1 A aytma, xseɣ ad tessnem, belli řejdud nneɣ tuɣa aten marra sadu useynu uca marra cuqen di řebḥar, ◘10:1 Uf. 13:21; 14:22; Řxř. 9:18; Aɛwd. 1:33; Yac. 4:23; Naḥ. 9:12, 19; Izhd. 78:13, 14; 105:39. 2 uca marra ttwassɣeḍṣen di Musa deg useynu u di řebḥar, ◘10:2 Uf. 13:20-22, 14:19, 20. 3 uca marra ccin macca taruḥect d ict, ◘10:3 Uf. 16:15. 4 uca marra swin tisessit taruhect d ict, minzi nitni swin zeg weẓru n Arruḥ wenni tuɣa akidsen, u aẓru nni tuɣa-t d Lmasiḥ. ◘10:4 Uf. 17:6; Řxř. 20:11; Izhd. 78:15; Yḥ. 7:37-39. 5 Maca AREBBI tuɣa war yarḍi x wezyen ameqqran zzaysen, minzi aqa aten wḍan di řexřa. ◘10:5 Řxř. 26:65.

6 Man aya imsar d lmital i neccin, ḥima war dayneɣ ittiři mmeẓri di min iɛeffnen, am mammec tuɣa nitni daysen meẓri. ◘10:6 Řxř. 11:4,33; Izhd. 106:14. 7 Ejj aneɣ war ndikkwiř ca ad neɛbed l’aṣnam, am ca zzaysen, am mammec tura:

“Řgens iqqim ḥima ad icc ad issu

uca kkaren ḥima ad iraren.” ◘10:7 Uf. 32:6.

8 War iɛeddeř ad nessefsad ixef nneɣ, am ca zzaysen. Aqa mmuten din třata u-ɛicrin-ařef deg ijj n wass. ◘10:8 Řxř. 25:1, 9; Izhd. 106:29. 9 War iɛeddeř ad njarreb Lmasiḥ, am mammec jarrben t ca zzaysen uca ttwahelken s ifiɣran. ◘10:9 Řxř. 21:5; Izhd. 106:14. 10 War iɛeddeř ɛawed ad nessfixex am mammec ca zzaysen ssfixixen, uca xenni ttwahellken s ufus n umhellek. ◘10:10 Uf. 16:2; 17:2; Řxř. 14:36; Izhd. 106:25. 11 Marra min d asen imsaren, aqa t d lmital i neccin, uca tura d aɛřam i neccin mixef dd-yusa uneggar n zzmanat. ◘10:11 Rum. 15:4; 1 Kur. 9:10; Fil. 4:5; Ɛbr. 10:25.

12 S uyenni wenni umi ittɣiř aqa ibedd, ejj i-t ad iḥḍa war iweṭṭi. 13 War xawem ittekk ujarreb mɣir wenni i ɣa yawḍen ɣar iwdan. Maca AREBBI dayes řaman. Netta war kenniw ittejji ad tᵉttwajarrbem sennej i min tzemmarem, maca Netta ittic uffuɣ ak-d ujarreb nwem, ḥima ad tzemmarem ad tarbum aɣekkwi. ◘10:13 1 Kur. 1:8; 1 Ts. 5:24; 2 Bṭ. 2:9.

14 S uya, imɛizzen inu, arewřem zeg uɛbad i l’aṣnam. 15 Ssawařeɣ akidwem axmi ssawařeɣ ak-d imiɣisen. Ḥekmem kenniw xenni x min d awem qqareɣ. 16 Řkas n uqadi nni nettbarak, ma war iǧi d tamunt ak-d Idammen n Lmasiḥ? Aɣrum nni ntareẓẓa, ma war iǧi d tamunt ak-d Arrimet n Lmasiḥ? 17 Am mammec iǧa aɣrum d ijjen, ammu marra neccin d ict n Arrimet, minzi marra neccin neṭṭef zeg ijj n weɣrum. ◘10:17 Rum. 12:5; 1 Kur. 12:27.

