1 “Ḥḍam, war tṣeddaqem zzat i iwdan, ḥima ad kenniw ẓaren. Mařa amya, war ɣarwem ittiři bu řajar zi Babatwem i iǧan deg ijenwan. 2 Mařa tṣeddqed, war tt ttegg di řbuq am mammec t tteggen imnafqen di temzidawin u di zznaqi, ḥima ad ten cennɛen iwdan. S tidett Necc ad awem iniɣ, nitni aqa ufin řajar nsen zi beɛda. ◘6:2 Rum. 12:8. 3 Maca cek, xmi ɣa tṣeddqed, ittxeṣṣa afus nnec azeřmaḍ war issin min ittegg ufusi nnec, 4 ḥima ṣṣedqet nnec ad tiři s tnuffra uca Babac, wenni ittwařan di tnuffra, ad cek ixeǧeṣ s bṭayṭay.” ◘6:4 Lk. 14:14.

5 “Mařa teẓẓuǧed, war ttiři ca am yimnafqen inni umi iɛjeb asen řḥař ad ẓẓaǧen am bedden di temzidawin d tɣemmura n zznaqi ḥima ad ten ẓaren iwdan. S tidett Necc ad awem iniɣ, aqa nitni ufin řajar nsen zi beɛda. ◘6:5 [Lk. 11:2-4] 6 Maca cek, mařa teẓẓuǧed, adef ɣar wexxam nnec, belleɛ tawwart, ẓẓaǧ i Babac wenni iǧan di tnuffra, uca Babac i ittwařan di tnuffra d Netta i cek i ɣa ixeǧṣen s bṭayṭay. ◘6:6 2 Ij. 4:33; Řex. 10:4. 7 Mařa teẓẓuǧem war ttɛawadem i wawař am mammec ttẓaǧan lkuffar, minzi ittɣiř asen s wawařen nsen aṭṭas ad asen ittwaseř. ◘6:7 1 Ij. 18:28; Ica. 1:15. 8 War ttiřim xenni am nitni, minzi Babatwem issen min teḥdajem qbeř d as i ɣa tᵉttarem ca. 9 Ammu i ɣa teẓẓaǧem kenniw:

‘A Babatneɣ i iǧan deg ijenwan,

ad yiři Isem nnec ittwaqeddes, ◘6:9 Lk. 11:2.

10 ejj ad dd-tas Tgeldit nnec,

ad yiři řxaḍar nnec

am deg ujenna ammu ɛawed di temmurt.

11 Ewc aneɣ ass-a aɣrum i nehdaj.

12 Ɣfar aneɣ imarwusa nneɣ,

am mammec nsameḥ ɛawed

i yinni dd aneɣ ittursen,

13 u war d aneɣ sidif ca deg ujarreb,

maca fekk aneɣ zeg umɛeffan.

Minzi Tageldit d jjehd d uɛuǧi

ad iřin i Cek i řebda qaɛ!’ ◘6:13 Mt. 13:19.

14 Maɣar mařa kenniw tsamḥem i iwdan i iɛeddiyen nsen, uřa d Babatwem i iǧan deg ijenwan ad awem iɣfar. ◘6:14 Mk. 11:25; Kul. 3:13. 15 Maca mařa kenniw war tᵉttsimiḥem i iwdan, aqa uřa d Babatwem war iɣeffar ca iɛeddiyen nwem.” ◘6:15 Mt. 18:35; Yaɛ. 2:13.

16 “Řami tẓummem, war tteggem aɣembub abarcan am yimnafqen, inni issneqřaben aɣembub nsen ḥima ad ten ẓaren iwdan belli aqa ẓummen. S tidett Necc ad awem iniɣ, aqa nitni ufin řajar nsen zi beɛda. ◘6:16 Ica. 58:3; Mt. 9:14; Mk. 2:18; Lk. 5:33. 17 Maca cek, mařa tẓummed, dhen azeǧif nnec uca sired aɣembub nnec, 18 ḥima war tbinid ca i iwdan belli tᵉttẓummed, maca i Babac wenni iǧan di tnuffra, uca Babac i ittwařan di tnuffra, aqa Netta i cek i ɣa ixeǧṣen.”

