1 Deg umezwaru tuɣa iǧa Wawař, Awař tuɣa-t ɣar AREBBI u AREBBI tuɣa-t d Awař. ◘1:1 Awřn. 8:22; Yḥ. 1:1, 2. 2 Wanita d wenni iǧan ɣar AREBBI deg umezwaru. ◘1:2 Yḥ. 17:5. 3 Zzayes Netta iǧa kuřci u břa Netta war teǧi uřa d ict n tmesřact zi marra min iǧan. ◘1:3 Amz. 1:3; Izhd. 33:6; Afa. 3:9; Kul. 1:16; Ɛbr. 1:2. 4 Dayes i teǧa Tudart u Tudart teǧa Tafawt n iwdan. ◘1:4 Yḥ. 5:26; 1 Yḥ. 5:11; 8:12; 9:5; 12:46. 5 Tafawt tareqq di taǧest, taǧest war tt tᵉṭṭif. ◘1:5 Yḥ. 3:19.

6 Tuɣa din ijj n bnadem issekk i-t-i-dd AREBBI, qqaren as Yuḥanna. ◘1:6 Mal. 3:1; Mt. 3:1; Mk. 1:2, 4; Lk. 3:3; 7:27; Yḥ. 1:33. 7 Netta yusa-dd am ccahed ḥima ad iched i Tfawt, ḥima ad zzayes amnen marra. 8 Netta war iǧi ca d Tafawt, maca tuɣa-t ḥima ad iched i Tfawt.

9 Maɣar Tafawt nni, tuɣa d Tafawt n tidett i itticen tafawt i kuř bnadem i dd-ittasen ɣar ddunect. ◘1:9 Yḥ. 8:12; 9:5; 12:46. 10 Netta tuɣa-t di ddunect u zzayes tᵉttwagg ddunect, maca ddunect war t tessin ca. ◘1:10 Ɛbr. 1:2; 11:3. 11 Yusa-dd ɣar wi iǧan nnes, maca wi iǧan nnes war t qbiřen. 12 Maca marra inni t iqebřen, iwca asen ṣṣulṭa, ḥima ad dewřen d tarwa n AREBBI, i yinni ittamnen deg Yisem nnes, ◘1:12 Ica. 56:5; Rum. 8:15; Gal. 3:26; 2 Bṭ. 1:4; 1 Yḥ. 3:1. 13 inni war dd-ixřiqen uřa zeg idammen, uřa zi min ixs ddat n bnadem, uřa zi min ixs weryaz, maca zi AREBBI dd-ittwaxeřqen.

14 Awař idweř d ddat, izdeɣ jar aneɣ, neccin neẓra aɛuǧi nnes, aɛuǧi n Uyenni n Mmis zi ɣar Babas i iccuren s arḍa d tidett. ◘1:14 Ica. 7:14; Mt. 1:16; 17:2; Lk. 1:31; 2:7; Kul. 1:19; 2:9; 2 Bṭ. 1:17; 1 Yḥ. 4:2, 3; 2 Yḥ. 1:7. 15 Iched xas Yuḥanna, iřaɣa, inna: “D Wa min xef nniɣ, aqa Netta ad dd-yas awarni ayi, waxxa Netta idweř zzati, minzi Netta tuɣa-t qbeř inu.” ◘1:15 Mt. 3:11; Mk. 1:7; Lk. 3:16; Yḥ. 1:26,30.

16 Zi řekmařet nnes niwi-dd marra, arḍa x arḍa. ◘1:16 Kul. 2:10. 17 Ccariɛa temmewc x ufus n Musa, maca arḍa d tidett usin-dd zi Yasuɛ Lmasiḥ. ◘1:17 Uf. 20:1. 18 Uřa d ijj war iẓri AREBBI. Ayenni n AREBBI i iǧan deg weḥsin n Babas, d Netta i zzayes issxebbaren. ◘1:18 Uf. 33:20; Aɛwd. 4:12; Mt. 11:27; Yḥ. 6:46; 1 Tim. 6:16; 1 Yḥ. 4:12.

