1 Umi iɛdu ssebt, tesɣa Maryam n Majdala d Maryam, yemmas n Yaɛqub, d Salumi řeɛṭur ḥima ad t dehnent. ◘16:1 [Mt. 28:1-8; Lk. 24:1-12; Yḥ. 20:1-10] — Mt. 28:1; Lk. 24:1; Yḥ. 20:1. 2 Ɣar ṣṣbeḥ zic deg wass amezwar n ssimana iwḍent-i-dd ɣar wenḍeř, ařami dd-tenqar tfuct. 3 Nnant jar asent: “Wi d aneɣ i ɣa isseqnunnyen taṣḍart nni iǧan x wadaf n wenḍeř?” 4 Řami xzarent, ẓrint aqa taṣḍart tᵉttwasseqnunni zeg wenḍeř, waxxa tuɣa temɣar aṭṭas. 5 Řami udfent ɣar yifři n wenḍeř, ẓrint ijj n ubřiɣ iqqim ɣar uɣezdis afusi, yarḍ arruḍ d acemřař, uca nitenti nnxeřɛent. ◘16:5 Mt. 28:2; Yḥ. 20:12. 6 Maca netta inna asent: “War ttnexřiɛent ca! Kennint tarezzunt x Yasuɛ Nnaṣiri wenni ittwaṣellben. Aqa Netta ikkar, war da iǧi, xzarent, aqa amcan mani t ssarsen. ◘16:6 Mt. 28:5; Lk. 24:5. 7 Maca ruḥent, inint i imeḥḍaren nnes uřa i Buṭrus, aqa ad awem izwar ɣar Ljalil. Dinni ad t tẓarem am mammec tuɣa i d awem inna.” ◘16:7 Mt. 26:32; 28:10; Mk. 14:28; Řex. 1:3; 13:31; 1 Kur. 15:5. 8 Ffɣent deɣya uca arewřent zeg wenḍeř, minzi tqebs i-tent tarjijit d ddehcan, uca war t nnint i ḥed, minzi tuɣa ggʷedent. ◘16:8 Mt. 28:8; Lk. 24:9; Yḥ. 20:18.

9 Ɣar ṣṣbeḥ zic deg wass amezwar n ssimana ikkar-dd uca iḍhar-dd d amezwaru i Maryam n Majdala, tenni zi tuɣa issuffeɣ sebɛa n ccwaṭen. ◘16:9 [Mt. 28:9-10; Yḥ. 20:11-18; Lk. 24:13-35] — Lk. 8:2; Yḥ. 20:14, 16. 10 Tanita truḥ uca txebbar aya i yinni tuɣa akides iǧan, inni tuɣa iceḍnen u ttrun. 11 Řami ina sřin belli Netta aqa iddar uca iban asent, war zzaysent uminen. ◘16:11 Mt. 28: 12 Awarni aya iban-dd s yijj n waddud nneɣni i tnayen zzaysen, umi tuɣa gguren nitni ɣar ijj n dcar. ◘16:12 Lk. 24:13. 13 Uřa d ina ruḥen ɛawed uca xebbaren inneɣni, maca war uminen uřa d ina.

14 Ɣar uneggar iban-dd i ḥiṭac ařami tuɣa qqimen ɣar ṭṭabřa uca iɛayar i-ten zi ssibbet n tikkest n l’iman nsen u zi ssibbet n řeqsaḥet n wuřawen nsen, minzi war uminen zeg inni t iẓrin awarni řami dd-ittwassnekkar Netta.

15 Inna asen: “Ruḥem ɣar ddunect marra, barrḥem s Řexbar Aṣebḥan di marra min dd-ittwaxeřqen. ◘16:15 [Mt. 28:16-20; Lk. 24:36-49; Yḥ. 20:19-23; Uf. 1:6-8] — Lk. 24:36; Yḥ. 15:16; 20:19; 1 Kur. 15:5. 16 Wenni yuminen u ittwasseɣḍeṣ, aqa iddar, maca wenni war yuminen, aqa ittwaḥaseb. ◘16:16 Yḥ. 3:18; 12:48. 17 Tina d řeɛřamat i ɣa iḍfaren inni yuminen: aqa nitni ad ssuffɣen ccwaṭen s Yisem inu, ad ssiwřen s iřsawen n jdid, ◘16:17 Lk. 10:17; Řex. 2:4; 5:16; 8:7; 10:46; 16:18; 19:6, 12. 18 ad ksin ifiɣran s ifassen nsen u mařa swin min ineqqen, war ten iḍḍarri ca man aya, uca ad ssarsen ifassen nsen x imehřac, ad ggenfan.” ◘16:18 Lk. 10:19; Řex. 28:5, 8.

19 Awarni řami kidsen issiweř, immeksi Siditneɣ Yasuɛ ɣar ujenna uca issɣim Ixef nnes x ufusi n AREBBI. ◘16:19 [Lk. 24:50-53; Uf. 1:9-11] — Lk. 24:50, 51; Řex. 1:9. 20 Maca nitni ffɣen uca barrḥen di kuř amcan, u Siditneɣ tuɣa iɛawen i-ten uca issars řxeṭ nnes x wawařen nsen s řeɛřamat i yeggin. Amin.

Aneggar n L’Injil Iqeddsen am mammec t ibarreḥ Markus. ◘16:20 Řex. 1:2; 14:3; 1 Tim. 3:16; Ɛbr. 2:4.