19 “War smunam ca řeknuz i yixef nwem da di ddunect mani i ten ɣa tecc tcinda d ddra, u mani ɣa ssnuqqben ixewwanen, ad ten acaren, ◘6:19 [Lk. 12:33-34; 11:34-36; 16:13] — Awřn. 23:4; Ɛbr. 13:5; Yaɛ. 5:1. 20 maca smunem i yixef nwem řeknuz deg ujenna mani war ten tᵉttett ca tcinda d ddra, u mani war ssnuqquben ixewwanen, war ten ttacaren. ◘6:20 Lk. 12:33; 1 Tim. 6:19. 21 Minzi mani ɣa yiři řkenz nnec, aqa ad din yiři uřa d uř nnec.”

22 “Řefnar n arrimet netta d tiṭṭ. Mařa xenni tiṭṭ nnec aqa teṣfa, ad tiři arrimet nnec marra d tafawt. ◘6:22 Lk. 11:34-36; 23 Mara tiṭṭ nnec d taɛeffant, xenni ad tiři arrimet nnec marra d taǧest. Mařa tafawt tenni dayek d taǧest, mecḥař temɣar taǧest!

24 Uřa d ijj war izemmar ad ixdem i tnayen n isiditen, minzi xenni netta ad icarh ijjen, ad ixs wenneɣni, niɣ ad iweqqar ijjen, ad isseḥqar wenneɣni. Kenniw war tzemmarem ad tsexxarem i AREBBI d tenɛacin.” ◘6:24 Lk. 16:13.

25 “S uya Necc ad awem iniɣ: ‘War kessim amnus di tudart nwem, min ɣa teccem niɣ min ɣa teswem, uřa i arrimet nwem mammec tt i ɣa tessyarḍem. Xzarem, ma war teḥři tudart x macca niɣ arrimet x warruḍ? ◘6:25 [Lk. 12:22-34] — Izhd. 37:5; 55:23; Fil. 4:6; 1 Tim. 6:8; 1 Bṭ. 5:7. 26 Xzarem ɣar ijḍaḍ n ujenna, aqa nitni war zarrɛen, war mejjaren uca war ttxemmiřen di řemrasi. Waxxa amenni Babatwem i iǧan deg ijenwan i ten isseccan. Xzarem, ma kenniw war tessekkwim ca ktar aṭṭas xasen? ◘6:26 Ayub 38:41; Izhd. 147:9. 27 Man wen zzaywem izemmar s wemnus nnes ad yarni mɣir ijj n uɣiř di tuzzeggart nnes? 28 U mayemmi tkessim amnus i warruḍ? Xzarem mammec ɣemmyent tlillicin deg iyyar. Nitenti war xeddment, war ttqarḍcent, ◼6:28 tilillicin - ijj n marka n nnuwarat daysen aẓri aṭṭas. 29 maca Necc ad awem iniɣ, uřa d Suliman di marra aɛuǧi nnes war yarḍ ca am yijjen zzaysen. 30 Mařa AREBBI issyarḍ ammu arbiɛ n iyyar i iǧan ass-a uca tiwecca ad immenḍar di tefqunt, ma xenni war kenniw issyirreḍ aṭṭas ḥsen zzayes, a kenniw i di iǧa drus n l’iman? 31 S uya war kessim ca amnus, war qqarem: ‘Min ɣa necc?’, u: ‘Min ɣa nsu?’, niɣ: ‘Min ɣa nyarḍ?’ 32 Maɣar řegnus n ddunect arezzun man aya marra, maca Babatwem i iǧan deg ijenwan issen aqa teḥdajem man aya marra. 33 Arzum amezwaru x Tgeldit n AREBBI d tsegda nnes, uca man aya marra ad ɣarwem immarni ɛawed. ◘6:33 1 Ij. 3:13; Izhd. 37:25; 55:23. 34 S uya war kessim amnus i min i ɣa yiři tiwecca, minzi tiwecca ad teksi amnus i yixef nnes. Icfa i kuř ass tuɛeffna nnes.”