1 Řḥasuř, ittwanna belli aqa din jar awem farq-ccɣeř, u anect n farq-ccɣeř nni war iǧin qaɛ jar lkuffar, aqa ijj n mmis ɣares tamɣart n babas. ◘5:1 Lawi 18:8; Aɛwd. 27:20. 2 Kenniw tessuffam ixef nwem, waxxa ittxeṣṣa awem di tidett ad tceḍnem, ḥima ad tḥeyyḍem wenni iggin man aya zi řwesṭ nwem. 3 Waxxa necc aggʷejeɣ ɛlaḥsab arrimet, aqa ayi ḥḍareɣ di Arruḥ, uca aqa ḥekmeɣ axmi ḥḍareɣ x wenni iggin man aya. 4 Ittxeṣṣa ad tmunem marra deg Yisem n Siditneɣ Yasuɛ Lmasiḥ, u necc akidwem di Arruḥ, s jjehd n Siditneɣ Yasuɛ Lmasiḥ, 5 uca kenniw ad t tsellmem i cciṭan i txessart n arrimet nnes, ḥima ad iddar di Arruḥ deg wass n Siditneɣ Yasuɛ Lmasiḥ. ◘5:5 1 Tim. 1:20.

6 War dd xawem yusi ufeyyec! Ma war tessinem ca belli cwayt n wentun issmemm marra taɛebbuzt n warecti? ◘5:6 Gal. 5:9. 7 Sizedgem ixef nwem xenni zeg wentun aqdim, ḥima ad tiřim d ict n řɛejnet n warecti n jdid. Aqa kenniw d aɣrum břa antun, minzi Taɣarṣt nneɣ n Useɛdu aqa tᵉttwaɣarṣ i neccin, aqa Netta d Lmasiḥ. ◘5:7 Ica. 53:7; Yḥ. 1:29; 1 Kur. 15:3. 8 S uyenni ejj aneɣ ad nɛeyyed, war iǧi s wentun aqdim niɣ s wentun n tuɛeffna d řɣar, maca s wentun n řeṣfayet d tqeddast. ◘5:8 Uf. 12:3, 15; Aɛwd. 16:3.

9 Aqa uriɣ awem-dd di tebrat, ittxeṣṣa war ttɛacarem ayt n farq-ccɣeř ◘5:9 Aɛwd. 7:2; Mt. 18:17; 2 Kur. 6:14; Afa. 5:11; 2 Ts. 3:14. 10 War ssiwřeɣ x ayt n farq-ccɣeř nni iǧan di ddunect-a, niɣ x iḍemmaɛen niɣ x ibeɛɛaj niɣ x yinni iɛebbden l’aṣnam, mařa ammu, iři ad teffɣem zi ddunect-a. 11 Maca uriɣ awem-dd řexxu, ḥima war tᵉttɛacarem ca ḥed, waxxa qqaren as uma, maca aqa-t d bu-farq-ccɣeř, niɣ d aḍemmaɛ, niɣ d wenni iɛebbden l’aṣnam, niɣ d amceqqaf, niɣ d askarji, niɣ d aceffar. Ak-d ḥed am wanita war kis tᵉttettem ɛad aɣrum! ◘5:11 Řxř. 12:14; Mt. 18:17; 2 Ts. 3:14; 2 Yḥ. 10. 12 Minzi man řḥeqq ɣari, ḥima ad ḥekmeɣ x yinni iǧan barra? Ḥekkmem kenniw x yinni iǧan daxeř! 13 Maca inni iǧan barra, AREBBI ad xasen iḥkem. Sḥeyydem xawem aɛeffan! ◘5:13 Aɛwd. 17:7