21
Tamwarrit n Ayub x Ṣufar: řefřeḥ n weryaz aɛeffan
1 Xenni yarra-dd Ayub, inna:
2 Sřem mliḥ i wawařen inu,
ḥima ad awem iřin i usfewwej.
3 Ksim ayi, xenni ad ssiwřeɣ,
u awarni řami ssiwřeɣ,
tzemmarem ad tɛeffarem.
4 Ma acetci inu x ijj n bnadem?
Niɣ mayemmi war d ayi dd-ikkar
ad yiři buḥbeř inu břa ttasiɛ n řxaḍar?
5 Qeřbem-dd ɣari uca jɛarem,
sarsem afus x uqemmum.
6 Mařa xemmeɣ waha deg uya, ttnexřiɛeɣ
u tmenneɛ tarjijit arrimet inu.
7 Mayemmi ttɣiman iɛeffanen ddaren,
mayemmi ddakkwařen iwessura,
ttmarnin ɛad di jjehd nsen? ◘21:7 Izhd. 17:10; 73:12; Irm. 12:1; Ḥab. 1:16
8 Tarwa nsen ttɣiman bedden
zzat i uɣembub nsen, aqa aten ɣarsen,
u iḥenjiren iɣedduten nsen
zzat i tiṭṭawin nsen. ◼21:8 Tarwa - s Tɛibranit ‘zzariɛet’.
9 Tudrin nsen aqa atent
di řehna nhřa anexřiɛ,
aɛmud n Arebbi war ten iccit.
10 Afunas nnes ittarra u war ixeṭṭi,
tafunast nnes tᵉttaru,
ɛemmarṣ war tɣeṭṭeř aɛeddis.
11 Ttejjan imeẓyanen nsen
gguren am yict n tḥimart,
iḥenjiren nsen ttejjan ten neggzen.
12 Nitni ssgeɛɛaden tmijja nsen
ɣar ubendir d řgambri,
farrḥen ɣar tmijja n temja.
13 Ssɛeddun ussan nsen di zzhar,
maca hekkwan ɣar řaxart
deg wermac n wabřiwen.
14 Qqaren i Arebbi: ‘Ḥeyyed xaneɣ,
maɣar war d aneɣ iɛjib
ad nessen ibriden nnec. ◘21:14 Ayub 22:17
15 Man wen iǧan d Amzemmar x kuřci
maḥend ad as nsexxar?
Man lfayda i ɣarneɣ
mařa nziyyar xas s tẓaǧit nneɣ?’ ◘21:15 Uf. 5:2; Mal. 3:14
16 Xzar, zzhar nsen war iǧi deg ufus nsen.
Ccwar n iɛeffanen iggʷej xafi. ◘21:16 Ayub 22:18
17 Mecḥař n twařawin
txessi xenni i iɛeffanen tfawt nsen,
uca iřeqqef i-ten uḍeyyeɛ,
mecḥař n twařawin ibeṭṭa Netta
xasen řeḥřiq deg weɣḍab nnes, ◘21:17 Ayub 20:29; Izhd. 11:6, 7
18 ařami i ɣa dewřen
am uřum zzat i usemmiḍ,
am iɣeǧ texḍef i-t tḥaryaḍt?
19 Ma teqqarem: ‘Arebbi ittxemmeř lɛiqab
i řmuɛṣiyyet nnes i iḥenjiren nnes!’
Ejj i-t ad as tt ixeǧeṣ
ař ɣa yaca netta simant nnes!
20 Ejj tiṭṭawin nnes
ad ẓarent ahellek nnes,
ejj i-t ad isu s yixef nnec
zeg wesɛar n Umzemmar x kuřci.
21 Maɣar mammec i ɣa yarḍa ɛad
di aytbab n taddart nnes
awarni i řmewt nnes,
mařa tᵉttwagg ɛad qedda n iyuren nnes? ◼21:21 awarni i řmewt nnes - s Tɛibranit ‘awarni as’.
22 Ma zemmaren ad ssřemden
tussna i Arebbi,
Wenni iḥekkmen
x yinni iǧan deg ujenna yuɛřan? ◘21:22 Ica. 40:13; Rum. 11:34; 1 Kur. 2:16
23 Aqa din ijjen immut di zzhar imun,
am iddar ɛad qaɛ di řehna u di řhudnet.
24 am ɛemmaren řemdawed nnes s uɣi
u ittwabezzeg waduf n yeɣsan nnes.
25 Wenneɣni immut s řeɛmar d amarzag,
war dd-yiwi řiqqi i walu n řxar.
26 Munen zzřen nitni deg ucař
u ikeccawen dřin ten. ◘21:26 Ayub 17:14
27 Xzar, ssneɣ ixarriṣen nwem,
uřa d timeɛmač nni zi d ayi tdeřmem,
28 xmi teqqarem:
‘Mani teǧa taddart n umcenneɛ
ittmeẓrin di ṣṣulṭa,
mani teǧa tqiḍunt s tzeddiɣin,
tazeddiɣt n uɛeffan?’
29 Ma ɛemmarṣ war tesseqsim imsebriden?
Aqa iceyyaren nsen ittqarran
war tzemmarem ad ten tenkarem:
30 maɣar aɛeffan ad ittwaḥḍa
deg wass n arẓiyyet,
deg wass n uduqqez n ufugem
ad ttwawyen nitni di řaman. ◘21:30 Awřn. 16:4
31 Man wen i t ɣa issecnen abrid nnes
deg uɣembub nnes?
Mařa igga ca n tuɛeffna,
wi t i ɣa ixeǧṣen?
32 Netta maca ad ittwaksi
ɣar wenḍeř nnes d ameqqran
u ɣar tewrirt n wenḍeř nnes
ittɛess netta s yixef nnes.
33 Ttɛejiben as ibursa n teɣzurt,
ḍeffaren t marra iwdan
u inni d as ittizwaren,
war zemmaren ad ten ḥesben.
34 Mammec texsem ad ayi tɛezzam
s wawařen ixwan?
Zi temwarrit nwem war ittɣimi walu
mɣir řeɣḍar waha.
◘21:7 21:7 Izhd. 17:10; 73:12; Irm. 12:1; Ḥab. 1:16
◼21:8 21:8 Tarwa - s Tɛibranit ‘zzariɛet’.
◘21:14 21:14 Ayub 22:17
◘21:15 21:15 Uf. 5:2; Mal. 3:14
◘21:16 21:16 Ayub 22:18
◘21:17 21:17 Ayub 20:29; Izhd. 11:6, 7
◼21:21 21:21 awarni i řmewt nnes - s Tɛibranit ‘awarni as’.
◘21:22 21:22 Ica. 40:13; Rum. 11:34; 1 Kur. 2:16
◘21:26 21:26 Ayub 17:14
◘21:30 21:30 Awřn. 16:4