135
1 Hallilu-Yah!
Ṣebbḥem Isem n SIDI,
ṣebbḥem xas, a imsexxaren n SIDI,
2 kenniw inni ibedden di Taddart n SIDI,
di řemraḥat n Taddart n AREBBI nneɣ.
3 Hallilu-Yah, maɣar SIDI iṣbeḥ,
zehhdem i Yisem nnes,
maɣar Netta d řeḍrafet.
4 Maɣar SIDi ifarz Yaɛqub i Yixef nnes,
Israil d agřa nnes. ◘135:4 Uf. 19:5; Aɛwd. 7:6; Tit. 2:14; 1 Bṭ. 2:9
5 Maɣar necc ssneɣ aqa SIDI d ameqqran,
Siditneɣ d ameqqran x marra irebbiten.
6 Marra min d as itteɛjiben i SIDI, igga i-t,
deg ijenwan u x temmurt,
di řebḥur u deg waman ihewřen marra.
7 Netta issgeɛɛed iseynuten
zi ṭṭrufa n temmurt,
Netta ittegg assamen ak-d wenẓar,
ittgewwad asemmiḍ
zi řehrit nnes ɣar barra. ◘135:7 Irm. 10:13; 51:16
8 Netta iwta imenza n Miṣra,
zeg iwdan ař řmar. ◘135:8 Uf. 12:12, 29; Izhd. 78:51
9 Netta issekk řeɛřamat d lmuɛjizat
di řwesṭ nnec, a Miṣra,
ɣar firɛun
u ɣar marra imsexxaren nnes. ◘135:9 Uf. 7, 8, 9, 10, 14
10 Netta iwta aṭṭas n řegnus
u inɣa ijeǧiden ijehden. ◘135:10 Yac. 12
11 Siḥun, ajeǧid n Imuriyyen,
u Ɛuj, ajeǧid n Bacan,
u marra tigeldiwin n Kenɛan.
12 Iwca asen tammurt d tasɣart,
d tasɣart i Israil, řgens nnes. ◘135:12 Izhd. 78:55
13 A SIDI, Isem nnec ittɣima i řebda,
axarreṣ dayek ad yiři zi jjiř ař jjiř. ◘135:13 Uf. 3:15, Izhd. 102:13
14 Maɣar SIDI ad yarr tasɣart
ɣar řgens nnes,
Netta ad iḥinn x imsexxaren nnes. ◘135:14 Aɛwd. 32:36, Izhd. 90:13
15 Řexyařat n l’aṣnam n řegnus
aqa atent s nnuqart d wureɣ,
ttwaggent s ifassen n iwdan.◘135:15 Izhd. 115:4
16 Nitenti ɣarsent ijj n uqemmum,
maca war ssiwiřent,
ɣarsen tiṭṭawin,
maca war ttwiřint,
17 Nitenti ɣarsen timezzuɣen,
maca war ttesřint,
walu asuḍi n nnefs
deg uqemmun nsen.
18 Ad dewřen inni tent iggin
am nitenti,
marra wi xasent ittcař.
19 A taddart n Israil, barkem SIDI,
a taddart n Harun, barkem SIDI.
20 A taddart n Lawi, barkem SIDI!
Ejj marra inni itteggʷeden SIDI,
ad barken SIDI.
21 Ad ittwabarek SIDI zi Ṣihyun,
Netta d wenni izeddɣen di Urcalim.
Hallilu-Yah!
◘135:4 135:4 Uf. 19:5; Aɛwd. 7:6; Tit. 2:14; 1 Bṭ. 2:9
◘135:7 135:7 Irm. 10:13; 51:16
◘135:8 135:8 Uf. 12:12, 29; Izhd. 78:51
◘135:9 135:9 Uf. 7, 8, 9, 10, 14
◘135:10 135:10 Yac. 12
◘135:12 135:12 Izhd. 78:55
◘135:13 135:13 Uf. 3:15, Izhd. 102:13
◘135:14 135:14 Aɛwd. 32:36, Izhd. 90:13
◘135:15 135:15 Izhd. 115:4