1 Cawul yarḍa x řmewt nnes uca icarc deg uneqqi nnes. Deg wussan nni imsar ijj n umarret imɣar x tmesmunt di Urcalim u marra ttwazuzzaren ɣar dcurat n Yahudiyya d Samarya, mɣir rrusul lla. ◘8:1 Řex. 11:19; 22:20. 2 Ca n yeryazen yumnen ksin t, arbun Stifanus ɣar wenḍeř uca ggin xas ijj n wecḍan ameqqran. ◘8:2 Amz. 23:2; 50:10; 2 Ṣm. 3:31 3 Maca Cawul tuɣa ittdarrec tamesmunt xmi ittadef ɣar tudrin, ittjarra iryazen d temɣarin, ineddeh i-ten ɣar řeḥbes. ◘8:3 Řex. 9:1; 22:4; 26:9; 1 Kur. 15:9; Gal. 1:13; 1 Tim. 1:13.

4 Inni ittwazuzzaren tuɣa gguren, ttennḍen, ttbarrḥen s Wawař n AREBBI. ◘8:4 Mt. 10:23; Řex. 11:19. 5 Amu ihwa-dd Filippus ɛawed ɣar ict n tendint n Isamariyyen, ibarreḥ i-ten s Lmasiḥ. 6 Umi sřin i wawař nnes, ttwassqenɛen iwdan i tuɣa ittesřan s marra min ittwannan zi Filippus, maɣar ẓrin řeɛřamat i igga. 7 Minzi aṭṭas n yinni ittwaṭṭfen zi řaryaḥ imengas, sɣuyyun s tmijja ijehden uca ffɣen zzaysen. Inneɣni i tuɣa d ineɛḍaben d iqejdaḥen ttwassgenfan. ◘8:7 Mk. 16:17; Řex. 5:16; 16:18; 19:11. 8 Tuɣa din ict n řefraḥet temɣar di tendint nni.

9 Tuɣa din ijj n weryaz, qqaren as Cimun, tuɣa izeddeɣ di tendint nni aṭṭas zeg wami. Netta tuɣa issɣekkwa řgens n Isamariyyen s tseḥḥart nnes, ittbarren x yixef nnes, inna: “Necc, aqa necc d wenni imɣaren!” ◘8:9 Řex. 13:6. 10 Marra sřin ɣares, am umeẓyan, am umeqqran, nnan: “Wanita d jjehd imɣaren n AREBBI.” 11 Isseqneɛ i-ten marra s minzi tuɣa issarjef i-ten s ssḥur nnes aṭṭas zeg wami. 12 Maca umi yumnen di Filippus wenni tuɣa ittbarreḥ s Řexbar Aṣebḥan n Tgeldit n AREBBI u s Yisem n Siditneɣ Yasuɛ Lmasiḥ, ttwassɣeḍṣen nitni, am yeryazen am temɣarin. 13 Cimun s yixef nnes ɛawed yumen, ittwasseɣḍeṣ uca iqqim iḍeffar Filippus. Řami iẓra lmuɛjizat d řeɛřamat imɣaren i imsaren s ufus nnes, itebhet, yarjef.

14 Umi sřin rrusul inni iǧan di Urcalim belli řgens n Samarya iqbeř Awař n AREBBI, ssekken ɣarsen Cimɛun Buṭrus d Yuḥanna. 15 Nitni hwan-dd ɣarsen, ẓẓuǧen asen ḥima ad ṭṭfen Arruḥ Iqeddsen, 16 minzi Wanita tuɣa ɛad war dd-yusi x uřa d ijj zzaysen, tuɣa ttwassɣeḍṣen waha s Yisem n Sidi Yasuɛ. 17 Xenni ssarsen xasen ifassen uca nitni ṭṭfen Arruḥ Iqeddsen. ◘8:17 Řex. 6:6; 13:3; 19:6; 1 Tim. 4:14; 5:22; 2 Tim. 1:6.

