13
Tayri
1 “Maɛlik necc ssawařeɣ
s iřsawen n iwdan d lmalakat,
maca war ɣari bu tayri,
aqa dewřeɣ d nnḥas ittentunen,
niɣ d aǧun iddendunen.
2 Maɛlik ɣari tawhibt maḥend ad nebbeɣ,
fehhmeɣ marra řesrar
u ɣari marra tussna d marra l’iman
ař d ssmuṭṭiyeɣ idurar,
maca war d ayi teǧi tayri,
xenni necc d walu i ǧiɣ. ◘13:2 Mt. 7:22; 17:20; 21:21; Mk. 11:23; Lk. 17:6; Rum. 12:7.
3 Meɛlik bḍiɣ marra agřa inu
d macca x imezřaḍ,
maɛlik wciɣ arrimet inu
ḥima ad tt sscemḍen,
maca war dayi teǧi tayri,
war d ayi tneffeɛ di walu.
4 Tayri teǧa ɣares ttasiɛ n řxaḍar d řeḍrafet,
tayri war dayes bu tusmi,
tayri war tᵉttfeyyec s yixef nnes,
5 Tayri war tᵉttegg bu řefḍiḥet,
war tarezzu tizi nnes,
war tᵉttwassarzag,
uca war tᵉttxemmam di min iǧan d aɛeffan. ◘13:5 1 Kur. 10:24; Fil. 2:4.
6 aqa war tfarreḥ ca zi řɣecc,
maca tfarreḥ zi tidett. ◘13:6 2 Yḥ. 4.
7 Aqa tṣebber di marra,
tᵉttamen di marra,
tessatem marra,
uca tarebbu marra.
8 Tayri war tfenni ɛemmarṣ,
maca awařen n nnubuwat
ad ɣarsen yiři uneggar,
iřsawen ad gnun,
u tussna ad tebḍeř.
9 Minzi aqa nessen ɣar ijj n uɣezdis waha,
uca nettnabb mɣir ijj n wezyen,
10 maca xmi dd ɣa tas řekmaret
řexdenni min iǧan ɣar ijj n wezyen ad ibḍeř.
11 Řami tuɣa ayi d aḥenjir,
ssiwřeɣ am uḥenjir,
fekkareɣ am uḥenjir,
xarṣeɣ am uḥenjir,
maca řami dewřeɣ d aryaz,
jjiɣ awarni ayi min iǧan n uḥenjir.
12 Řexxu nettwařa s ict n tisit ibarcnen
ɣar ijj n warwas,
maca xenni ad nẓar tifras ɣar tifras.
Řexxu ssneɣ ɣar ijj n wezyen waha,
maca xenni ad ssneɣ
mammec tuɣa ttwassneɣ necc. ◘13:12 2 Kur. 3:18.
13 Maɣar třata-ya ad qqimen:
l’iman, asitem d tayri,
maca ameqqran nsen aqa-tt d tayri.”