1 Awarni man aya, umi yarsa wesɛar n ujeǧid, idweř ittxemmam deg Wacti d min tegga u di min xas ittwaggen n řeḥkam. 2 Xenni nnan imsexxaren iḥuḍriyyen n ujeǧid i tuɣa i d as ittsexxaren: “Ejj ad arzun tibřiɣin i ujeǧid, tiɛezriyyin i di iǧa weẓri. 3 Ejj ajeǧid ad igg iweqqafen x marra lɛamalat n tgeldit nnes, ad ssmunen marra tibřiɣin tiɛezřiyin nni di iǧa weẓri, ɣar lqelɛa n Cucan, ɣar taddart n temɣarin, sadu i tɛessast n Hijay, amsexxar amcenneɛ n ujeǧid wenni d aɛessas x temɣarin u ad asent wcen timesřayin i uthelli n weẓri. 4 Tabřiɣt i ɣa iɛejben i ujeǧid ad tiři d tajeǧidt deg wemcan n Wacti.” Tuɣa awař-a d lemliḥ di tiṭṭawin n ujeǧid uca netta igga ammu.

5 Tuɣa din ijj n weryaz d Uday di lqelɛa n Cucan, qqaren as Murdaxay, mmis n Ya’ir, mmis n Cimɛi, mmis n Kis, ijj n weryaz zeg ayt n Binyamin. 6 Netta ittwandeh zi Urcalim ak-d ayt n lmenfa nni dd-iwyen ak-d Yakunya, ajeǧid n Yahuda, inni umi indeh Nabuxadnaṣṣar, ajeǧid n Babil, di lmenfa. ◘2:6 2 Ij. 24:14 7 D netta wenni tuɣa isseymen Hadassa, ixs ad yini Istir, yeǧis n ɛemmis, minzi war ɣares tuɣi ɛad babas niɣ yemmas. Nettat tuɣa d ict n tebřiɣt s ijj n waddud icuwwar u dayes aẓri. Awarni umi immut babas d yemmas, iksi tt Murdaxay, igga i-tt d yeǧis. 8 Ařami ittwassen wawař n ujeǧid d řqanun nnes uca ttwassmunent aṭṭas n tebřiɣin di lqelɛa n Cucan sadu i tɛessast n Hijay, imsar belli sseɛdun Istir ɛawed ɣar taddart n ujeǧid, tedweř sadu tɛessast n Hijay, aɛessas n temɣarin. 9 Teɛjeb as tabřiɣt u nettat tusa as-dd x řxaḍar di tiṭṭawin nnes. Netta iqeǧeq ḥima ad as iwc timesřayin i uthelli n weẓri d macca nnes, u ḥima ad as iwc uřa d sebɛa n temsexxarin timeẓyanin ittwaxḍaren zi taddart n ujeǧid, uca issmuṭṭiy i-tent ɣar wemcan icnan qaɛ di taddart n temɣarin. 10 Istir war txebbar ca řgens nnes niɣ jjadira nnes, minzi Murdaxay iweṣṣa tt maḥend war t teqqar ca.

11 Tuɣa Murdaxay iggur kuř ass zzat i řemřah i iǧan zzat i taddart n temɣarin maḥend ad issen mammec teǧa Istir d min d as ɣa imsaren. 12 Tabřiɣt awarni tenneɣni tas as-dd nnubet ḥima ad tadef ɣar ujeǧid Aḥacwiruc, awarni tenɛac n uyuren n uzeyyen am mammec teǧa tewṣeyyet i temɣarin, minzi ammu i ttwakemmřen wussan n uthelli n weẓri: setta n uyuren s zzect n mirru d setta n iyuren s řeɛṭur ittfuḥen d fumadat i temɣarin. 13 Ammu dd-tusa kuř ict n tebřiɣt ɣar ujeǧid: marra min tᵉttar, immewc as maḥend ad zzayes teffeɣ zi taddart n temɣarin ɣar taddart n ujeǧid. 14 Ɣar tmeddit tudef ɣar daxeř u ɣar tuffut teɛqeb-dd ɣar taddart wiss tnayen n temɣarin sadu uḥeṭṭu n Caɛacɣaz, amsexxar amcenneɛ n ujeǧid, aɛessas n tiyya. War dd-teɛqeb ɣar ujeǧid, mɣir mařa teɛjeb as i ujeǧid uca tᵉttwařaɣa s yisem nnes.

15 Řami dd-tiweḍ nnubet n Istir, yeǧis n Abiḥayil, ɛemmis n Murdaxay, wenni tt yarrin d yeǧis, war tᵉttar walu mɣir min inna Hijay, amsexxar amcenneɛ n ujeǧid, aɛessas n temɣarin. U Istir tusa-dd x řxaḍar i marra wi tt iẓrin. 16 Ammu i iwyen Istir ɣar ujeǧid Aḥacwiruc, ɣar taddart nnes igellden, deg uyur wiss ɛecra, aqa-t d uyur n Ṭibit, deg useggʷas wiss sebɛa n tgelda nnes. 17 Ajeǧid tuɣa ittexs Istir x marra timɣarin nneɣni uca nettat tufa arḍa d řeḥnunect zzat i wudem nnes ktar x marra tiɛzuray nneɣni. Issars ttaj igellden x uzeǧif nnes uca yarra i-tt d tajeǧidt deg wemcan n Wacti. 18 Igga ujeǧid ict n zzardet tameqqrant i marra řḥukkam nnes d imsexxaren nnes, zzardet n Istir. Igga řehna di marra lɛamalat u iwca arriɣaluten ɛlaḥsab tizemmar n ujeǧid.

19 Xmi ttwassmunent tiɛzuray ɛawed, iqqim Murdaxay ɣar tewwart n ujeǧid. 20 Istir war txebbar ca i jjadira nnes niɣ i řgens nnes, am mammec d as yumur Murdaxay, minzi Istir tuɣa teggur ɛlaḥsab řumur n Murdaxay am mammec tuɣa tᵉttegg umi tuɣa ɣares tᵉttwarebba. 21 Deg wussan nni, am iqqim Murdaxay di tewwart n ujeǧid, tuɣa Biɣtan d Tarac, tnayen n imsexxaren icennɛen n ujeǧid zeg iɛessasen n tewwart, ttfuggmen aṭṭas u tuɣa arezzun ad sswiẓẓḍen afus ɣar ujeǧid Aḥacwiruc. 22 Tamesřact-a tedweř tᵉttwassen ɣar Murdaxay uca netta ixebbar i-tt i tjeǧidt Istir, uca Istir tenna man aya i ujeǧid s yisem n Murdaxay. 23 Arzun di tmesřact nni uca ufin man aya d tidett. Uyřen ten s tnayen x teḥnact uca uran t deg wedlis n imezruyen zzat i wudem n ujeǧid.