18 Umi iẓra Cimun belli s usarsi n ifassen n rrusul immewc asen Arruḥ Iqeddsen, xenni ixs ad asen iwc tmenyat n nnuqart, 19 inna: “Ewc ayi ɛawed ṣṣulṭa-ya, ḥima man wen i x ɣa ssarseɣ afus inu, ad iqbeř Arruḥ Iqeddsen.” 20 Maca inna as Cimɛun Buṭrus: “Ad tᵉtteḥḥa nnuqart nnec akidek, minzi ittɣiř ac ad tkesbed tawhibt n AREBBI s wagřa n ddunect! ◘8:20 Mt. 10:8. 21 War ɣarek bu tesɣart uřa d ca di l’iman wanita, minzi uř nnec war iǧi isegged zzat i AREBBI. 22 Tub zi tuɛeffna nnec uca ttar zi AREBBI maḥend ad xak tᵉttwaɣfar teḥraymect-a n wuř nnec, 23 minzi ttwařiɣ aqa cek tewḍid-dd deg ijj n uḥrir d amerzag u deg ijj n uceddi n tuɛeffna.” 24 Yarra-dd Cimun, inna: “Ttarem i AREBBI xafi ḥima war dd-ittis xafi ca zi min tennam.”

25 Awarni řami cehden Cimɛun d Yuḥanna u ssřemden Awař n AREBBI, ɛeqben ɣar Urcalim, barrḥen s Řexbar Aṣebḥan deg waṭṭas n ředcur n Isamariyyen.

26 Uca lmalak n SIDI issiweř ak-d Filippus, inna: “Kkar, truḥed ɣar ljanub deg webrid n řexřa i dd-ihwan zi Urcalim ɣar Ɣazza.” 27 Ikkar iruḥ, uca immeřqa ak-d ijj n řewzir zi temmurt n Kuc, ijj n řewzir n Kandaki, tajeǧidt n ayt n Kuc. Tuɣa-t ɣares ṣṣulṭa x marra řeknuz nnes, yusa-dd ɣar Urcalim ḥima ad din iɛbed. ◼8:27 tammurt n Kuc - deg wussan nni tuɣa tammurt n Kuc tesswiẓẓeḍ ixef nnes zi temmurt n Itiyupiya d Ssudan ař tammurt n Miṣra. 28 Umi dd-iɛqeb, iqqim x ijj n ukarru, iqqar deg wedlis n unabi Icaɛya.

29 Xenni inna Arruḥ i Filippus: “Zid, tmuned ak-d ukarru-ya.” 30 Iqarreb-dd ɣares Filippus, isřa as min iqqar zeg wedlis n unabi Icaɛya, inna as: “Ma tfehmed min teqqared?” 31 Inna as: “Mammec zemmareɣ ad fehmeɣ mařa war din ḥed i d ayi ɣa issefhemen?” Uca ittar zi Filippus maḥend ad yenya uca ad kis iqqim. 32 Udem i tuɣa iqqar zeg Wedlis d wa:

“Amecnaw izmar ittwandeh

ɣar řgurnet i tɣarṣt,

amecnaw texsi tegnu

qibač i wenni tt iǧasen,

war yarzim Netta aqemmum nnes. ◘8:32 Ica. 53:7-8

33 Deg useḥqar nnes ittwakkes

zi tmeḥbast u zi řḥukm.

Wi ɣa iɛawden x dduriyet nnes?

Minzi tudart nnes tᵉttwassgeɛɛed

zi temmurt.”

34 Yarra-dd řewzir x Filippus, inna: “Ad cek sseqsiɣ, x wi xef issawař unabi man aya, ma x yixef nnes niɣ x ijjen nneɣni?” 35 Yarzem Filippus aqemmum nnes, uca ibda ittbarreḥ as s Řexbar Aṣebḥan n Siditneɣ Yasuɛ s wawař-a zi Tira Iqeddsen. ◘8:35 Lk. 24:45.

36 Am tuɣa gguren nitni deg webrid, iwḍen ɣar ijj n wemcan mani tuɣa ǧan waman. Inna řewzir: “Xzar, aqa din aman. Min dayi iṭṭfen war ttwasseɣḍaṣeɣ?” ◘8:36 Řex. 10:47. 37 Inna Filippus: “Mařa tumned s wuř nnec marra, tḥeǧeř!” Uca netta yarra-dd, inna: “Umneɣ aqa Yasuɛ Lmasiḥ d Mmis n AREBBI.” 38 Yumur ad ibedd ukarru, hwan tnayen idsen deg waman uca Filippus isseɣḍeṣ řewziř. 39 Ařami dd-geɛɛden zeg waman, ixḍef Arruḥ n SIDI Filippus. Uca řewzir war t iẓri ɛad, maca iruḥ deg webrid nnes s řefraḥet. 40 Maca Filippus ittwaf di Acdud u ssenni ittcuqa di temmurt, ittbarreḥ s Řexbar Aṣebḥan di marra tineddam ařami dd-yiweḍ ɣar Qayṣariya.