1 Xenni neccin, am nettwasegged s l’iman, aqa ad ɣarneɣ yiři řehna ak-d AREBBI s Siditneɣ Yasuɛ Lmasiḥ. ◘5:1 Ica. 32:17; Yḥ. 16:33; Afa. 2:13. 2 Maɣar zzayes idweř aneɣ-dd adaf s l’iman ɣar arḍa-ya min di nbedd, u nessemɣar deg usitem n uɛuǧi n AREBBI. ◘5:2 Yḥ. 10:9; 14:6; 1 Kur. 15:1; Afa. 2:18; 3:12; Ɛbr. 3:6; 10:19. 3 Maca war iǧi di man aya waha, maca nessemɣar ɛawed di řemḥayem, nessen belli řmeḥnet tᵉttaru-dd dayneɣ ṣṣbar, ◘5:3 Yaɛ. 1:3. 4 d ṣṣbar ad yawi taqeǧebt, uca taqeǧebt ad tawi asitem, 5 uca asitem war ittseḥcim ca, minzi tayri n AREBBI aqa tᵉttwafarreɣ deg wuřawen nneɣ s Arruḥ Iqeddsen i d aneɣ immewcen.

6 Di ssibbet n tuḍɛeft nneɣ, aqa immut Lmasiḥ di řweqt-a di ṭṭweɛ n iɛeffanen. ◘5:6 Afa. 2:1; Kul. 2:13; Ɛbr. 9:15; 1 Bṭ. 3:18. 7 S řweḥřan ad immet ḥed di ṭṭweɛ n ijj n uɛeffan, maca di ṭṭweɛ n iṣebḥanen ad taɣ izemmar ad izɛem ḥed ad immet. 8 Di man aya imřa aneɣ AREBBI tayri nnes, aqa Lmasiḥ immut di ṭṭweɛ nneɣ umi tuɣa aneɣ ɛad d imednab. ◘5:8 Ɛbr. 9:15; 1 Bṭ. 3:18. 9 Mecḥař ktar aqa nettwasegged řexxu s Idammen nnes uca nettwafekk zzayes zeg weɣḍab! 10 Minzi řami d aneɣ tuɣa d řɛedyan, ijja AREBBI ad isseṣřeḥ Ixef nnes akidneɣ s řmewt n Mmis, mecḥař qaɛ řexxu ad neddar s Tudart nnes, awarni řami zzayes nufa aṣřaḥ. 11 U war iǧi man aya waha, maca ad nessemɣar di AREBBI ɛawed s Siditneɣ Yasuɛ Lmasiḥ, wenni zi neksi řexxu aṣřaḥ.

12 Maɣar am mammec s yijj n bnadem yudef-dd ddenb ɣar ddunect uca s ddenb tudef-dd řmewt, ammu dd-tudef řmewt ɣar iwdan marra, minzi xḍan marra. ◘5:12 Amz. 2:17; 3:6; 1 Kur. 15:21. 13 Minzi qbeř ma tuɣa teǧa Ccariɛa, tuɣa ddenb di ddunect, maca ddenb war ittwaḥsib ca minzi war din teǧi Ccariɛa. 14 Maca řmewt tuɣa teḥkem zi Adam ař Musa uřa x yinni war ixḍin di ṣṣifet n uxeṭṭu i zi ixḍa Adam ak-d ccariɛa. Adam wenni d ṣṣifet n Wenni dd ɣa yasen.

15 Maca am mammec teǧi tmesřact s uweṭṭu, ammu war teǧi s tewhibt n arḍa. Minzi mařa mmuten aṭṭas x ssibbet n ijj n uxeṭṭu, mecḥař qaɛ i ɣa ifeyyeḍ arḍa n AREBBI d tewhibt nnes i waṭṭas s uyenni n Bnadem nni, Yasuɛ Lmasiḥ. 16 Tawhibt s arḍa war tᵉttiři am uxeṭṭu n yijjen. S minzi řḥukm yiwi-dd lḥisab zeg ijj n uxeṭṭu, maca tawhibt n arḍa tiwi-dd zeg waṭṭas n ddnub ɣar tsegda. 17 Minzi mařa s uxeṭṭu n ijjen aqa teḥkem řmewt, mecḥař qaɛ i ɣa ḥekmen di Tudart inni iksin afeyyeḍ n arḍa d tewhibt n tsegda s uyenni n bnadem nni, aqa-t d Yasuɛ Lmasiḥ.

18 Am mammec xenni s uxeṭṭu n ijjen, aqa idweř řḥukm i marra iwdan, ammu i ɣa tiři řeṣfayet ikemmřen i Tudart i marra iwdan s tsegda n Yijjen. 19 Minzi am s řmuɛṣiyyet n ijj n bnadem dewřen aṭṭas d imednab, ammu ɛawed s ṭṭaɛet n Ijjen ad dewřen aṭṭas d imseggaden. 20 Maca umi dd-tusa Ccariɛa, immarni ddenb, u mani immarni ddenb, immarni arḍa aṭṭas s waṭṭas, ◘5:20 Luik. 7:47; Yḥ. 15:22; Rum. 4:15; 7:8; Gal. 3:19 21 ḥima, am mammec iḥkem ddenb ař řmewt, ad iḥkem arḍa ɛawed s tsegda ař Tudart ittduman s Siditneɣ Yasuɛ Lmasiḥ.