1 Maɣar necc ggiɣ marra aya ɣar wuř inu, maḥend ad arzuɣ di marra aya, aqa imseggaden d imiɣisen d tmegga nsen deg ufus n AREBBI. Tayri d wecrah war ten issin bnadem, aqa marra iǧa zzates. 2 Marra iǧa am mammec iǧa ɣar marra: tira d ict třeqqef amsegged d uɛeffan, am uṣebḥan d umezdag am umexmuj, wenni iqeddmen taɣarṣt d wenni war iqeddmen taɣarṣt, aṣebḥan d umednub, wenni ittjjaǧan d wenni itteggʷeden maḥend ad ijjaǧ. ◘9:2 Izhd. 73:12, 13 3 Man aya d ijj n řɣar ɣar marra min imsaren sadu tfuct, aqa marra iwdan iřqef i-ten tira d ict, uca uřa uř n tarwa n bnadem iccur s řɣar, u aqa din aṭemmes deg wuř nsen di řweqt n tudart nsen, u awarni i uya ad uyuren nitni ɣar imettinen. 4 Maɣar i wenni iqqnen i marra inni iddaren aqa din asitem, minzi řḥař i weqzin iddaren ḥsen zi řḥař i weyrad immuten. 5 Maɣar inni iddaren ssnen, aqa nitni ad mmten, maca imettan war ssinen walu qaɛ. Nitni war ttᵉṭṭfen walu zi řmunet, maɣar řidaret xafsen tᵉttwattu. 6 Aqa tayri nsen d wecrah nsen d tusmi nsen fnan. I řebda war ɣarsen bu tesɣart ɛad di marra min ittemsaren sadu tfuct.

7 Uyur xenni, iwa ecc s řefraḥet aɣrum nnec, su s wuř ifarḥen binu nnec, maɣar iɛjeb as i AREBBI timegga nnec aṭṭas zeg wami. 8 Ejj ad yiři arruḍ nnec d acemřař řebda u ɛemmarṣ war ittxeṣṣi zzect x uzeǧif nnec. 9 Barreɛ x tudart ak-d temɣart nni tᵉttexsed, marra ussan n tudart nnec ifennan nni d as iwca AREBBI sadu tfuct, mařa ussan n lḥaḍar nnec ifennan danita, maɣar ta d tasɣart nnec di tudart-a u ɣar umarret i zi tmarrted sadu tfuct. 10 Marra min ɣa yaf ufus nnec maḥend ad t yegg, egg i-t ɛlaḥsab jjehd nnec, maɣar war iǧi di řaxart mani ɣa tuyured min ɣa tegged, niɣ axarreṣ niɣ tussna uřa d tiɣit.

11 Ɛawed ẓriɣ sadu tfuct aqa ayt n bu-tazřa war ɣeǧben řebda di ḥamat, niɣ ayt n bu-teɣruḍt řebda deg umenɣi, u imiɣisen war ɣarsen iǧi weɣrum řebda u yinni s řeɛqeř war ɣarsen iǧi wagřa řebda, uřa d inni s řefhamet war ɣarsen iǧi arḍa řebda, maɣar řḥař d tira řeqqfen uřa d marra nitni. 12 Maɣar bnadem war issin řmijař nnes, am yiseřman inḥeṣren di tracca n arẓiyyet, u am yijḍaḍ innḥeṣren di řfex. Ammu uřa d tarwa n bnadem ttwaṭṭfen di řfex deg ict n řweqt d taɛeffant, xmi xasen dd-tweṭṭa tracca deɣya.

13 Uřa d man aya bdiɣ ad dayes ẓriɣ tiɣit sadu tfuct, tusa ayi-dd d tameqqrant aṭṭas. 14 Tuɣa din ict n tendint d tameẓyant dayes drus n yewdan waha. Iffeɣ xas ijj n ujeǧid d ameqqran, iḥewwes i-tt, u issbedd xas lbarajat timeqqranin. 15 Ittwaff dayes ijj n weryaz d amezřuḍ d amiɣis wenni ifekken tandint s tiɣit nnes, maca uřa d ijj n bnadem iɛqeř ɛad ɛemmarṣ x weryaz nni. 16 Xenni nniɣ necc: “Tiɣit teḥřa x jjhed!”, waxxa tᵉttwasseḥqar tiɣit n umezřuḍ u awařen nnes war tᵉttwasřen. ◘9:16 Awřn. 21:22; 24:5; Amb. 7:19

17 Awařen n imiɣisen nni ɣar ttesřan iwdan di řhudnet, ḥsen zeg uɣuyyi n řḥakem jar ibuhařiyyen. 18 Tiɣit teḥřa x řesnaḥ n umenɣi, maca ijj n umednub waha iheddem aṭṭas.