1 S uyenni, a aytma imqeddasen, inni ittwařaɣan s třaɣit n ujenna, xzarem ɣar Rrasul wanita, ɣar Arrays n ikehhanen n cchadet nneɣ, Yasuɛ Lmasiḥ, ◼3:1 rrasul - niɣ ‘amazan’.  ◘3:1 Ɛbr. 4:14; 6:20; 8:1; 9:11. 2 wenni d amtiqqi i Wenni i-t-i-dd-issgeɛɛden, am mammec tuɣa Musa d amtiqqi di marra taddart nnes. ◘3:2 Řxř. 12:7. 3 Minzi aɛuǧi n Wanita d ameqqran s waṭṭas x wenni n Musa, am ccan n ubennay n taddart imɣar x ccan n řebni nnes. 4 Minzi marra taddart tᵉttwabna zeg ijjen, maca Wenni ibennan marra d AREBBI. ◘3:4 2 Kur. 5:17, 18; Afa. 2:10. 5 Tᵉttwawekkeř i Musa marra taddart nnes am i yijj n umsexxar, maḥend ad iched x tmesřayin min xef ɣa issiweř netta. ◘3:5 Aɛwd. 18:15, 18. 6 Maca Lmasiḥ am Mmis ittwagg x taddart nnes, u taddart nnes d neccin, mařa neqqim nᵉtteṭṭef di řaman u deg uɛuǧi n usitem nnes ař aneggar. ◘3:6 Rum. 5:2; 1 Kur. 3:16; 6:19; 2 Kur. 6:16; 1 Bṭ. 2:5.

7 Maca minzi Arruḥ Iqeddsen inna ...

“Aqa ass-a mařa tesřim tmijja nnes, ◘3:7 Izhd. 95:7; Ɛbr. 4:7.

8 war ttᵉsseqsiḥem ca uřawen nwem

maḥend ad t tesɛarem,

am inni iɣewwɣen,

am deg wass n ujarreb di řexřa, ◘3:8 Uf. 17:2, 7; Izhd. 95:8

9 umi d ayi jarrben řejdud nwem, qeǧben ayi,

am ẓrin timegga inu

arebɛin n iseggʷusa.

10 ... s uya ɛiffeɣ zi jjiř nni, nniɣ:

‘Wa d ijj n řgens i iweddaren deg wuř nnes

nitni war ssinen ca ibriden inu!’,

11 ařami jjuǧeɣ deg weɣḍab inu:

‘War dd-ttidfen ca ɣar arraḥet inu!’ ” ◘3:11 Řxř. 14:21-23; Aɛwd. 1:34; Izhd. 95:7-11.

12 S uyenni, a aytma, ḥḍam ḥima ɛemmarṣ war ittiři ḥed zzaywem ɣares uř d aɛeffan i war ittimnen umi ɣa taggʷejem x AREBBI iddaren, 13 maca qeǧbem ixef nwem kuř ass, ař ass umi qqaren: ‘Ass-a!’, ḥima uřa d ijj zzaywem war itteqsiḥ ca s uɣekkwi n ddenb. 14 Minzi nettwassmun aṭṭas ak-d Lmasiḥ mařa neqqim ncebbar zeg umezwar ař aneggar di Řɛahd-a i dayes řaman.

15 S uya ittwanna ammu:

“Aqa ass-a,

mařa tesřim řḥess n tmijja nnes,

war tesseqsiḥem ca uřawen nwem

maḥend ad t tesɛarem.” ◘3:15 Ɛbr. 3:7.

16 Xenni min iɛnan nitni inni isřin t, xenni ɣewwɣen? Ma war ǧin nitni marra d inni dd-iffɣen zi Miṣra s ufus n Musa? 17 Zi man wen iɛiff Netta xenni arebɛin n iseggʷusa? Ma war iǧi zeg yinni ixḍan, inni umi iwḍan iɣsan nsen di řexřa? ◘3:17 Řxř. 14:36; Izhd. 106:26; 1 Kur. 10:10; Yah. 5. 18 I umi ijjuǧ Netta, belli war dd-ttidfen ca ɣar arraḥet nnes? Ma war iǧi i yinni war d as ttiqqen? ◘3:18 Aɛwd. 1:34. 19 Aqa nettwařa belli nitni war zemmaren ad adfen x ssibbet n břa l’iman nsen.