḍ n tcejjart n tengelt maḥend ad ibna taddart i yixef nnes ḥima ad dayes izdeɣ. 3 Xzar, necc xseɣ ad bniɣ ict n Taddart i Yisem n SIDI, AREBBI inu, ḥima ad as tt ssqeddseɣ, ḥima ad ssbexxareɣ din řebxur ittfuḥen zzat i wudem nnes, u ḥima ad din ssarseɣ řebda aɣrum n wescan u ḥima ad din qeddmeɣ tiɣarṣa n wecmaḍ, ɣar tuffut u ɣar tmeddit, deg wussan n ssebt, deg wussan n uyur n jdid u di řeɛyudat ittwaggen n SIDI, AREBBI nneɣ. D man aya ittwagg x Israil i řebda.

4 Taddart i ɣa bniɣ, ad tiři d tameqqrant, maɣar AREBBI nneɣ d ameqqran x marra irebbiten. 5 Man wen i ɣar teǧa tzemmar ad as ibna ict n Taddart? Aqa ajenna, wah, ajenna n ijenwan, war izemmar ad t iksi! U min ɛniɣ necc, aqa necc ad as bniɣ ict n Taddart mɣir ḥima ad as ssbexxareɣ zzat i wudem nnes? 6 Xenni řexxu, sekk ayi-dd ijj n weryaz i izemmar ad ixdem s wureɣ d nnuqart d nnḥas d wuzzař uřa s ufiřu adeḥmi d uzeggʷaɣ iḥedqen d udehmani, ijj n weryaz i issen ad igg inqacen, wah, sekk i-t jmiɛ ak-d imiɣisen nni ɣari di Yahuda u di Urcalim, inni dd-yiwi baba Dawud. 7 Siweḍ ayi-dd uřa d akeccuḍ n tcejjart n tengelt d umerzi d ukeccuḍ n tcejjart n ṣandel azeggʷaɣ, minzi necc ssneɣ, aqa imsexxaren nnec ttḥakan deg unezdam n tcejjura n Lubnan, u xzar, imsexxaren inu ad wcen afus i imsexxaren nnec, ◼2:7 amerzi - niɣ ‘ameḍzi’. 8 maḥend ad ayi sswejden marra akeccuḍ nni, maɣar Taddart nni i ɣa bniɣ, ad tiři d tameqqrant d řeɛjeb. 9 Xzar, necc ad wceɣ i imsexxaren nnec, zeɛma i inezdamen nni izeddmen ticejjura, ɛicrin-ařef n řqedd n ukuru n yirden d ɛicrin-ařef n řqedd n ukuru n imendi d ɛicrin-ařef n řqedd n ubatu n binu d ɛicrin-ařef n řqedd n ubatu n zzect.” ◼2:9 abatu - ijj n ‘ubatu’ ɛraḥař 20 niɣ 40 litru.

10 Ḥiram, ajeǧid n Ṣur, yarra-dd s tira uca issekk tabrat-a ɣar Suliman: “Maɣar SIDI ittexs řgens nnes, igga cek d ajeǧid xasen.” 11 Uca xenni inna Ḥiram: “Ad ittwabarek SIDI, AREBBI n Israil, wenni iggin ajenna d temmurt, aqa Netta iwca i Dawud ijj n uḥenjir d amiɣis, wenni ɣar teǧa řefhamet d řeɛqeř, wenni i ɣa ibnan ict n Taddart i SIDI uřa d ict n taddart i tgelda nnes! 12 Xenni řexxu ad ssekkeɣ ijj n weryaz d amiɣis zi baba Ḥiram, wenni ɣar teǧa tussna d řefhamet,

13 mmis n ict n temɣart zeg yessis n Dan. Babas d ijj n weryaz zi Ṣur wenni ɣar iǧa tussna ḥima ad ixdem s wureɣ, nnuqart, nnḥas, uzzař u s weẓru d ukeccuḍ, s ufiřu arjuwani d udehmani, s řeqṭen azdad u s ufiřu azeggʷaɣ iḥedqen, ḥima ad inqec ɛřam kuř ineqqacen, u ḥima ad yarcem ɛřam kuř ireqqamen nni d as immewcen, u man aya jmiɛ ak-d imiɣisen nnec d imiɣisen n babac Dawud. 14 Xenni řexxu, ad issekk sidi inu irden d imendi d zzect d binu, min xef tuɣa issawař, ɣar imsexxaren nnes. 15 Neccin ad nezdem ticejjura n Lubnan anect i d ac ittxeṣṣan uca ad ac tent i-dd-nawi x tɣarruba n tḥenya x řebḥar ɣar Yafa, u cek s yixef nnec ad tent tessgeɛɛded ssenni ɣar Urcalim.” 16 Suliman iḥseb marra iryazen ibarraniyyen nni iǧan di temmurt n Israil, awarni i řeḥsab umi ten iḥseb babas Dawud. Ufin aqa din mya u-třata u-xemsin-ařef u-setta mya n yeryazen.

17 Sebɛin-ařef zzaysen igga i-ten d imsexxaren i trebbut n řehmeř u tmenyin-ařef d isuydayen x idurar d setta u-třatin-mya igga i-ten d iweqqafen ḥima ad ggen řgens ad ixdem.