1 “Ṣṣanam Bil yuḍar, Nabu iqwes ɣar temmurt, aqa řexyařat n l’aṣnam nsen deqqřent i řmař u i řebhayem. Min tuɣa tarebbum kenniw, aqa řexxu d řeḥmuř, ddqeř i řmař ifnan s řweḥřan. 2 Aqa qewsen am kemmřen, uḍaren, war zemmaren ad ssnejmen ddqeř, uca uřa d nitni simant nsen uyuren di tmeḥbast.”

3 “Sřem ɣari, a taddart n Yaɛqub, d marra min iqqimen n taddart n Israil, kenniw, inni ksiɣ zeg uɛeddis n yemmatwem, inni arbureɣ zeg wami tsemḥem deg uɛeddis n yemmatwem. 4 Ař tawsart nwem Necc Necc, ař ɣa tcabem, ad kenniw arbuɣ. Necc ggiɣ t u Necc ad kenniw ksiɣ, ad kenniw arbuɣ u ad kenniw ssnejmeɣ.”

5 “Ak-d man wen texsem ad ayi tessemquddam, u man wen texsem akidi tᵉssekkwim maḥend ad nemrawas? ◘46:5 Ica. 40:18, 25 6 Ttfarraɣen nitni ureɣ zi tecyart u wezznen nnuqart x řmizan. Ttxeǧṣen ijj n wemziř n wureɣ, maḥend netta ad zzayes igg ijj n arebbi. Sejjaden, wah, bendqen as. 7 Arebbun t x teɣruḍt, kessin t da d diha, xenni ssbeddan t deg wemcan nnes. Dinni ittɣima ibedd, war ittenhizzi ssenni. Wah, mařa ḥed iřaɣa as, war dd-ittarri, war t issenjam zi řeḥṣaret nnes.” ◘46:7 Ica. 45:20

8 “Ɛeqřem x man aya, dewřem ɣar řbař nwem, ksim t ɣar wuř, a kenniw inni ittɛeddan! 9 Ɛeqřem x tmesřayin timezwura zeg wecḥař uya: aqa Necc d Arebbi: war din iǧi uřa d ijj n AREBBI nneɣni, uca uřa d ijj war iǧi am Necc, ◘46:9 Ica. 45:5, 14, 18, 21, 22; 48:12 10 wenni ibarrḥen zeg umezwar min ɣa yiři ɣar uneggar, uřa zeg wecḥař uya min war imsaren ɛad, wenni iqqaren: ‘Axarreṣ inu yarcem, ad ggeɣ marra arḍa inu!’, ◘46:10 Izhd. 33:11; Awřn. 19:21; 21:30; Ɛbr. 6:17 11 wenni iřaɣan ajḍiḍ ittkeccaḍen zi ccarq, aryaz n uxarreṣ nnes zi temmurt iggʷejen. Wah, am mammec ssiwřeɣ, ammu i tt ɣa ggeɣ ad dd-yas, Necc sswejdeɣ tt, ad tt ggeɣ.”

12 “Sřem ɣari, kenniw ayt n bu-ṣṣulṭa, inni iggʷejen x tsegda! 13 Ad dd-ssqarrbeɣ tasegda inu, aqa war tᵉtteggʷij, war ittɛeṭṭiř usenjem inu. Ad awyeɣ asenjem di Ṣihyun, ad wceɣ aɛuǧi inu i Israil.”