1 “NECC d Tazayart n tidett, Baba d bab n weḥwic n tzayart. 2 Kuř taseṭṭa dayi i war itticen řɣiǧet, ad tt ikkes, uca kuř taseṭṭa i dd-ittawyen řɣiǧet, ad tt issizdeg, ḥima ad tarni di řɣiǧet. ◘15:2 Mt. 15:13. 3 Kenniw aqa tᵉttwassizedgem zi ssibbet n wawař i d awem nniɣ. ◘15:3 Yḥ. 13:10. 4 Qqimem dayi, am mammec Necc aqa ayi daywem. Am tseṭṭa i war izemmaren ad dd-tawyi řɣiǧet zeg ixef nnes mařa war teqqim di tzayart, amya uřa d kenniw, mɣir mařa teqqimem dayi. 5 NECC d Tazayart, kenniw d tiseḍwin. Wenni dayi i ɣa iqqimen u Necc dayes, netta ad dd-yawi řɣiǧet aṭṭas, minzi břa zzayi war tzemmarem ad teggem walu. 6 Mařa ca n yijjen war dayi iqqim, ad immenḍar ɣar barra am tseṭṭa tuẓeɣ, xenni ad tt yarwen, ad tt nḍaren di tmessi, ad yareɣ. ◘15:6 Ḥiz. 15:2-8; Mt. 3:10; 7:19; Kul. 1:23. 7 Maca mařa teqqimem dayi uca awařen inu ad daywem qqimen, ttarem min texsem uca ad ɣarwem yiři. ◘15:7 Irm. 29:12; Mt. 7:7; 21:22; Mk. 11:24; Lk. 11:9; Yḥ. 14:13; 16:24; Yaɛ. 1:5; 1 Yḥ. 3:22; 5:14. 8 Zi man aya ad ittwassɛuǧ Baba, xmi i dd ɣa tawyem aṭṭas n řɣiǧet uca ad tiřim d imeḥḍaren inu.

9 Am mammec Baba tuɣa ittexs ayi, ammu uřa d Necc tuɣa ttexseɣ kenniw. Qqimem di tayri inu. 10 Mařa tᵉṭṭfem di tweṣṣa inu, ad teqqimem di tayri inu, am mammec Necc tuɣa ttᵉṭṭfeɣ di tweṣṣa n Baba uca ttɣimeɣ di tayri nnes. ◘15:10 Yḥ. 14:15, 21, 23; 1 Yḥ. 5:3.

11 Nniɣ awem man aya, ḥima ad daywem tiři řefraḥet inu uca ḥima ad tᵉttwakemmeř řefraḥet nwem. 12 Tawṣeyyet inu d tanita: aqa ad texsem ijjen wenneɣni am mammec Necc tuɣa xseɣ kenniw. ◘15:12 Lawi 19:18; Mt. 22:39; Yḥ. 13:34; Afa. 5:2; 1 Ts. 4:9; 1 Bṭ. 4:8; 1 Yḥ. 3:23; 4:21. 13 Uřa d ijj war ɣares bu tayri tameqqrant x tanita: belli ca n yijjen ad iwc tudart nnes i imeddukkař nnes. ◘15:13 Rum. 5:7; Afa. 5:2; 1 Yḥ. 3:16. 14 Kenniw d imeddukkař inu, mařa teggim marra min kenniw weṣṣiɣ. ◘15:14 Mt. 12:50; 2 Kur. 5:16; Gal. 5:6; 6:15; Kul. 3:11. 15 War ttɛiwideɣ ad awem semmiɣ ‘imsexxaren’, minzi amsexxar war issin min ittegg sidis. Maca Necc tuɣa ttřaɣiɣ awem d ‘imeddukkař inu!’, minzi Necc ssecneɣ kenniw marra min sřiɣ zi Baba. ◘15:15 Yḥ. 8:26. 16 War iǧi d kenniw i d ayi ixḍaren, maca d Necc i kenniw ixḍaren uca Necc ggiɣ kenniw ḥima ad traḥem, ad dd-tawyem řɣiǧet u ḥima ad teqqim řɣiǧet nwem, ḥima marra min ɣa tᵉttarem zi Baba s Yisem inu, ad awem t iwc Netta. ◘15:16 Mt. 28:19; Mk. 16:15; Yḥ. 13:18; Afa. 1:4; Kul. 1:6. 17 D man aya i zi kenniw umureɣ, ḥima ad texsem ijjen wenneɣni.”

18 “Mařa ddunect ad kenniw tcarh, snem aqa tcarh ayi qbeř kenniw. ◘15:18 1 Yḥ. 3:13. 19 Mařa aqa kenniw zi ddunect, iři aqa ddunect tuɣa tᵉttexs inni zzayes. Maca minzi kenniw war teǧim ca zi ddunect, maca Necc ixḍareɣ kenniw zi ddunect, s uyenni tcarreh ddunect kenniw. ◘15:19 Yḥ. 17:14; Gal. 1:10. 20 Ɛeqřem awař i d awem nniɣ: ‘Amsexxar war yuɛři x sidis!’ Mařa darracen ayi, ad kenniw darrcen ɛawed. Mařa ṭṭfen deg wawař inu, ad ṭṭfen ɛawed deg wawař nwem. ◘15:20 Mt. 10:24; 24:9; Lk. 6:40; Yḥ. 13:16; 16:2. 21 Maca ad zzaywem ggen man aya marra di ssibbet n Yisem inu, minzi nitni war ssinen ca Wenni d ayi dd-issekken. ◘15:21 Mt. 10:22; Yḥ. 16:3. 22 Mařa war dd-usiɣ u war kisen ssiwřeɣ, ad yiři war ɣarsen bu ddnub. Maca řexxu war ɣarsen bu smaḥet x ddnub nsen. ◘15:22 Rum. 4:15; 5:20. 23 Wenni d ayi icarrhen, ad icarh uřa d Baba. 24 Mařa war ggiɣ zzat i tiṭṭawin nsen řexdayem i war tent yeggi uřa d ijj bnadem nneɣni, ad yiři war ɣarsen bu ddnub. Maca řexxu ẓrin tent, carhen ayi Necc uřa d Baba. ◘15:24 Yḥ. 10:37. 25 S uya ad ittwakemmeř wawař i yuran di Ccariɛa nsen: ‘Carhen ayi x walu’. ◘15:25 Izhd. 35:19; 69:5.

26 Xmi dd ɣa yas Umseṣřaḥ, wenni ɣarwem dd ɣa ssekkeɣ zi Baba, Arruḥ n tidett i dd-yusin zi ɣar Baba, xenni wanita ad ayi iched. ◘15:26 Lk. 24:49; Yḥ. 14:26; 16:7; Řex. 5:32. 27 Uca ad tcehdem uřa d kenniw, minzi tuɣa kenniw akidi zeg umezwaru.” ◘15:27 Řex. 1:8, 21; 5:32.