19 Ta d cchadet n Yuḥanna řami dd-ssekken Wudayen ikehhanen d Ilawiyyen zi Urcalim ḥima ad t sseqsan: “Min teɛnid cek?” ◘1:19 [Mt. 3:1-12; Mk. 1:2-8; Lk. 3:15-17] — Yḥ. 5:33. 20 Tuɣa iched, war issnuffar ca, iched: “Necc war ǧiɣ ca d Lmasiḥ.” ◘1:20 Yḥ. 3:28; Řex. 13:25. 21 Sseqsan t: “I min teɛnid cek xenni? Ma d cek d anabi Iliya?” Inna: “Lla, war ǧiɣ d necc!” “Ma d cek d anabi?” Yarra-dd: “Lla!” 22 Xas uca nnan as: “Min teɛnid cek? Ittxeṣṣa aneɣ ad narr i yinni d aneɣ dd-issekken. Min teqqared x yixef nnec?” 23 Inna: “Necc d tmijja i ittřaɣan di řexřa: ‘Seggmem abrid n SIDI nican!’, am mammec inna unabi Icaɛya.” ◘1:23 Ica. 40:3; Mt. 3:3; Mk. 1:3; Lk. 3:4.

24 Inni dd-ittwassekken, tuɣa aten zeg Ifarisiyyen. 25 Nitni sseqsan t, nnan as: “Mařa war teǧid ca d Lmasiḥ uřa d Iliya uřa d anabi, i xenni mayemmi tᵉsseɣḍaṣed?” ◘1:25 Aɛwd. 18:18. 26 Yuḥanna yarra-dd, inna asen: “Necc sseɣḍaṣeɣ deg waman, maca aqa din di řwesṭ nwem wenni war tessinem ca. ◘1:26 Mt. 3:11; Mk. 1:7; Lk. 3:16; Řex. 1:5; 11:16; 19:4. 27 Netta d wenni i dd ɣa yasen awarni ayi, Netta iǧa qbeř inu, necc war sdiheǧeɣ ad as fesyeɣ ifiřan n sandaliyat nnes.”

28 Man aya imsar di Baytɛanya x ujemmaḍ n L’Urdun, mani tuɣa Yuḥanna isseɣḍaṣ.

29 Tiwecca nnes iẓra Yuḥanna Yasuɛ iggur-dd ɣares, inna: “Xzarem, aqa-t d Izmar n AREBBI i ittekksen ddnub x ddunect! ◘1:29 Amz. 22:7, 8; Ica. 53:5, 7; Yḥ. 1:36. 30 D Wa min xef nniɣ: ‘Ad dd-yas awarni ayi ijj n Weryaz nni iǧan zzati, minzi Netta tuɣa-t qbeř inu.’ 31 Necc war t ssineɣ ca, maca ḥima ad ittwassargeb ɣar Israil, x uyenni usiɣ-dd ḥima ad ssɣeḍṣeɣ deg waman.”

32 Yuḥanna iched, inna: “Ẓriɣ Arruḥ ihwa-dd am yict n tedbirt zeg ujenna, tarsa xas. ◘1:32 Mt. 3:16; Mk. 1:10; Lk. 3:22. 33 Necc war t ssineɣ ca, maca wenni d ayi dd-issekken ḥima ad ssɣeḍṣeɣ deg waman, Netta inna ayi: ‘Wenni teẓrid ihwa-dd xas Arruḥ uca yarsa xas, d Wa d wenni isseɣḍaṣen di Arruḥ Iqeddsen.’ 34 U Necc ẓriɣ, cehdeɣ belli Wanita d Mmis n AREBBI.”

