143
1 Azehhed n Dawud.
A SIDI, seř i tẓaǧit inu,
sḥess i tutra inu.
Arr-dd xafi ɛlaḥsab tidett nnec,
ɛlaḥsab tasegda nnec.
2 War ttegg ccreɛ ak-d umsexxar nnec,
maɣar uřa d ijj zeg inni iddaren
ad yiři d amsegged zzat i wudem nnec. ◘143:2 Rum. 3, 4; Gal. 3, 4
3 Minzi řeɛdu ittdarrac řeɛmar inu,
iɛeffes x tudart inu ɣar temmurt,
isszeddeɣ ayi deg imucan n ṭṭřam,
am yinni immuten zi mecḥař uya.
4 Buḥbeř inu ittefciř xafi,
uř inu yarewweɛ di daxeř inu.
5 Necc ttɛeqřeɣ x wussan iɛdun,
ttxemmameɣ di marra timegga nnec,
ttxarrṣeɣ di řefɛayeř n ifassen nnec. ◘143:5 Izhd. 77:6, 11
6 Necc ttbezzɛeɣ ifassen inu ɣarek,
řeɛmar inu aqa-t zzatek
am ict n temmurt iffuden. Silah.
7 Arr-dd xafi deɣya, a SIDI,
buḥbeř inu ittefciř,
war ssnuffara udem nnec zzayi,
maḥend war ddikkwiřeɣ
am yinni dd-ihekkwan
deg weḥfur n wenḍeř.
8 Ejj ayi ad sřeɣ
i tmexsiwt nnec icewwaren
ɣar teffut,
maɣar ttecřeɣ xak.
Scen ayi abrid i ɣa uyureɣ,
maɣar ssgeɛɛdeɣ řeɛmar inu ɣarek. ◘143:8 Izhd. 25:1
9 A SIDI, kkes ayi i řɛedyan inu,
ɣarek i ɣa arewřeɣ.
10 Seřmed ayi ad ggeɣ
min iǧan i arḍa nnec,
maɣar Cek d AREBBI inu.
Ejj Arruḥ nnec iṣebḥen ad ayi indeh
deg ict n temmurt iwaṭan.
11 A SIDI, arr-dd dayi tudart
di ṭṭweɛ n Yisem nnec.
S tsegda nnec,
suffeɣ řeɛmar inu zi řeḥṣaret,
12 areddeǧ řɛedyan inu
di tmexsiwt nnec icewwaren,
qḍa x marra inni d ayi iḥeṣṣaren,
maɣar necc d umsexxar nnec. ◘143:12 Izhd. 86:16; 116:16
◘143:2 143:2 Rum. 3, 4; Gal. 3, 4
◘143:5 143:5 Izhd. 77:6, 11
◘143:8 143:8 Izhd. 25:1
◘143:12 143:12 Izhd. 86:16; 116:16