Adlis Iqeddsen Awařen Iweznen 16

1 Bnadem ɣares ixarriṣen

deg wuř nnes,

maca tamwarrit n yiřes

tᵉttas-dd zi SIDI. ◘

2 Marra ibriden n weryaz

ṣfan di tiṭṭawin nnes,

maca SIDI ittqeǧab buḥbeřat. ◘

3 Sars řexdayem nnec i SIDI,

xenni ad ttwassmettnen inwayen nnec. ◘

4 SIDI ixřeq-dd marra i lɣaraḍ nnes,

ɛad uřa d aɛeffan igga i-t i wass n řɣar.◘

5 Kuř amɛeffar d nnɛi i SIDI, afus xas,

netta war ittᵉttwabarri ɛemmarṣ. ◘

6 S tmexsiwt icewwaren d řaman

ad ittwasseṣřeḥ x řɣecc,

u s tiggʷudi n SIDI

ittḥeyyad weryaz x řɣar.

7 Mařa usin-dd ibriden n ijj n weryaz

x řxaḍar n SIDI,

ad yarr Netta uřa d řɛedyan nnes

ad kides ggen řehna.

8 Iḥra drus ak-d tsegda

x waṭṭas n řɣiǧet břa řḥeqq. ◘

9 Uř n bnadem ittxarreṣ abrid nnes,

maca SIDI ineddeh iṣuraf nnes. ◼

10 Řḥukm břa adwař x iyencicen n ujeǧid,

aqemmum nnes war ixeṭṭi deg weḥkam.

11 Řmizan nican d ṭṭawyat n řmizan nican

aqa aten n SIDI,

marra iẓra n řewzen di tecyart

d řxedmet nnes. ◘

12 D nnɛi i ijeǧiden xmi ɣa ggen řɣar,

maɣar řɛarc ittwassemten zi tsegda.

13 Iyencicen i iccuren s tsegda

tteɛjiben i ujeǧid,

u wenni issawařen nican, ittexs i-t netta.

14 Asɛar n ujeǧid am lmalakat n řmewt,

maca aryaz amiɣis izemmar

ad ɣares tt i-dd yarr. ◘

15 Di tfawt n wudem ittissiqen n ujeǧid

teǧa tudart,

arḍa nnes am useynu n wenẓar

di tefsut. ◘

16 Aqa teḥřa tarezzut n tiɣit

x wureɣ ittissiqen,

u mecḥař ktar ad tiři twafit n řefhamet

sennej x twafit n nnuqart. ◘

17 Abrid n yinni igguren nican

ittḥeyyad x řɣar.

Wenni iḥeṭṭan abrid nnes,

iḥeṭṭa řeɛmar nnes.

18 Tanefsect tᵉttizwar-dd i arẓẓiyyet,

u nnfaxet tᵉttas-dd qbeř i uweṭṭu. ◘

19 Iḥřa aqnaɛ n buḥbeř

ak-d inni ittwaḥṣaren,

x ubeṭṭu n tkeccaḍt ak-d ayt-nnfaxet.

20 Wenni ittxarraṣen mliḥ

di ca n tmesřact, ad yaf řxar,

sseɛd n wenni ittcařan x SIDI.◘

21 Wenni ɣar iǧa wuř d amiɣis,

ad t semman bu-weftan,

u taẓyudi n řhard n iyencicen

tarenni di řefhamet.

22 Řeɛqeř d řɛunṣar n tudart i bab nnes,

maca ttarbiyyet i ibuhařiyyen

d tubbuheřya waha.◘

23 Uř n umiɣis ittarra aqemmum nnes ifehhem,

zeg iyencicen nnes ad fehmen ktar.

24 Awařen icewwaren

ggin am tamment n teɣrast,

aqa aten d imiẓiden i řeɛmar

d ugenfu i yeɣsan.

25 Ad taɣ ittɣiř as i ca n yijjen

aqa abrid nnes nican,

maca aneggar nnes mɣir ibriden

ittawyen ɣar řmewt. ◘

26 Řaẓ n ucewwař ixeddem as i netta,

maɣar aqemmum nnes ineddeh i-t.

27 Aryaz i war isekkwin iɣezza řɣar,

x iyencicen nnes

am yict n tmessi ittceɛɛařen. ◘

28 Aryaz iccuren s řexdaɛat

issekkara amenɣi,

u axbarji ittawi-dd ɛad abeṭṭu

ak-d umeddukkeř iṣebḥen aṭṭas. ◘

29 Aryaz bu-řexcunet ittɣarra jjar nnes,

ineddeh i-t ɣar ijj n webrid

i war iǧin mliḥ.

30 Netta itteqqen tiṭṭawin nnes

maḥend ad ixarreṣ

marra ddarbat n řexdaɛet,

ittkemmec iyencicen nnes,

aqa da igga řɣar. ◘

31 Acuwwaf icaben d ijj n ttaj izewwqen,

tzemmared ad tt tafed x webrid n tsegda.

32 Iḥřa bu-ttasiɛ n řxaḍar

x ijj n weryaz ijehden

u wenni ittebbaten buḥbeř nnes iḥřa

x wenni iḥewwsen ict n tendint.

33 Taqedduḥt temmenḍar deg weḥsin,

maca mkuř array ittas-dd zi SIDI.

◘16:1 16:1 Awřn. 16:1; 19:21; 20:24; Irm. 10:23

◘16:2 16:2 Awřn. 21:2

◘16:3 16:3 Izhd. 37:5; 55:23; Mt. 6:25; Lk. 12:22; 1 Bṭ. 5:7

◘16:4 16:4 Ayub 21:30

◘16:5 16:5 Awřn. 6:17; 8:13; 11:21

◘16:8 16:8 Izhd. 37:16; Awřn. 15:16

◼16:9 16:9 iṣuraf - s Tɛibranit ‘aṣurif’.

◘16:11 16:11 Lawi 19:36; Aɛwd. 25:13-16; Awřn. 11:1; 20:10, 23

◘16:14 16:14 Awřn. 19:12; 20:2

◘16:15 16:15 Awřn. 19:12

◘16:16 16:16 Ayub 28:15; Izhd. 19:11; 119:72; Awřn. 3:14, 15; 8:11, 19

◘16:18 16:18 Awřn. 11:2; 17:19

◘16:20 16:20 Izhd. 2:12; 34:9; 125:1; Ica. 30:18; Irm. 17:7

◘16:22 16:22 Awřn. 13:14

◘16:25 16:25 Awřn. 14:12

◘16:27 16:27 Awřn. 12:18

◘16:28 16:28 Awřn. 15:18; 26:21; 29:22

◘16:30 16:30 Awřn. 6:13, 14