1 “Ammu i iqqar SIDI: ‘Uct x iḥenjiren nni iɣewwɣen maḥend ad ssuffɣen ccwar, maca war iǧi zzayi, maḥend ad ggen ijj n řɛahd, maca war iǧi zi Arruḥ inu, ḥima ad ssɛurrcen ddenb x ddenb, 2 inni igguren maḥend ad hwan ɣar Miṣra nhřa ma ad ayi sseqsan, ḥima ad afen aseřqi ɣar jjehd n firɛun u maḥend ad arewřen ɣar tiři n Miṣra. 3 Maca jjehd n firɛun ad kenniw yarr tᵉttseḍḥam uca adurri di yiři n Miṣra ad kenniw ifḍeḥ. 4 Maɣar řḥukkam nnes ǧan di Ṣuɛan uca imsekkan nnes iwḍen ɣar Ḥanis. 5 Nitni marra ad ttwassbarrqen zi řgens nni war d asen ineffɛen ca, war itticen afus uřa d walu n řefḍeř, maca ad ten yawi ɣar řefḍiḥet d řhegra.” ◘30:5 Irm. 2:36

6 Řḥukm issaggʷaden x řmař n Temmurt n Ljanub. “Deg ict n temmurt n řeḥṣaret d ddeǧ, mani zzayes dd-usin tayradt d weyrad d ufiɣar d řḥaycet icemḍen iṭṭawen, arebbun-dd nitni agřa nsen x weɛrur n isnusen d řeknuz nsen x teɛrurin n iřeɣman ɣar ijj n řgens war ten ineffeɛ di ca. ◘30:6 Ica. 14:29 7 Maɣar Miṣra ad iwc afus baṭeř u i walu. S uya řaɣiɣ Miṣra wanita: ‘Rahab, bu-teɣruḍt ameqqran, teqqim waha!’ ”

8 “Xenni řexxu, as-dd, ari t zzat i tiṭṭawin nsen x teřwiḥt, xebc i-t deg ict n tebrat ittwannḍen, maḥend ad tiři tᵉttwaḥḍa ař ass i dd ɣa yasen, i řebda n řebdat. 9 Maɣar nitni d řgens iɣewwɣen, ayt n bu-ixarriqen, iḥenjiren nni war ixsen ad sřen i Ccariɛa n SIDI, 10 inni iqqaren i imwařawen: ‘War ttwiřim walu!’, u i yinni ixezzaren iweḥḥan: ‘War ttwiřim iweḥḥan nni iǧan d tidett. Siwřem akidneɣ min dd issḥinniben, mři d aneɣ tᵉttwařam min iɣeccen! 11 Ḥeyydem zeg webrid, ffɣem zeg webrid, jjem Amqeddas n Israil ad xaneɣ yiggʷej!’ ”

12 “S uya, ammu i iqqar Umqeddas n Israil: ‘Minzi kenniw tenḍarem awař-a, tᵉttecřem x ddeǧ u x min iffɣen zeg webrid, wah, tᵉtteggem řaman nwem di man aya, 13 s uya ad tiři řmuɛṣiyyet-a i kenniw am tazzit di řḥiḍ i ɣa iwḍan, nni iḍehharen di řḥiḍ yuɛřan, aqa tareẓẓit nnes ad dd-tas deɣya, deg ict n tecti. ◘30:13 Ica. 29:5 14 Ad t yarẓ am ittwarẓ ijj n uɣarraf n bu-třaxt nhřa aḥinni. Jar marra ifetwiten nnes war ittwaf ́́́ɛad uřa d ijj n uceqquf ɛad i zi dd ɣa yawyen timessi zi řmejmar niɣ ad aymen aman zi jjub.’ ” ◘30:14 Irm. 19:11

15 “Maɣar ammu i iqqar Sidi inu, SIDI, Amqeddas n Israil: ‘S ttubet d řhudnet ad ɣarwem yiři usenjem, di trusi d řaman ad ɣarwem yiři jjehd, maca kenniw war texsem.’ 16 Kenniw teqqarem: ‘Lla, x yeysan nexs ad narweř!’ X uya s uɣiř ad tarewřem. Uca teqqarem ɛawed: ‘X iysan n ḥamat nexs ad nniy i tarewřat!’ X uya ad qeǧqen uřa d imseḍfaren nwem! 17 Ijj n řuřuf ad yarweř i uheddi n yijj n weryaz. I uheddi n xemsa ad tarewřem marra ař ɣa teqqimem am tsenyant n ucenyal x tqiccet n wedrar, am tɛeǧant x tewrirt.” ◘30:17 Ica. 17:6; 24:6, 13

