1 Řḥukm issaggʷaden x Dimacq.

“Aqa da, Dimacq war tᵉttiři ɛad d tandint, ad tedweř d řxarbet ittwahedmen. 2 Tineddam n Ɛaruɛir ad dewřent xřant, ad iřint i tḥimriwin. Tina ad dinni zzřent uca uřa d ijjen war tent issfeɛfiɛ. 3 Ad tᵉttwaqḍa x lqelɛa zi Ifrayim uřa x tageldit zi Dimacq u x min iqqimen n Aram. Nitni ad asen imsar am mammec imsar i uɛuǧi n ayt n Israil, ammu i iqqar SIDI n řɛeskarat.”

4 “Deg wass nni ad isřaw uɛuǧi n Yaɛqub uca ad tedweř tadunt n arrimet nnes teqqiǧet. 5 Ad yiři axmi ittqebbeḍ wenni imejjaren imendi ibedden uca imejjar uɣiř nnes tidrin, ad yiři axmi ijj iřeqqeḍ tidrin di teɣzurt n Irafawiyyen. 6 Ad iqqim mɣir ijj n uceṭṭi i weřqaḍ, am ɣar wezwaḍ n izemmuren, tnayen niɣ třata n tzitunin ɣar tqiccet n taseṭṭa sennej, uca arebɛa niɣ xemsa ɣar tiseḍwin iɣemmayen aṭṭas, ammu i iqqar SIDI, AREBBI n Israil.”

7 “Deg wass nni ad ixzar bnadem x wenni t iggin u tiṭṭawin nnes ad ẓaren Amqeddas n Israil. 8 War ittwaři iɛalṭaren, řxedmet n ifassen nnes, uřa d min iggin iḍewḍan nnes war t iẓẓar, tirebbin n cwarti lla uřa d ipilaren n arebbi n tfuct lla.”

9 “Deg wass nni ad iřint tneddam nnes ifaryen am wemcan ixřa deg wezɣar u taqiccet n wedrar nni jjin zzat i tiṭṭawin n ayt n Israil, ad yiři d amcan ittwareddǧen. 10 Maɣar cek tᵉttud AREBBI n usenjem nnec, war teɛqiřed x Teṣḍart nnec ijehden. X uya tᵉtteẓẓud aɣemmuy iḍarfen uca tzarrɛed tiɣeddutin tibarraniyyin. 11 Deg wass nni di tent teẓẓuḍ, ad tent tfaryed, u ɣar uteffu tejjid zzariɛet nnem ad tessfuffi: d man aya d tamejra iɛurrcen deg wass n řeḥřac nnec d řeḥriq war ittgenfin.”

12 “Uct x ubarru n řegnus nni izehharen am zehharen řebḥur, uřa uct x ddriz n ccuɛub nni iggin am řeḥweř n waman imeqqranen inhewřen! 13 Ad hewřen ccuɛub am řeḥweř n waman imeqqranen, maca Netta ad ten yarebba u nitni ad arewřen ɣar řaggʷaj. Ad ittwaɛarn ubarru n řegnus am uřum x idurar ittwaɛarnen zeg usemmiḍ, am useynu n tɛejjajt tenneḍ as-dd tḥaryaḍt. ◘17:13 Ayub 21:18; Izhd. 1:4; 35:5; 83:14; Ḥuc. 13:3 14 Ɣar řweqt n tmeddit, xzar, anexřiɛ! Qbeř ma ad iṣbeḥ řḥař, war iǧi netta ɛad. Ta d tasɣart n yinni d aneɣ ikeccḍen, zzhar n yinni d aneɣ yucaren.”