1 Iwa kenniw, a aytbab n wagřa, sḥissfem, rum i lmuṣibat i kenniw ittrajan. ◘5:1 Awřn. 11:28; Ɛam. 6:1; Lk. 6:24; 1 Tim. 6:9. 2 Minzi agřa nwem aqa iɣumm, yarṣuḍ, uca arruḍ nwem ccin t tcinda, 3 ureɣ nwem d nnuqart nwem aqa arcan uca arecci nsen ad xawem teched, ad icc ddat nwem am tmessi. Aqa kenniw teyrum timessi i yixef nwem i wussan ineggura. ◘5:3 Mt. 6:19; Rum. 2:5. 4 Xzar, řmunet n icewwařen nni tessɛizzem x yenni imjaren iyyaren nwem tesɣuyyu, uca tɣuyyit n yinni imjaren tiweḍ as-dd ař imezzuɣen n SIDI n řɛeskarat. ◘5:4 Lawi 19:13; Aɛwd. 24:14. 5 Aqa kenniw tfeyycem x temmurt, teḍfarem meẓri nwem. Aqa tessjiwnem arrimat nwem am deg wass n tɣarṣit. ◘5:5 Ayub 21:13; Lk. 16:19, 25. 6 Aqa kenniw tḥekmem x umseggad s řmewt, am netta war xawem immɛařa ca.

7 Maca kenniw, a aytma, ṣbarem ař dd ɣa yas SIDI, am mammec ittraja ufeǧaḥ ɣar řɣiǧet iɣřan n temmurt, iṣbar s řxaḍar ař xas iwwet wenẓar n zic d uneggar. 8 Uřa d kenniw, ṣbarem, smeḥḥdem uřawen nwem, aqa tawasit n Siditneɣ tudes-dd. 9 A aytma, war tsuḍem x wayawya, ḥima war ɣarwem dd-ittikkwiḍ řḥukm. Maɣar xzar, Řqaḍi ibedd ɣar tewwart. 10 A aytma, mquddam ak-d inabiyyen inni tuɣa issiwřen s Yisem n SIDI maḥend ad teṣbarem di řeḥṣarat nwem. 11 Xzarem, ad nbarek inni ittṣebbaren. Aqa kenniw tesřam x ṣṣbar n Ayub uca twařam řɣiǧet tenni d as igga SIDI, maɣar SIDI d arḥim d aḥnin. ◘5:11 Řxř. 14:18; Ayub 1:21, 22; Izhd. 103:8; Mt. 5:11.

12 Amezwaru n marra, a aytma, war ttjaǧam ca, řa ɣar ujenna řa ɣar temmurt uca uřa d ict n tjaǧit nneɣni. Ad ɣarwem yiři ‘Wah!’ nwem d ‘Wah!’, d ‘Lla!’ nwem d ‘Lla!’, niɣ aqa ad tiřim sadu řḥukm. ◘5:12 Mt. 5:34; 2 Kur. 1:17, 18.

13 Ma aqa din ca n ijjen jar awem iweddeb? Ejj i-t ad ittar. Ma aqa din ca n ijjen ifarḥ? Ejj i-t ad iɣennej s izřan n uṣebbeḥ. ◘5:13 Afa. 5:19; Kul. 3:16. 14 Ma din jar awem ḥed ihřec? Ejj i-t ad dd-iřaɣa x imɣaren n tmesmunt ɣares, ḥima ad as ksin s řmeɛruf, ad t retfen s zzect n wedhan s Yisem n Siditneɣ. ◘5:14 Lawi 14:17, 18; Mk. 6:13. 15 Uca taẓaǧit n l’iman ad tessgenfa amehřuc uca Siditneɣ ad t issnekkar. Uca mařa tuɣa ittegg ddnub, ad as ttwaɣfaren. 16 Neɛmem ijj i wenneɣni s iɛediyyen nwem u ẓaǧem i wayawya, ḥima ad tᵉttwassgenfam, maɣar jjehd n tẓaǧit n umseggad aqa-t d ameqqran.

17 Iliya tuɣa d bnadem ittaca am neccin. Iẓẓuǧ ḥima war iccit wenẓar x temmurt. Xenni anẓar war iwti ca x temmurt třata n iseggʷusa d setta n iyuren. ◘5:17 1 Ij. 17:1; Lk. 4:25. 18 Uca tuɣa iẓẓuǧ ɛawed, řexdenni ajenna iwta anẓar uca tammurt tewca ṣṣabet nnes. ◘5:18 1 Ij. 18:45.

19 A aytma, mařa din ḥed jar awem iffeɣ x webrid n tidett uca ca n yijjen yarr i-t-i-dd ad dd-idweř zeg uweddar nnes, ◘5:19 Mt. 18:15. 20 ejj i-t ad issen, aqa wenni dd ɣa yarren amednub zeg uweddar nnes, ad issenjem řeɛmar zi řmewt uca ad issduriy aṭṭas n ddnub. ◘5:20 Awřn. 10:12; 1 Bṭ. 4:8.