1 Ejj aneɣ xenni ad nettwaḥseb zzaywem am imsexxaren n Lmasiḥ u am iwkiřen n řesrar n AREBBI. ◘4:1 Mt. 24:45; 2 Kur. 6:4; Kul. 1:25; Tit. 1:7. 2 Xenni ittxeṣṣa i mkuř awkiř ad ittwaf d amtiqqi. ◘4:2 Lk. 12:42. 3 Necc war d ayi icqi ca mařa ttwaḥekmeɣ zzaywem niɣ zeg ijj n bnadem nneɣni. Uřa d necc war ḥekkmeɣ ca x ixef inu. 4 Minzi necc war uciɣ s ca war iḥřin dayi, maca s man aya war ttwaseggdeɣ, maɣar aqa SIDI d Řqaḍi inu. ◘4:4 Uf. 34:7; Ayub 9:2; Izhd. 143:2. 5 S uyenni war ḥekkmem ca x walu qbeř řweqt nni di dd ɣa yas SIDI, wenni i ɣa issuffɣen ɣar tfawt min innufaren di taǧest, wenni i ɣa isseḍharen ixarriṣen n wuřawen. Uca řexdenni kuř ijj ad ɣares yiři usemɣar zi AREBBI. ◘4:5 Dan. 7:10; Mt. 7:1; Rum. 2:1; Asa. 20:12.

6 Aqa man aya, a aytma, iwyeɣ t-i-dd xafi u x Apullus am yijj n umedya di ṭṭweɛ nwem, ḥima ad zzayneɣ třemdem, maḥend war tᵉttxarriṣem ca barra i min iǧan di tira, ḥima uřa d ijj ad issemɣar ixef nnes ḍidd i wenni d as yudsen di ssibbet n yijjen nneɣni. ◘4:6 Awřn. 3:7; Rum. 12:3. 7 Man wen yarezzun dayek? Niɣ min ɣarek nni war tᵉṭṭifed? Uca mařa tᵉṭṭfed t, mayemmi tcennɛed axmi war t tᵉṭṭifed ca? ◘4:7 Yḥ. 3:27; Yaɛ. 1:17. 8 Řexxu aqa tejjiwnem u tdewřem tᵉttejjarem, uca břa neccin aqa tḥekkmem am ijeǧiden. Meɛlik kenniw tḥekkmem am ijeǧiden, ad yiři neccin xenni ad neḥkem ɛawed akidwem! 9 Minzi ittɣiř ayi belli AREBBI igga aneɣ ɣar uneggar, neccin inni iǧan d rrusul, axmi xaneɣ ḥekmen s řmewt, minzi aqa nedweř d afurrej i ddunect, i lmalakat u i iwdan. ◘4:9 Izhd. 44:23; Rum. 8:36; 2 Kur. 4:11; Ɛbr. 10:33. 10 Neccin neǧa d ibuhařiyyen x ssibbet n Lmasiḥ, maca kenniw teǧam d imiɣisen di Lmasiḥ. Neccin nheyyef, kenniw tjehdem, kenniw tᵉttwacennɛem, neccin nettwasseḥqara. ◘4:10 1 Kur. 2:3. 11 Ař řexxu neccin dayney řaẓ d ufadi d tuɛaryent, ccaten aneɣ, war ɣarneɣ bu tzeddiɣt, ◘4:11 Řex. 23:2. 12 narebber am nxeddem s ifassen nneɣ. Nitni sseḥqaran aneɣ, aqa aneɣ ad nbarek, darrcen xaneɣ, maca aqa nkessi armeḥ, ◘4:12 Mt. 5:44; Lk. 6:28; 23:34; Řex. 7:60; 18:3; 20:34; Rum. 12:14; 1 Ts. 2:9; 2 Ts. 3:8. 13 ceqqfen dayneɣ, aqa nettḥeccem i-ten di řxir. Ař řexxu nedweř am tzubač n ddunect, am ifuraḍ n marra, ař i řexxu.

14 War ttariɣ aya ḥima ad kenniw sseḥcimeɣ, maca ttziyyareɣ kenniw am tarwa iɛizzen. ◘4:14 1 Ts. 2:11. 15 Waxxa mařa tuɣa din ɣarwem ɛecra-ařaf n yinni i kenniw yarebban di Lmasiḥ, aqa war ɣarwem aṭṭas n ibabaten, minzi necc jjiɣ-dd kenniw di Yasuɛ Lmasiḥ s L’Injil. ◘4:15 Řex. 18:11; Gal. 4:19; Flmn. 10; Yaɛ. 1:18. 16 S uyenni ttarreɣ zzaywem: Arewsem ayi! ◘4:16 1 Kur. 11:1; Fil. 3:17; 1 Ts. 1:6; 2 Ts. 3:9. 17 S uyenni ssekkeɣ awem-dd Timutiyu, wenni iǧan d mmi iɛizzen d amtiqqi di SIDI, ḥima ad d awem issfekkar ibriden inu i iǧan di Lmasiḥ, am mammec ten sseřmadeɣ di marra timesmunin.

18 Maca ca zzaywem aqa ttneffaxen, axmi necc war ɣarwem ttiwiḍiɣ. 19 Maca mařa ixs SIDI ad ɣarwem dd-aseɣ deɣya. Xenni war ttexseɣ zeɛma ad ssneɣ awařen n yinni issgeɛɛden ixef nsen, maca jjehd nsen. ◘4:19 Řex. 18:21; Ɛbr. 6:3; Yaɛ. 4:15. 20 Minzi Tageldit n AREBBI war teǧi ca deg wawařen, maca di jjehd. ◘4:20 1 Kur. 2:4; 1 Ts. 1:5; 2 Bṭ. 1:16. 21 Min texsem? Ma ad ɣarwem dd-aseɣ s weɛmud niɣ s tayri u s arruḥ n temhint?