Adlis Iqeddsen Luka 23

Pilaṭus isseqsa Yasuɛ

1 Marra tmesmunt nsen tekkar uca nitni nedhen t ɣar Pilaṭus. ◘ 2 Bdan ad t ḍeřmen, nnan: “Neccin nufa aqa Wa issefsed řgens nneɣ am imenneɛ ad wcen ḍḍariba i kuř azeǧif i qayṣar, iqqar belli Netta d Ajeǧid, Lmasiḥ!” ◘ 3 Isseqsa t Pilaṭus, inna: “Ma Cek d Ajeǧid n Wudayen?” Yarra-dd, inna: “Cek i t iqqaren!” ◘

4 Inna Pilaṭus i řɣaci u i imeqqranen n ikehhanen: “Aqa war ufiɣ bu uřa d ijj n řɛib di Bnadem-a!” 5 Maca sɣuyen nitni, nnan: “Netta issɣewwaɣ řgens, isseřmad di marra Yahudiyya, ibda zi Ljalil ař da.” 6 Umi isřa Pilaṭus ‘Ljalil’, isseqsa: “Ma aryaz-a d Ajalili?” 7 Umi ifhem belli Netta tuɣa sadu ufus n Hirudus, issekk i-t ɣar Hirudus, minzi wanita tuɣa-t di Urcalim deg wussan nni. ◘

Yasuɛ zzat i Hirudus

8 Ařami iẓra Hirudus Yasuɛ, ifarḥ aṭṭas, minzi aṭṭas zeg wami tuɣa ixs ad t iẓar, minzi isřa xas aṭṭas n tmesřayin, u tuɣa issitim ad zzayes iẓar ca n řeɛřamet. ◘ 9 Isseqsa t x waṭṭas n tmesřayin, maca Yasuɛ war xas dd-yarri s ca. 10 Imeqqranen n ikehhanen d imseřmaden n idlisen kkaren, ḍeřmen t s řḥarret. 11 Hirudus ak-d řɛeskar nnes sseḥqaren t, u awarni řami istehza zzayes, yarḍ as ijj n useřham adehmani, uca issekk i-t ɣar Pilaṭus. 12 Dewřen Pilaṭus d Hirudus d imeddukkař deg wass nni, minzi qbeř tuɣa din řeɛdawet jar asen. ◘

Řḥukm x Yasuɛ s řmewt

13 Xas uca iřaɣa Pilaṭus x imeqqranen n ikehhanen d imeqqranen n řgens, inna asen: ◘ 14 “Kenniw tiwyem ayi-dd bnadem-a am yijjen wenni issɛiǧen řgens nwem. Xzar, necc sseqsiɣ t zzatwem, war ufiɣ uřa d ijj n řɛib deg weryaz-a zi jjihet marra i zzayes tᵉttcetcam xas kenniw. 15 Uřa d Hirudus war dayes yufi ca, minzi necc ssekkeɣ t ɣares. U xzar, war din uřa d ict n řḥajjet i igga tesdaheǧ řmewt. 16 Necc ad t hettkeɣ s urekkuḍ uca ad as arxuɣ.” 17 Maɣar tuɣa din ict n tnamit maḥend ad asen yarxu i yijjen di Řɛid. ◘ 18 Maca marra řɣaci isɣuy deg ijj n umur, inna: “Kksem Wa, arxu aneɣ-dd i Bar-Abbas!” ◘ 19 Wa tuɣa ittwammenḍar di řeḥbes x ssibbet n ijj n uɣuwweɣ i imsaren di tendint u x ssibbet n wenɣay. 20 Issiweř Pilaṭus ɛawed akidsen, minzi tuɣa ixs ad yarxu i Yasuɛ. 21 Maca sɣuyen nitni, nnan: “Ṣellb i-t! Ṣellb i-t!” 22 Inna asen i twařa wiss třata: “Man tuɛeffna igga Wa xenni? Necc war dayes ufiɣ bu uxeṭṭu i isdaheǧen řmewt? S uyenni awarni řami t hettkeɣ s urekkuḍ, ad as arxuɣ!” 23 Maca nitni ziyyaren xas s tmijjawin jjehdent, ttaren maḥend ad t ṣellben. Timijjawin nsen d tenni n imeqqranen n ikehhanen tuɣa arennyent di jjehd. 24 Xenni iḥkem Pilaṭus ad asen iqḍa cɣeř nsen. ◘ 25 Iḍřeq asen i wenni immenḍaren di řeḥbes zi ssibbet n uɣuwweɣ d wenɣay, d wenni ttaren nitni, maca isellem Yasuɛ i nitni x řeḥsab řxaḍar nsen.

