1 Umi dd-qarrben ɣar Urcalim zeg uɣezdis n Bayt-Faji d Bayt-Ɛanya, zzat i wedrar n Zzitun, issekk tnayen n imeḥḍaren nnes, ◘11:1 [Mt. 21:1-11; Lk. 19:28-40; Yḥ. 12:12-19] — Mt. 21:1; Lk. 19:29. 2 inna asen: “Ruḥem ɣar dcar nni qibač nwem. Xmi ɣares i ɣa tadfem, řexdenni ad tafem ijj n wesnus iqqen, war xas inyi uřa d ijj n bnadem. Fesyem as-dd uca awyem t-i-dd ɣari. 3 Mařa inna awem ḥed: ‘Mayemmi i tᵉtteggem aya?’, xenni inim: ‘Aqa Siditneɣ iḥdaj i-t, uca řexdenni ad t-i-dd-issekk da ɛawed.’ ” 4 Nitni ruḥen, ufin asnus nni iqqen ɣar tewwart barra x webrid. Řami d as dd-arxun, 5 nnan asen ca n yinni tuɣa din ibedden: “Min tᵉtteggem, tfessyem i wesnus?” 6 Nnan asen am mammec ten iweṣṣa Yasuɛ, uca jjin ten. 7 Iwyen-dd asnus ɣar Yasuɛ, ssarsen xas arruḍ nsen uca inya xas Yasuɛ ◘11:7 2 Ij. 9:13; Yḥ. 12:14. 8 Aṭṭas ssun arruḍ nsen x webrid, ca nneɣni qessen-dd řefruɛ ak-d wafriwen zi tcejjura uca ssun ten ɛawed x webrid. 9 Inni t izwaren d yinni t-i-dd-iḍfaren, tuɣa sɣuyyun s jjehd, qqaren: “Uṣanna! Lbaraka i Wenni dd-yusin s Yisem n SIDI! ◘11:9 Izhd. 118:25, 26; Mt:21:15; Yḥ. 12:13 10 Ad tᵉttwabarek Tgeldit tenni i dd ɣa yasen s ufus n babatneɣ Dawud. Uṣanna di řuɛřa x řuɛřa n ijenwan!” ◘11:10 Izhd. 118:25, 26; Mt. 21:9; Yḥ. 12:13 11 Yusa-dd Yasuɛ ɣar Urcalim, yudef ɣar Zzawect Tameqqrant uca iẓra marra min din imsaren. Řami tuɣa issutem řḥař, iffeɣ ɣar Bayt-Ɛanya ak-d tenɛac. ◘11:11 Mt. 21:12, 14; Lk. 19:45; Yḥ. 2:14.

12 Tiwecca nnes, řami dd-iffeɣ zi Bayt-Ɛanya, iṭṭef i-t-i-dd řaẓ. ◘11:12 [Mt. 21:18-19] — Mt. 21:18. 13 Umi iẓra zi řaggʷaj ijj n wartu n tazart ɣares tifray, yuyur din ḥima ad yarzu ma ad taɣ ad dayes yaf ca. Umi ɣares dd-yiweḍ, war yufi walu mɣir tifray, minzi war tuɣi bu řweqt n tazart. 14 Iṭṭef deg wawař, inna as i wartu: “Zi řexxu d tsawent war zzayem ittett uřa d ijj ɛad řɣiǧet.” Tuɣa imeḥḍaren nnes ttesřan min iqqar.

15 Uca yudef Yasuɛ ɣar Zzawect Tameqqrant n AREBBI, ibda issuffuɣ imsewwaqen d isebbaben nni iǧan di Zzawect Tameqqrant, uca ibda issneqřab ṭṭwabeř n iṣarrafen n tmenyat d řekrasi n yinni tuɣa iznuzan idbiren, ◘11:15 [Mt. 21:12-17; Lk. 19:45-48; Yḥ. 2:13-22] — Mt. 21:12; Lk. 19:45; Yḥ. 2:14. 16 uca war ijji ḥed ad iɛdu Zzawect Tameqqrant uřa s ict n řqecɛet. 17 Tuɣa isseřmad, inna asen:

“Ma war turi:

Taddart inu ad as řaɣan

‘Taddart n tẓaǧit i marra řegnus?’