35 Tiwecca nnes tuɣa Yuḥanna ibedd ak-d tnayen n imeḥḍaren nnes. 36 Am tuɣa ixezzar ɣar Yasuɛ i din igguren, inna: “Xzarem, d Wa d Izmar n AREBBI!” ◘1:36 Ica. 53:7; Yḥ. 1:29; Řex. 8:32 37 Tnayen n imeḥḍaren nnes sřin as am tt iqqar uca ḍfaren Yasuɛ. 38 Inneqřeb-dd Yasuɛ, iẓra i-ten ḍeffaren t-i-dd, isseqsa ten: “Min xef tarezzum?” Nitni nnan as: “A Amseřmad nneɣ, mani tzeddɣed?” 39 Inna asen: “Araḥem-dd, ad tẓarem!” Ruḥen akides, ẓrin mani izdeɣ, qqimen akides ass nni. Tasaɛɛet tuɣa-tt ɛřaḥař d ɛecra, ixs ad yini ɛřaḥař tasaɛɛet wiss arebɛa n tmeddit.

40 Andrawus, umas n Cimɛun, tuɣa-t d ijjen zeg yinni isřin aya zi Yuḥanna uca ḍeffaren Yasuɛ. 41 D wa i iẓrin amezwaru umas Cimɛun, inna as: “Aqa nufa Lmasiḥ!” 42 Issiweḍ i-t-i-dd ɣar Yasuɛ. Ixzar dayes Yasuɛ, inna: “Cek d Cimɛun, mmis n Yuna, ad ac řaɣan: ‘Kifa’, ixs ad yini ‘aẓru’ ”◼1:42 Kifa - isem wanita d isem nnes s Tramit, u ‘Buṭrus’ d isem nnes s Tyunanit, minzi iwdan di temmurt di řweqt nni, tuɣa ssiwřen s Tramit, maca Tyunanit d iřes n Iyunaniyyen inni tuɣa ṣṣelṭen di temmurt ɣar ijj n řweqt qbeř dd-yusin Irumaniyyen.  ◘1:42 Mt. 16:18.

43 Tiwecca nnes tuɣa ixs Yasuɛ ad iraḥ ɣar Ljalil. Immeřqa ak-d Filippus, inna as: “Ḍfar ayi-dd!” 44 Filippus s yixef nnes tuɣa zi Bayt-Ṣayda zi tandint n Andrawus d Cimɛun. ◘1:44 Yḥ. 12:21. 45 Filippus yufa Natanayil, inna as: “Nufa wenni xef yura Musa di Ccariɛa uřa d Inabiyyen, aqa-t d Yasuɛ, mmis n Yusuf zi Nnaṣira.” ◘1:45 Amz. 3:15; 22:18; 26:4; 49:10; Aɛwd. 18:18; 2 Ṣm. 7:12; Ica. 4:2; 7:14; 9:5; 40:10, 11; 53:1-12; Irm. 23:5; 33:14; Ḥiz. 34:23; Dan. 9:24; Zak. 6:12; 9:9. 46 Natanayil inna as: “Ma ad taɣ izemmar ad dd-teffeɣ zi Nnaṣira ca n tcuni?” Filippus inna as: “Araḥ-dd, texzared!” 47 Yasuɛ iẓra Natanayil iggur-dd ɣares, inna xas: “Xzar, wa d ijj n mmis d tidett n Israil nni war dayes bu řɣecc!” 48 Natanayil inna as: “Manis d ayi tessned?” Yasuɛ inna as: “Ẓriɣ cek swadday i wartu qbeř ma ad ac dd-iřaɣa Filippus.” 49 Natanayil yarra-dd xas: “A Amseřmad inu, Cek d Mmis n AREBBI, Cek d Ajeǧid n Israil.” 50 Yasuɛ inna as: “Ma tumned s minzi d ac nniɣ: ‘Aqa ẓriɣ cek swadday i wartu’? Ad tẓared min iǧan ktar zi man aya.” 51 Inna as: “S tidett, s tidett, Necc ad awem iniɣ, zi ssa d tsawent ad tẓarem ajenna innurzem u lmalakat n AREBBI ttařyent hekkwant ɣar Mmis n bnadem!” ◘1:51 Amz. 28:12.