18 “S uya ad raja SIDI maḥend ad awem isscen aḥinni nnes, s uyenni ad igeɛɛed sennej ařami i ɣa yarḥem kenniw awarni man aya, maɣar SIDI d AREBBI n řḥeqq. Sseɛd n marra inni t ittrajan. ◘30:18 Izhd. 2:12; 34:9; Awřn. 16:20; Irm. 17:7 19 Maɣar řgens ad izdeɣ di Ṣihyun, di Urcalim. Cek war tᵉttrud ɛemmarṣ ɛad, Netta ad xak iḥinn, mařa isřa i tmijja nnec tᵉttřaɣa, ad xak dd-yarr. 20 Sidi inu ad awem iwc aɣrum di řeḥṣaret uřa d aman di řeɣben, imesɣaren nnec war ittnuffaren ɛad, maca tiṭṭawin nnec ad ẓarent imesɣaren nnec. 21 Imezzuɣen nnec ad sřen i wawař zi ɣar ḍeffar nnec i iqqaren: ‘Aqa abrid, uyurem dayes. War tteffɣem yefus uřa d azeřmaḍ.’

22 Ad tḥesbem icellelen i ittwaggen s nnuqart nnec n řexyařat nnec ineqcen uřa d ařeḥḥef n wureɣ n řexyařat nnec ifesyen d texmuji. Ad ten tenḍared am warruḍ tessexmej i-t temɣart i x ǧan idammen, ad tinid: ‘Ɣar barra!’ ”

23 “Xenni ad iwc Netta anẓar i zzariɛet nnec i tzarɛed deg iyyar uřa d aɣrum d ṣṣabet n temmurt nnec. Deg wass nni ad tehda tḥimart nnec x ddmani isarrḥen. 24 Iyenduzen d yeɣyař imeẓyanen, inni icarrzen tammurt, ad ccen řeɛřef iredd i zuzzaren s ǧuḥ d tezzart. 25 X kuř adrar u x kuř tawrirt igeɛɛden ad iřint tiɣezratin d tmizabin ccuren s waman, deg wass n tɣarṣt tameqqrant, xmi ɣa wḍan ṣṣumɛat. 26 Tafawt n tziri ad tiři am tfawt n tfuct uca tafawt n tfuct ad tiři tejhed sebɛa n tseqqar x tfawt n sebɛa n wussan, deg wass i di i ɣa icfen SIDI tareẓẓit n řgens nnes uca ad issgenfa ayezzim n tecti i iwta Netta.”

27 “Xzar, ittas-dd Isem n SIDI zi řaggʷaj, yareqq weɣḍab nnes u asiggʷed imɣar, ccuren iyencicen nnes s wesxeḍ u iřes nnes igga am tmessi ittetten. 28 Asuḍi n nnefs nnes am yeɣzar issefyen, ittakkwaḍen ař iri, maḥend ad izzuzar řegnus s tazzart n ureddeǧ, u maḥend ad yegg i řegnus sřimet n uɣarri x iɣesmaren nsen.” ◘30:28 Ica. 8:8

29 “Ad ɣarwem yiři ijj n izři, am di ǧiřet nni di issewjed bnadem ixef nnes i řɛid, uřa d řefraḥet deg wuř am ɣar ijjen igguren umi iẓemmar di temja maḥend ad dd-yas ɣar wedrar n SIDI, ɣar Teṣḍart n Israil. 30 SIDI ad yejj ad sřen i tmijja nnes yuɛřan uca ad isscen mammec ɣa ihwa uɣiř nnes ak-d wesxeḍ n weɣḍab d tmessi itteḥduduqen ittetten, aduqqez n wenẓar d řḥař n wenẓar d ibquqen n tebruri. 31 Maɣar Accur ad yarjij s tmijja n SIDI xmi t ɣa iwwet Netta s weɛmud nnes. 32 Qaɛ twařa iɛeddu xas weɛmud n usegged, aɛmud nni xas issars SIDI, aqa d man aya ad yiři ɣar tinext n ibendiren d snitrat n řgambriyyat, maɣar Netta akidsen immneɣ s iɣaǧen ittenhezzan. 33 Maɣar zeg wecḥař uya iwjed wemcan i nnɛi nni, iwjed uřa i ujeǧid. Igga i-t yuǧeɣ d umiriw. Aqellij nnes n tmessi d ukeccuḍ d ameqqran. Twarrit n nnefs n SIDI ad t iqedd am yeɣzar n řecbariyyet.”