1 Imsar deg useggʷas wiss arebɛa n ujeǧid Dariyus, řami dd-yusa wawař n SIDI ɣar Zakariyya, deg wass wiss arebɛa n uyur wiss tesɛa, deg uyur n Kisluw, 2 aqa issekk řgens n Bayt-Il Caraṣir d Rajam-Malik d yeryazen nnes maḥend ad ttaren arḍa zzat i wudem n SIDI, 3 umi ssawařen ak-d ikehhanen, inni iǧan di Taddart n SIDI n řɛeskarat, u ak-d inabiyyen, qqaren: “Ma ad arniɣ deg uyur wiss xemsa ad ruɣ u ad ɛezřeɣ ixef inu am mammec t tteggeɣ řexxu ɛad aṭṭas n iseggʷusa?”

4 Yusa-dd ɣari wawař n SIDI n řɛeskarat, inna:

5 “Siweř ak-d marra řgens u ak-d ikehhanen, ini: Řami kenniw tẓummem u tewtim x idmaren nwem zeg wecḍan, deg uyur wiss xemsa u deg uyur wiss sebɛa, u man aya řexxu ɛad aṭṭas n iseggʷusa, ma tẓummem kenniw xenni i Necc, s tidett i Necc? 6 Řami teccim u řami teswim, ma war ticcim i yixef nwem u ma war tiswim i yixef nwem? 7 Ma war tuɣi iřiq ad yiři zi ssibbet n wawařen i ijja SIDI ad ttwabarrḥen s ufus n inabiyyen n zic umi tuɣa teqqim Urcalim ɛad s imezdaɣ di řhudnet ak-d tneddam i d as dd-innḍen, u řami tuɣa ɛad imezdaɣ di Tammurt n Ljanub u di Temmurt Iwaṭan?”

8 Yusa-dd wawař n SIDI ɣar Zakariyya, inna:

9 “Ammu i iqqar SIDI n řɛeskarat, i iqqaren: ‘Ḥekmem s ijj n řḥukm iseggden u ggem s tmexsiwt icewwaren d arreḥmet ijj ak-d wenneɣni. 10 War ḥeṣṣarem tajjač uřa d ayujiř niɣ řbarrani uřa d ameẓřuḍ, u war ttejjim uřa d ijj ad ixarreṣ di řɣar ḍidd i umas deg wuř nnes!’ ◘7:10 Uf. 22:22 11 Maca nitni ugin ad wcen taynit u nitni ggin marra s řmeqřub u bellɛen imezzuɣen nsen, ḥima war ttesřin. 12 Nitni ssqesḥen uř nsen am yijj n umesmir, maḥend war ttesřin Ccariɛa d wawařen nni dd-issekk SIDI n řɛeskarat s Arruḥ nnes s ufus n inabiyyen n zic, ařami dd-yusa ijj n uduqqez d ameqqran n weɣḍab n SIDI n řɛeskarat. 13 Aqa imsar am mammec iřaɣa Netta zic, maca nitni war sřin ca. S uyenni řaɣan řexxu nitni u Necc war ttesřiɣ ca, iqqar SIDI n řɛeskarat. ◘7:13 Awřn. 1:28; Ica. 1:15; Irm. 11:11; 14:12 14 Necc ad ten zuzzareɣ x marra řegnus nni tuɣa war ssinen u awarni asen ad tᵉttwaxarreb temmurt, uřa d ijj ɛad war xas iẓekkwi u uřa d ijj ɛad war dd-iddikkwiř. Nitni arrin tammurt iɛizzen d ict n řqecɛet n unexřiɛ.’ ”