18 Xzarem ɣar Israil ɛlaḥsab arrimet! Ma inni ittetten zi tɣarṣa war ɣarsen acrac ak-d uɛalṭar? ◼10:18 aɛalṭar - niɣ: ‘řmedbeḥ’. 19 Min ɣa iniɣ di man aya? Ma belli min immewcen d taɣarṣt i l’aṣnam d ca, niɣ belli l’aṣnam d ca? Lla. ◘10:19 1 Kur. 8:4. 20 Min wcin lkuffar d taɣarṣt, wehhben tt i ccwaṭen, war iǧi i AREBBI. Uca necc war xseɣ ad tcarcem ak-d ccwaṭen. ◼10:20 ccwaṭen - niɣ: ‘ccayaṭin’.  ◘10:20 Lawi 17:7; Aɛwd. 32:17. 21 War tzemmarem ad teswem řkas n Siditneɣ uřa d řkas n ccwaṭen, uca war tzemmarem ad tcarcem tazewḍa n Siditneɣ uřa d tazewḍa n ccwaṭen. ◼10:21 taẓewḍa - niɣ: ‘missa’. 22 Niɣ ad nessekkar tusmi n Siditneɣ? Ma nejhed xas neccin?

23 Marra ittḥeǧeř ayi, maca marra war ineffeɛ. Marra ittheǧeř, maca marra war ibenni. ◘10:23 1 Kur. 6:12. 24 Uřa d ijj war yarezzu ca tizi nnes waha, maca ejj kuř ijj ad yarzu ɛawed tenni n wenni d as yudsen. ◘10:24 1 Kur. 13:5; Fil. 2:4.

25 Marra min ittmenzan di ssuq n igezzaren, tzemmarem ad t teccem břa aseqsi di ṭṭweɛ n tnefsect, 26 minzi i SIDI umi ɣar teǧa temmurt d uɛemmar nnes. ◘10:26 Uf. 19:5; Izhd. 24:1; 50:12, 89:12. 27 Mařa ca n yijjen zeg lkuffar, iɛarḍ i kenniw u texsem ad traḥem, ccem zi marra min d awem i d ɣa issars, war tesseqsim ca x ssibbet n tnefsect. ◼10:27 tanefsect - niɣ: ‘ḍḍamir’.  ◘10:27 Lk. 10:7; 1 Kur. 8:7. 28 Maca mařa ḥed inna awem: “Degga ittwaɣarṣ i l’aṣnam!”, war zzayes tᵉttettem di ṭṭweɛ n wenni d awem iɛeřmen uřa di ṭṭweɛ n tnefsect. 29 Mařa necc nniɣ di ṭṭweɛ n ‘tnefsect’, war ɛniɣ tanefsect nwem, maca tenni n wenneɣni. Minzi mayemmi ɣa tᵉttwaḥakem třelli inu s tnefsect n wenneɣni? 30 Mařa necc carceɣ s uweqqar ɣar umensi, mayemmi ɣa ttwaceqqfeɣ di ssibbet mixef ttqadiɣ? ◘10:30 Rum. 14:6; 1 Tim. 4:3.

31 Xenni mařa tᵉttettem niɣ tsessem niɣ tᵉtteggem ca n řḥajjet nneɣni, ggem tt marra i uɛuǧi n AREBBI. ◘10:31 Kul. 3:17. 32 War ttiřim d taɛenkrift i Wudayen niɣ i Iramiyyen uřa i tmesmunt n AREBBI, ◘10:32 Rum. 14:13. 33 am mammec uřa d necc arezzuɣ ad dd-aseɣ ak-d marra di kuřci, war arezzuɣ min iǧan i tizi inu, maca min iǧan i tizi n waṭṭas, ḥima ad ɣarsen tiři Tudart. ◘10:33 1 Kur. 9:22.