Maca kenniw tarrim tt

d ifri n iceffaren.” ◘11:17 1 Ij. 8:29; Ica. 56:7; Irm. 7:11; Mt. 21:13; Lk. 19:46.

18 Imseřmaden n idlisen d imeqqranen n ikehhanen sřin man aya, kkaren uca arezzun mammec ɣa ggen ad t nɣen, minzi ggʷeden zzayes, minzi řɣaci marra tuɣa ittebhet s useřmed nnes. ◘11:18 7:19. 19 Řami dd-tewḍa tmeddit, ffɣen ɣar barra n tendint.

20 Di ṣṣbeḥ zic, řami dinni ɛdun, ẓrin belli wartu nni isřaw zeg iẓewran. 21 Cimɛun iften, xenni inna as: “A Amseřmad inu, xzar, artu i tneɛřed, aqa isřaw.” 22 Yarra-dd Yasuɛ, inna asen: “Maɛlik ad daywem yiři l’iman n AREBBI, 23 maɣar s tidett, Necc ad awem iniɣ, mařa ḥed ad yini i wedrar-a: ‘Meksi, wḍa di řebḥar!’, war ittcekki deg wuř nnes maca ad yamen belli min inna ad iffeɣ, iwa aqa ad iffeɣ i netta am mammec inna netta. ◘11:23 Mt. 17:20; 21:21; Lk. 17:6. 24 S uyenni Necc ad awem iniɣ, marra min ɣa tᵉttarem am tᵉttẓaǧam, amnen belli ad t tkesbem, uca ad ɣarwem yiři. ◘11:24 Irm. 29:12; Mt. 7:7; Lk. 11:9; Yḥ. 14:13; 15:7; 16:24; Yaɛ. 1:5, 6; 1 Yḥ. 3:22; 5:14. 25 U xmi ɣa tbeddem tᵉttẓẓaǧam, ɣfarem min ɣarwem x ca n ijjen, ḥima ad awem iɣfar ɛawed Babatwem i iǧan deg ijenwan ddnub nwem. ◘11:25 Mt. 6:14; Kul. 3:13. 26 Mařa war tɣeffarem kenniw, war d awem iɣeffar uřa d Babatwem i iǧan deg ijenwan i ddnub nwem.” ◘11:26 Mt. 18:35.

27 Usin-dd ɛawed ɣar Urcalim. Am tuɣa iggur di Zzawect Tameqqrant, qarrben-dd ɣares imeqqranen n ikehhanen d imseřmaden n idlisen d imɣaren n řgens. ◘11:27 [Mt. 21:23-27; Lk. 20:1-8] — Mt. 21:23; Lk. 20:1. 28 Nnan as: “S man ttesriḥ i zi tᵉttegged timesřayin-a? Wi d ac iwcin ṣṣulṭa-ya ḥima ad tegged timesřayin-a?” ◘11:28 Uf. 2:14; Řex. 4:7; 7:27. 29 Yarra-dd Yasuɛ, inna asen: “Uřa d Necc ad kenniw sseqsiɣ ijj n useqsi, ḥima kenniw ad xafi tarrim, uca xenni uřa d Necc ad awem iniɣ s man ttesriḥ i zi tteggeɣ aya. 30 Aseɣḍaṣ n Yuḥanna, ma ikka-dd zeg ujenna niɣ zeg iwdan? Arrem-dd xafi!” 31 Mcawaren jar asen, nnan: “Mařa nenna: ‘Zeg ujenna!’, ad yini: ‘Mayemmi war zzayes tuminem?’ 32 Maca mařa nenna: ‘Zeg iwdan!’, xenni ittxeṣṣa ad neggʷed zi řgens!”, minzi marra ḥesben Yuḥanna d anabi s tidett. ◘11:32 Mt. 14:5; Mk. 6:20. 33 Arrin-dd, nnan i Yasuɛ: “War nessin!” Netta inna asen: “Xenni uřa d Necc war d awem qqareɣ zi man ttesriḥ i zi tteggeɣ timesřayin-a.”