1 “Sřem awař i zi ɣarwem dd-issawař SIDI, a taddart n Israil! 2 Ammu i iqqar SIDI: ‘War řemmdem abrid n řegnus i yixef nnem u war ttnexřiɛem zi řeɛřamat n ujenna, waxxa řegnus ttnexřaɛen zzaysent. 3 Maɣar min ḥessben řegnus d řḥeqq aqa-t di řbaṭeř, minzi aqa aya d akeccuḍ nni dd-qessen zeg wezɣar, d řxedmet n ifassen n bu-ṣṣenɛet nni igga s imeydi n wemziř. ◼10:3 azɣar - niɣ ‘řɣabet’ niɣ ‘tazgant’.  ◘10:3 Ica. 44:14-17 4 Zewwqen tt s nnuqart d wureɣ, s imesmiren d ifḍisen ssmetnen tt ařami war teqqim tᵉttenxuxuř. ◘10:4 Ica. 41:7 5 Aqa atent am yict n tcejjart issawařen i din ibedden, maca war zemmaren ad ssiwřen, ittxeṣṣa ad tent arbun, minzi war zemmarent ad uyurent. War zzaysent teggʷedem ca, maɣar nitenti war zemmarent ad ggent min iɛeffnen, u war zemmarent ad ggent min iṣebḥen.’ ” ◘10:5 Izhd. 115:5; Ica. 41:23; 46:1, 7

6 “Uřa d ijj ma am Cek, a SIDI! Cek d ameqqran u Isem nnec d ameqqran s jjehd. ◘10:6 Izhd. 86:8, 10 7 Man wen war Cek itteggʷiden, Cek, a Ajeǧid n řegnus? Minzi aya yusa-dd xak, maɣar jar marra imiɣisen n řegnus u di marra tageldit nsen uřa d ijj am Cek.” ◘10:7 Asa. 15:4

8 “Aqa-ten jmiɛ d ifɣar d ibuhařiyyen, minzi ttarbiyyet n l’aṣnam ibeṭṭřen teffeɣ-dd zeg ukeccuḍ waha. ◘10:8 Ica. 41:29; Ḥab. 2:18; Zak. 10:2 9 Iwyen-dd nnuqart ittwabezzɛen zi Tarcic d wureɣ zi Ufaz, aqa-tt d řxedmet n uḥrayfi uřa n ifassen n wemziř n wureɣ. Arruḍ nsen n ifiřan idehmaniyyen d arjuwaniyyen, marra řexyařat ggin tent yeryazen inni ɣarsen tizemmar.”

10 “SIDI AREBBI d Tidett, Netta d AREBBI iddaren, d Ajeǧid n řebda. Tammurt tᵉttenhezza s uduqqez n weɣḍab nnes uca řegnus war zemmaren ad ksen asxeḍ nnes.”

11 “D man aya d asen i ɣa tinim: ‘Irebbiten nni war iggin ajenna uřa d tammurt, nitni ad ttwaqḍan zi temmurt d sadu ajenna.’ ”

12 “Maca Netta igga tammurt s jjhed nnes, igga ddunect zi tiɣit u s řefhamet nnes ibezzeɛ ajenna. ◘10:12 Amz. 1:1; Ayub 9:8; Izhd. 104:2; Ica. 40:22; 44:24; 51:13; Irm. 51:15 13 Řami ittejja tmijja nnes ad tt sřen, xenni tegga am ucarcur n waman deg ujenna. Iseynuten issgeɛɛad i-ten zeg ineggura n ddunect, ittegg assamen ak-d wenẓar u issekka-dd asemmiḍ zeg ixxamen nnes n txubay.” ◘10:13 Izhd. 135:7; Irm. 51:16; Asa. 14:3

14 “Kuř bnadem d agarruḍ, břa tussna, kuř amziř n wureɣ ittseḍḥa zi ssibbet n řexyař ineqcen i igga, maɣar řexyař nnes ifesyen d ixarriqen, war dayes iǧi buḥbeř. ◘10:14 Irm. 51:17, 18 15 Aqa tent d l’aṣnam ibeṭṭřen, aqa atent d timesřayin n tseḍḥact. Di řweqt mani tent i ɣa ɛaqben, ad fnant. 16 Tasɣart n Yaɛqub war teǧi am tesɣart nsent, minzi Netta d Wenni iggin marra, uca Israil d taqbič n tesɣart nnes, aqa SIDI n řɛeskarat d Isem nnes.” ◘10:16 Izhd. 74:2; Irm. 51:19

17 “Seggwej sseřɛet zi temmurt nnem, a cem tamɣart nni izeddɣen di lqelɛa! 18 Maɣar ammu i iqqar SIDI: ‘Xzar, twařa-ya ad nḍareɣ imezdaɣ n temmurt ɣar řaggʷaj uca ad asen dd-awyeɣ di řeḥṣaret, ḥima ad ttwaṭṭfen!’ ◘10:18 Irm. 6:24 19 Uct inu zi ssibbet n treẓẓit inu, ayezzim inu itteqqes ayi aṭṭas. Waxxa necc nniɣ: Aya d ijj n řehřac u necc ad t ksiɣ! 20 Ittwaxarreb Uqiḍun inu, marra imurar n uqiḍun qeṭṭsen, iḥenjiren inu uyuren xafi u war da ǧin ɛad. War din wi ɣa issbedden Aqidun inu uca ad xas yayeř tijartiřin nnes. 21 Maɣar imeksawen tuɣa qejḥen, SIDI war xas arzun. X uya war ttgeɛɛaden u marra taḥimart n ddmani nsen tᵉttwazuzzar. ◼10:21 imeksawen - niɣ ‘iničan’. 22 Řeḥweř d ameqqran, aqa da, ddriz zi temmurt di ccamal, ḥima ad areddǧen tineddam n Yahuda, maḥend ad tt arren d tammurt n tzeddiɣt i wuccanen n řexřa.” ◘10:22 Irm. 1:14; 4:6; 9:11

23 “Necc ssneɣ, a SIDI, aqa war dd-teqqim ɣar bnadem ad ixḍar abrid nnes, uřa i weryaz iggur, maḥend ad indeh iṣuraf nnes. ◘10:23 Awřn. 16:1; 20:24 24 Seggem ayi, SIDI, maca s řḥeqq, war iǧi deg weɣḍab nnec, ḥima war d ayi tarrid d walu. ◘10:24 Izhd. 6:2; 38:2; Irm. 30:11; 46:28 25 Zeǧeɛ asɛar nnec x řegnus nni war Cek issinen, u x tqebbař nni war ittřiɣin Isem nnec, minzi nitni ṣarḍen Yaɛqub, ṣarḍen t uca qḍan xas, hedmen amcan n tzeddiɣt nnes.” ◘10:25 Izhd. 79:6; Irm. 8:16; 9:16