Abrid ɣar ṣṣalib

26 Umi t gewwden ssenni, ṭṭfen Cimɛun zi Qayrawan, tuɣa yusa-dd zi řkampu, uca ssarsen xas ṣṣalib ḥima ad t yarbu awarni Yasuɛ. ◘ 27 Iḍfar i-t-i-dd ijj n řɣaci n iwdan d temɣarin nni tuɣa iwtin agejdur, ttrunt xas. 28 Inneqřeb-dd ɣarsent Yasuɛ, inna: “A yessis n Urcalim, war ttrunt ca xafi, maca runt x ixef nkent d tarwa nkent. 29 Minzi ad dd-asen wussan i di i ɣa inin: ‘Sseɛd n temɣarin i war izemmaren ad urwent u sseɛd n iɛeddisen nni war yurwen, d tibbac tinni war issuṭṭuḍen!’ 30 Xenni ad inin i idurar: ‘Wḍam-dd xaneɣ!’, u i tiwririn: ‘Dřent aneɣ!’ ◘ 31 Minzi mařa ggin aya s ukeccuḍ aziza, min ɣa imsaren xenni i ukeccuḍ yuẓɣen?” ◘ 32 Nedhen akides ɛawed tnayen nneɣni inni tuɣa iqeṭṭɛen abrid, ḥima ad ten nɣen akides. ◘

33 Řami iwḍen ɣar wemcan umi qqaren ‘Taceqquft’, ṣellben t din ak-d yinni tuɣa iqeṭṭɛen abrid, ijjen x yefus nnes u wenneɣni x uzeřmaḍ nnes. ◘ 34 Maca Yasuɛ inna: “A Baba, ɣfar asen, minzi nitni war ssinen min tteggen!” Uca bḍan arruḍ nnes, nḍaren xas akeccuḍ. ◘ 35 Tuɣa iwdan bedden din, xezzaren. Uřa d imeqqranen n řgens sthezzan zzayes, nnan: “Tuɣa issenjem inneɣni, řexxu ejj i-t ad issenjem Ixef nnes mařa Netta d Lmasiḥ, d Wenni ittwafarzen zi AREBBI?” 36 Uřa d iɛeskariyyen stehzan zzayes am ɣares dd-qarrben uca wcin as řxeǧ. 37 Nnan as: “Mařa Cek d Ajeǧid n Wudayen, xenni senjem Ixef nnec!” 38 Tuɣa din ɛawed ict n tira sennej nnes, urin tt s lḥuruf n Tyunanit d Tlatinit d Tɛibranit: ‘Wa d Ajeǧid n Wudayen.’ ◘

39 Ijjen zeg iqṭaṭɛiyyen i yuyřen akides, tuɣa ittceqqaf dayes, iqqar: “Mařa Cek d Lmasiḥ, senjem Ixef nnec uřa d neccin!” 40 Maca wenneɣni iwebbex i-t, inna: “Ma cek war teggʷided ca ɛad zi AREBBI umi cek iřqef ccreɛ d ijjen? 41 Neccin s řḥeqq minzi neṭṭef axeǧeṣ n min negga. Maca Wa war iggi min war iḥřin!” 42 Xas uca inna i Yasuɛ: “Ɛqeř xafi, a Sidi inu, xmi dd ɣa tased di Tgeldit nnec.” 43 Inna as Yasuɛ: “S tidett, Necc ad ac iniɣ, aqa ass-a ad tiřid akidi di jjennet.”

Řmewt n Yasuɛ

44 Tuɣa tasaɛɛet ɛřaḥař d setta, aqa-tt d ḍḍhur, xenni tewḍa-dd taǧest x temmurt marra ařami d tesɛa, aqa-tt d třata n uɛecci. ◼ ◘ 45 Xenni tebbarcen tfuct uca ařeḥḥaf n wadaf ɣar Zzawect Tameqqrant ittwacarreg deg wezyen. ◘ 46 Yasuɛ iřaɣa s jjehd, inna: “A Baba, deg ifassen nnec ad ssarseɣ Arruḥ inu.” Umi inna aya, isellem Ixef nnes ɣares. ◘ 47 Umi iẓra řqebṭan x mya min tuɣa imsaren, ibda issemɣara di AREBBI, inna: “S tidett tuɣa Bnadem-a d amseggad!” ◘

48 Umi marra řɣaci i d imunen ḥima ad ẓaren afurrej-a, ẓrin min imsaren, ɛeqben am wtin deg idmaren nsen. 49 Marra inni issnen Yasuɛ d temɣarin i kides dd-yusin zi Ljalil, bedden ɣar řaggʷaj, ẓrin marra aya.

Anḍeř n Yasuɛ

50 Ijj n weryaz, qqaren as Yusuf, tuɣa-t d amcawar di Jmaɛet Tameqqrant. Netta zi Ramta, ict n tendint di Yahuda, aqa-t d ijj n weryaz d aṣebḥan d amseggad. ◼ ◘ 51 Netta war yarḍi ca x ccwar nsen u x min ggin, u netta tuɣa ittraja Tageldit n AREBBI. 52 Wanita yuyur ɣar Pilaṭus uca ittar as arrimet n Yasuɛ. 53 Issehwa tt-i-dd zi ṣṣalib, inneḍ i-tt deg ict n txeyyaḍt n řeqṭen azdad uca issars i-tt deg wenḍeř i iɣza di sseǧaḥ mani war inḍiř ḥed ɛad. ◘ 54 Tuɣa d ass n Usewjed, aqa ssebt tqarreb-dd.

55 Timɣarin i kides dd-yusin zi Ljalil, qarrbent-i-dd, ẓrint anḍeř d mammec ssarsen arrimet nnes. ◘ 56 Xas uca ɛeqbent, ssewjdent řeɛṭur d zzect ittfuḥen, maca di ssebt areyyḥent am mammec teǧa di tewṣeyyet. ◘