1 “Aqa ssiwřeɣ akidwem aya, ḥima war ttenqarḍem. 2 Ad kenniw ssuffɣen zi temzidawin nsen. Iwa, tasaɛɛet ad dd-tas umi kuř ijjen wenni kenniw i ɣa inɣen, ad as ittɣiř aqa iwca ict n tewhibt i AREBBI. ◘16:2 Yḥ. 9:22, 34; 12:42. 3 Ad zzaywem ggen man aya, minzi nitni war ssinen Baba uřa d Necc. ◘16:3 Yḥ. 15:21; 1 Kur. 2:8. 4 Maca aqa nniɣ awem man aya, ḥima, xmi i dd ɣa tas tsaɛɛet, xenni ad tɛeqřem x man aya. Necc war daywem nniɣ ca man aya qbeř, minzi Necc tuɣa ayi ɛad akidwem. ◘16:4 Yḥ. 13:19; 14:29. 5 Maca řexxu ad raḥeɣ ɣar Wenni d ayi dd-issekken, maca uřa d ijj zzaywem war d ayi isseqsi: ‘Mani ɣa traḥed?’ 6 Maɣar minzi nniɣ awem man aya, aqa acḍan iccur uřawen nwem. 7 Maca Necc ad awem iniɣ tidett: Ḥsen awem ad raḥeɣ, maɣar mařa war ruḥeɣ ca, war ɣarwem dd-ittis Umseṣřaḥ. Mařa ruḥeɣ, ad awem t-i-dd-ssekkeɣ. ◘16:7 Lk. 24:49; Yḥ. 14:26; 15:26. 8 Řami dd-yusa wanita, ad isseqneɛ ddunect x ddnub, x tsegda u x řḥukm. 9 X ddnub minzi nitni war zzayi uminen, 10 x tsegda, minzi Necc ad raḥeɣ ɣar Baba uca war d ayi tẓarrem ɛad, 11 uca x řḥukm, minzi ameqqran n ddunect-a aqa ittwaḥaseb. ◘16:11 Yḥ. 12:31; 14:30; Afa. 2:2; Kul. 2:15.

12 Ɣari aṭṭas min daywem i ɣa iniɣ, maca řexxu war tzemmarem ad t teksim. 13 Maca řami dd-yusa Arruḥ n tidett, ad kenniw indeh di marra tidett, minzi Netta war issiwiř ca zeg Ixef nnes, maca marra min ɣa isřa, ad zzayes issiweř, uca ad awem isscen timesřayin i dd ɣa yasen. ◘16:13 Yḥ. 12:49; 14:26 14 Netta ad ayi issɛuǧ, minzi ad iksi zi min ɣari uca ad kenniw issargeb zzayes. 15 Marra min iǧan ɣar Baba, aqa-t inu. S uyenni nniɣ, belli Netta ad iksi zi min ɣari uca ad kenniw tt issargeb.” ◘16:15 Yḥ. 17:10.

16 “War ittɣimi ca uca war d ayi tẓarrem ɛad, u xenni ɛawed war ittɣimi ca uca ad ayi tẓarem, minzi Necc ad raḥeɣ ɣar Baba.” ◘16:16 Yḥ. 7:33.

17 Imeḥḍaren nnes nnan jar asen: “Manawya min d aneɣ inna: ‘War ittɣimi ca uca war d ayi tẓarrem ɛad u xenni ɛawed war ittɣimi ca uca ad ayi tẓarem!’ u: ‘Necc ad raḥeɣ ɣar Baba’?” 18 Uca nitni nnan: “Manawya min iqqar: ‘War ittɣimi ca’? War nessin ca min xef issawař.” 19 Issen Yasuɛ min xsen ad t sseqsan, inna asen: “Ma temmseqsam minzi nniɣ: ‘War ittɣimi ca uca war d ayi tẓarrem ɛad u xenni ɛawed war ittɣimi ca uca ad ayi tẓarem’?”

