1 Awarni i ca n wussan Yudef Yasuɛ ɛawed ɣar Kafarnaḥum. Řami sřin belli aqa-t di taddart, ◘2:1 [Mt. 9:1-8; Lk. 5:17-26] — Mt. 9:1; Lk. 5:17. 2 munen xas waṭṭas n iwdan, ařami war zemmaren ad dd-awḍen uřa ɣar tewwart, u Netta tuɣa issawař akidsen s Wawař. 3 Usin-dd ca ɣares, iwyen-dd ijj n uneɛḍab ɣares, arbun t-i-dd jar asen arebɛa n yeryazen. ◘2:3 Mt. 9:1; Lk. 5:18. 4 Minzi war zemmaren ad ɣares dd-qarrben zi ssibbet n řɣaci, gaɛɛden x tzeqqa, ksin cwayt zi tzeqqa sennej amcan mani tuɣa Yasuɛ, uca ssehwan-dd tassut min xef izzeř uneɛḍab.

5 Umi iẓra Yasuɛ l’iman nsen, inna i uneɛḍab: “A mmi, aqa ddnub nnec ttwaɣfaren.” 6 Tuɣa qqimen din ca n imseřmaden n idlisen d Ifarisiyyen, ttxarraṣen deg wuř nsen: 7 “Min iɛna wa i ittceqqafen ammu? Wi izemmaren ad iɣfar ddnub mɣir AREBBI weḥḥdes?” ◘2:7 Izhd. 32:5; 51:3; Ica. 43:25. 8 Yuca Yasuɛ s Arruḥ nnes belli aqa ttxarraṣen ammu deg ixef nsen. Inna asen: “Mayemmi tᵉttxemmamem di man aya deg wuřawen nwem? 9 Min ihewnen ad iniɣ i uneɛḍab: ‘Ttwaɣfaren ddnub nnec’ niɣ ad iniɣ: ‘Kkar, ksi tassut nnec uca uyur’? 10 Maca ḥima ad tessnem belli Mmis n bnadem ɣares ṣṣulṭa x temmurt, maḥend ad iɣfar ddnub, inna xenni i uneɛḍab: 11 ‘Necc ad ac iniɣ: Kkar, ksi tassut nnec, truḥed ɣar taddart nnec!’ ” 12 Deɣya ikkar, řexdenni iksi tassut nnes uca iffeɣ qibač i marra iwdan, ařami tbehten marra, ssemɣaren di AREBBI, nnan: “Ɛemmarṣ war neẓri man aya!”

13 Xenni iffeɣ ɛawed ɣar řebḥar, uca yusa-dd ɣares řɣaci marra uca isseřmed i-ten. ◘2:13 [Mt. 9:9-13; Lk. 5:27-32] — Mt. 9:9; Lk. 5:27. 14 Am yeɛdu, ibarq Lawi mmis n Ḥalfa iqqim ɣar taddart n ḍḍariba, uca inna as: “Ḍfar ayi-dd!”. Ikkar uca iḍfar i-t. 15 Am iqqim Netta ɣar ṭṭabřa di taddart nnes, tuɣa aṭṭas n ayt n ḍḍariba d imednab qqimen ak-d Yasuɛ d imeḥḍaren nnes, minzi tuɣa aten deg waṭṭas uca ḍfaren t. 16 Umi ẓrin imseřmaden n idlisen d Ifarisiyyen aqa ittett ak-d ayt n ḍḍariba d imednab, nnan i imeḥḍaren nnes: “Mayemmi ittett, isess ak-d ayt n ḍḍariba d imednab?” 17 Řami isřa Yasuɛ man aya, inna asen: “Inni iṣeḥḥen war ḥdijen ca aḍbib, maca imehřac wah. Aqa war dd-usiɣ ḥima ad řaɣiɣ i yinni iseggden maca i imednab.” ◘2:17 Mt. 9:13; 21:31; Lk. 5:32; 19:10; 1 Tim. 1:15.

18 Tuɣa imeḥḍaren n Yuḥanna Amseɣḍaṣ d Ifarisiyyen ttẓumman uca xenni usin-dd ɣares, nnan as: “Mayemmi ttẓumman imeḥḍaren n Yuḥanna d Ifarisiyyen, maca imeḥḍaren nnec war ttẓummin ca?” ◘2:18 [Mt. 9:14-17; Lk. 5:33-39] — Mt. 9:14; Lk. 5:33. 19 Inna asen Yasuɛ: “Ma zemmaren tarwa n umuřay ad ẓummen d umuřay ɛad akidsen? Lla!◘2:19 Ica. 62:5; 2 Kur. 11:2. 20 Maca ad dd-asen wussan xmi d ɣa immeksi umuřay xasen, xenni ad ẓummen, deg wussan nni. 21 War iǧi ḥed ittxeyyeḍ taneqqič zi tcuqqet n jdid x warruḍ aqdim, niɣ xenni taneqqič nni n jdid ad teqřeɛ zeg warruḍ abuřay, uca ad idweř ucarreg imɣar. 22 Uřa d ijj war ittfarreɣ binu n jdid di txuncay tiqdimin, ḥima binu n jdid war ittcarrig tixuncay u tixuncay ad ḍeyyɛent uca binu ad izeǧeɛ. Maca ittxeṣṣa ad ittwaffareɣ binu n jdid di txuncay n jdid.” ◘2:22 Mt. 9:17.

23 Xenni imsar aqa icuq Yasuɛ deg iyyaren n imendi di ssebt, uca imeḥḍaren nnes bdan řeqqḍen tidrin am gguren. ◘2:23 [Mt. 12:1-8; Lk. 6:1-5] — Aɛwd. 23:24; Mt. 12:1; Lk. 6:1. 24 Nnan as Ifarisiyyen: “Xzar, mayemmi tteggen di ssebt min war iḥeǧřen?” ◘2:24 Uf. 20:10; Aɛwd. 23:25 25 Inna asen Yasuɛ: “Ma war teɣrim qaɛ min igga Dawud, řami tuɣa ittwaḥṣar, iṭṭef i-t řaẓ, netta d yinni akides? ◘2:25 Lawi 24:8; 1 Ṣm. 21:6. 26 Mammec dd-yudef ɣar Taddart n AREBBI deg wussan n Abyatar, arrays n ikehhanen, uca icca aɣrum n wescan n SIDI i war iḥeǧřen ad t ccen mɣir ikehhanen waha, uca iwca ɛawed i yinni tuɣa akides?” ◘2:26 Lawi 24:9. 27 Xenni inna asen: “Aqa ass n ssebt ittwagg i bnadem, war iǧi bnadem i ssebt. 28 Ammu i iǧa Mmis n bnadem uřa d Bab n ssebt.” ◘2:28 Mt. 12:8; Lk. 6:5.