6
Aneggar n tmeẓriwt wiss amezwaru - Arebɛa n ikarruten
1 Necc ssgeɛɛdeɣ tiṭṭawin inu twařa nneɣni, u xzar, aqa arebɛa n ikarruten ffɣen-dd zi jar tnayen n idurar u idurar nni tuɣa d idurar n nnḥas. 2 Ɣar ukarru amezwaru tuɣa din iysan d izeggʷaɣen, ɣar ukarru wiss tnayen iysan d ibarcanen, 3 ɣar ukarru wiss třata iysan d icemřařen u ɣar ukarru wiss arebɛa iysan d iqarqacen, aqa aten d iysan jehden. 4 Necc arriɣ-dd, nniɣ i lmalak nni kidi issawařen: “Min ɛnan ina, a sidi inu?”
5 Yarra-dd lmalak, inna ayi: “Ina d arebɛa n isemmiḍen n ujenna nni dd-itteffɣen zi mani bedden zzat i SIDI n marra tammurt. 6 Inni s iysan ibarcanen ad ffɣen ɣar temmurt n Ccamal u iysan icemřařen ad ten ḍeffaren, uca iysan iqarqacen ad ffɣen ɣar temmurt n Ljanub.” 7 Iysan ijehden ffɣen, arzun ad ẓwan tammurt, maɣar Netta inna: “Ffɣem, ẓwam tammurt!” U nitni ẓwan temmurt. 8 Netta iřaɣa ayi-dd, inna: “Xzar, iysan nni iffɣen ɣar temmurt n Ccamal, aqa ssareyyḥen Arruḥ inu di temmurt n Ccamal.” ◼6:8 ssareyyḥen Arruḥ inu - man aya ixs ad yini belli řḥukm nni ssiwḍen iysan ibarcanen x Temmurt n Ccamal issjjiwen Arruḥ n Arebbi. Aqa řḥakamat nnes iseggden umi Netta d Amsegged.
Ttaj i ukehhan ameqqran
9 Yusa-dd ɣari wawař n SIDI, inna: 10 “Ksi tiwhibin zeg ayt n lmenfa, zi Ḥalim, Ṭubiya d Yadaɛya u ruḥ dinni uřa d cek deg wass nni u adef ɣar taddart n Yuciya, mmis n Ṣafanya, ɣar taddart i ɣares dd-yusin zi Babil. ◼6:10 Ṣafanya - isem-a wanita ixs ad yini ‘wenni t issnuffaren SIDI’. 11 Ksi nnuqart d wureɣ, egg zzaysen ttijan u sars i-ten x uzeǧif n Yahucaɛ, mmis n Yahuṣadaq, arrays n ikehhanen, 12 u siweř akides, ini as:
‘Ammu i iqqar SIDI n řɛeskarat: Xzar, ijj n weryaz, ‘AƔEDDU’ d Isem nnes. Netta ad dd-iffeɣ zeg wemcan nnes u Netta ad ibna Zzawect Tameqqrant n SIDI. 13 Netta ad ibna Zzawect Tameqqrant n SIDI u ad yarḍ lɛaḍama. Netta ad iqqim u ad iḥkem x řɛarc nnes u Netta ad yiři d akehhan x řɛarc nnes u ad yiři jar asen ccwar s řehna.’
14 Ttijan ad iřin i Ḥalim, Ṭubiya, Yadaɛya d Ḥayn, mmis n Ṣafanya, d řidaret di Zzawect Tameqqrant n SIDI. ◼6:14 Ḥayn - ixs ad yini ‘řxaḍar’. 15 Zi řaggʷaj ad dd-asen iwdan u nitni ad bnan Zzawect Tameqqrant n SIDI u kenniw ad tessnem aqa SIDI n řɛeskarat issekk ayi-dd ɣarwem. Aya ad imsar, mařa kenniw tᵉttesřam s tidett ɣar tmijja n SIDI, AREBBI nwem.” ◘6:15 Ḥag. 2:7
◼6:8 6:8 ssareyyḥen Arruḥ inu - man aya ixs ad yini belli řḥukm nni ssiwḍen iysan ibarcanen x Temmurt n Ccamal issjjiwen Arruḥ n Arebbi. Aqa řḥakamat nnes iseggden umi Netta d Amsegged.
◼6:10 6:10 Ṣafanya - isem-a wanita ixs ad yini ‘wenni t issnuffaren SIDI’.
◼6:14 6:14 Ḥayn - ixs ad yini ‘řxaḍar’.