1 “Maca řexxu, ammu i iqqar SIDI, wenni cek dd-ixeřqen, a Yaɛqub, d wenni d Amkewwan nnec, a Israil, war tteggʷed ca, maɣar Necc fekkeɣ cek, řaɣiɣ ac s yisem nnec, cek inu. 2 Mařa tcuqed deg waman, ad iřiɣ akidek, mařa deg iɣezran, war cek ttiwyen. Mařa teẓwid x tmessi, war tcemmḍed, uca aceɛɛař war cek issruɣa. ◘43:2 Izhd. 66:12 3 Maɣar Necc d SIDI, AREBBI nnec, Amqeddas n Israil, Amsenjem nnec. Necc wciɣ Miṣra d ddeyyet i cek, Kuc d Seba deg wemcan nnec. 4 Minzi tsekkwid aṭṭas di tiṭṭawin inu, aqa tᵉttwassɛuǧed u Necc ttexseɣ cek. Wciɣ iwdan deg wemcan nnec d ccuɛub deg wemcan n řeɛmar nnec. 5 War tteggʷed ca, maɣar Necc akidek. Ad awyeɣ iḥenjiren nnec zi mani dd-tneqqar tfuct, ad cek ssmuneɣ zi mani dd-tɣeǧi tfuct. ◘43:5 Ica. 44:2; Irm. 30:10; 46:27 6 Necc ad iniɣ i ccamal: ‘Ewc!’ u i ljanub: ‘War ttᵉṭṭef!’, arekkʷeḥ iḥenjiren inu zi řaggʷaj, yessi zi tma n temmurt, 7 kuř ijjen wenni umi ttřaɣan s Yisem inu, wenni dd-xeřqeɣ i ccan inu, wenni kewwneɣ d wenni ggiɣ ɛawed.”

8 “Ejj ad iffeɣ řgens adarɣař, waxxa ɣarsen tiṭṭawin, uřa d iduhcaren, waxxa ɣarsen imezzuɣen. 9 Ejj ad ttwassmunen marra řegnus uca ejj ccuɛub ad nnjarwen! Man wen zzaysen izemmar ad ibarreḥ ta, d man wen izemmar ad aneɣ yini min tuɣa iǧan zic? Ejj i-ten ad awyen řechud nsen maḥend ad ttwaseggden, uca ejj řechud ad sřen, ad inin: ‘D tidett!’ 10 Kenniw d řechud inu uřa d amsexxar inu nni farzeɣ, ḥima ad tessnem, ad dayi tamnem, ad tfehmem aqa Necc Necc. Qbeř Necc war ittwagg uřa d ijj n Arebbi uca awarni ayi war ittiři uřa d ijjen!, iqqar SIDI. ◘43:10 Ica. 41:4; 44:8; 45:21; Ḥuc. 13:4 11 Necc, Necc d SIDI, u war iǧi Umsenjem mɣir Necc. 12 Necc barrḥeɣ u ssnejmeɣ u Necc iwyeɣ awem t-i-dd ɣar umejjun. Uřa d ijj n arebbi řbarrani war tuɣi jar awem. Kenniw d řechud aqa Necc d Arebbi, ammu i iqqar SIDI. 13 Uřa zeg wass-a, aqa Necc Necc uca uřa d ijj war izemmar ad issfekk zeg ufus inu! Mařa Necc xedmeɣ, man wen izemmaren ad t inneqřeb?” ◘43:13 Ica. 14:27

14 “Ammu i iqqar SIDI, Amefdi nwem, Amqeddas n Israil: ‘Di ṭṭweɛ nwem ssekkeɣ ijjen ɣar Babil uca ad ten arreɣ ad arewřen, uca ad hwan marra Ikaldaniyyen deg iɣurraba nni zi tuɣa farrḥen ammu qbeř. 15 Necc d SIDI, Amqeddas nwem, wenni dd-ixeřqen Israil, Ajeǧid nwem.’ ”

16 “Ammu i iqqar SIDI nni iggin abrid di řebḥar d tebridt deg waman ijehden, 17 wenni ijjin ikarruten d yeysan, řɛeskar d jjehd ad ffɣen - aqa da, zzřen munen, war ttnekkaren ɛemmarṣ, xesyen, qḍan am teftič n tiffest! - 18 ammu i iqqar SIDI: ‘War ttɛeqiřem ɛad x min tuɣa iǧan zic, war ttidarem ɛad min iɛdun. 19 Xzar, ad ggeɣ min iǧan n jdid, řexxu ad dd-iffeɣ. Ma war d as tḥekkarem ca? Wah, Necc ad ssarseɣ abrid di řexřa, iɣzaren di tnezruft. ◘43:19 Asa. 21:5 20 Řmař n řexřa ad ayi ssɛuǧan, uccanen n řexřa d yessis n nnɛamet, maɣar Necc ad ggeɣ aman ad azzřen di řexřa uřa d iɣezran di tnezruft, ḥima ad ssesweɣ řgens inu, inni farzeɣ. 21 Řgens-a ggiɣ t i Necc, nitni ad barrḥen ccan inu.’ ” ◘43:21 Lk. 1:74, 75

22 “Maca cek war d ayi dd-třaɣid, a Yaɛqub, war tessiḥřed ixef nnec akidi, a Israil! 23 Cek war d ayi dd-tiwyed ijjen zeg wuǧi n tɣarṣa nnec n wecmaḍ, uca s tɣarṣi nnec war d ayi tcennɛed. Ɛemmarṣ war cek ḥṣareɣ ɣar tewhibt n řɣiǧet u war cek ssiḥřeɣ ɛemmarṣ s jjawi. 24 Cek war d ayi tesɣid aɣanim n uḥemmum ittfuḥen s tmenyat n nnuqart uca war d ayi tessjiwned s tadunt n tɣarṣa nnec, maca s ddnub nnec tarnid ayi-dd řxedmet, s řmuɛṣiyyat nnec tessiḥřed ayi.”

25 “Necc, d Necc, wenni i ɣa imesḥen iɛeddiyen nnec di ṭṭweɛ inu, Necc war ttidareɣ ɛad ddnub nnec.” ◘43:25 Ḥiz. 36:22-38

26 “Arr i-ten ɣar řbař inu, ejj aneɣ ad nemcarreɛ, wwet x yixef nnec maḥend ad dd-tawyed tasɣart nnec. ◘43:26 Ica. 1:18 27 Babac amezwaru ixḍa u uřa d imseṣřaḥen nnec ɛdun xafi. ◼43:27 imseṣřaḥen - ixs ad yini ‘ikehhanen d inabiyyen nnec’ inni tuɣa ibedden jar AREBBI d řgens nnes. 28 Xenni ssɛiǧteɣ imeqqranen n Zzawect Iqeddsen, u arriɣ Yaɛqub maḥend ad ittwaḥarrem i uteḥḥi uca jjiɣ Israil maḥend ad t ɛeyyben.”