20 “S tidett, s tidett, Necc ad awem iniɣ: Kenniw ad trum, ad tɛebbsem, maca ddunect ad tfarḥ. Kenniw ad tceḍnem, maca acḍan nwem ad idweř d řefraḥet. 21 Tamɣart, xmi ɣa taruw, ad dayes yiři řeḥriq, minzi tasaɛɛet nnes aqa tiweḍ-dd. Maca xmi dd ɣa taruw mmis, war tfekkar ca ɛad di řmeḥnet nnes s řefraḥet, minzi tarni-dd ijj n bnadem ɣar ddunect. ◘16:21 Ica. 26:17. 22 Uřa d kenniw aqa daywem acḍan řexxu, maca ad kenniw ẓareɣ ɛawed, uca ad farḥen wuřawen nwem uca uřa d ijj war zzaywem ittekkes řefraḥet nwem.

23 Deg wass nni war d ayi tᵉttarem ca. S tidett, s tidett, Necc ad awem iniɣ: Marra min ɣa tᵉttarem zi Baba s Yisem inu, ad awem t iwc. ◘16:23 Irm. 29:12; Mt. 7:7; 21:22; Mk. 11:24; Lk. 11:9; Yḥ. 14:13; 15:7; Yaɛ. 1:5; 1 Yḥ. 3:22; 5:14. 24 Ař i řexxu war tᵉttarem ca s Yisem inu. Ttarem, ad teksim, ḥima ad tiři řefraḥet nwem tekmeř.

25 Ssiwřeɣ awem x man aya s imedya, maca ad dd-taweḍ tsaɛɛet i di war ɣarwem i ɣa ssiwiřeɣ ɛad s imettiřen, maca ad awem barrḥeɣ x Baba s bṭayṭay. 26 Deg wass nni ad tᵉttarem s Yisem inu. Necc war d awem qqareɣ ca belli ad ttareɣ ca zi Baba di ṭṭweɛ nwem, 27 minzi Baba simant nnes ittexs kenniw, minzi kenniw tuɣa tᵉttexsem ayi uca aqa tumnem aqa Necc zi ɣar AREBBI i dd-ffɣeɣ. ◘16:27 Yḥ. 17:8. 28 Ffɣeɣ-dd zi Baba, usiɣ-dd ɣar ddunect. Ad jjeɣ ɛawed ddunect uca ad raḥeɣ ɣar Baba.” ◘16:28 Yḥ. 13:3.

29 Nnan as imeḥḍaren nnes: “Aqa řexxu tessawařed s bṭayṭay, war tessiwiřed ca s uřa d ijj n umedya. 30 Řexxu nessen aqa tessned kuřci, war teḥdijed ad Cek isseqsa ḥed. Zi manawenni numen aqa Cek teffɣed-dd zi AREBBI.” ◘16:30 Yḥ. 21:17. 31 Yasuɛ yarra-dd xasen: “Ma řexxu tumnem? 32 Ad dd-taweḍ tsaɛɛet, aqa tiweḍ-dd, i di i ɣa tᵉttwazuzzarem, kuř ijj ad iṭṭef ɣar wemcan nnes, ad ayi tejjem weḥḥdi, maca Necc war ǧiɣ bu weḥḥdi, minzi Baba aqa-t akidi. ◘16:32 Zak. 13:7; Mt. 26:31; Mk. 14:27; Yḥ. 8:29; 14:10. 33 Aqa ssiwřeɣ akidwem s man aya, ḥima ad ɣarwem yiři řehna dayi. Di ddunect ad ɣarwem tiři řmeḥnet, maca ggem uř, Necc aqa ɣellbeɣ x ddunect.” ◘16:33 2 Ij. 6:16; 2 Im. 32:7; Ica. 9:5; Yḥ. 14:27; 16:33; Rum. 5:1; Afa. 2:13; Kul. 1:20; 1 Yḥ. 4:4