1 Uca ẓriɣ deg ujenna ict n řeɛřamet nneɣni, d tameqqrant d tanebhet: sebɛa n lmalakat nni dd-iwyen sebɛa n jjrayeḥ tineggura, minzi ikmeř zzaysent weɣḍab n AREBBI. ◘15:1 Izhd. 7:12; Asa. 11:14.

2 Uca ẓriɣ ca ittemcabeh di řebḥar n zzaj, wenni ixeǧḍen ak-d tmessi, uca inni iɣellben x řweḥc d řexyař nnes d nnumru n yisem nnes, bedden x řebḥar n zzaj, ɣarsen lharpat n AREBBI.◘15:2 Asa. 4:6; Mixa 7:18. 3 Nitni ɣennjen izři n uṣebbeḥ n Musa, amsexxar n AREBBI, d yezři n uṣebbeḥ n Yezmar, qqaren:

“D timeqqranin d tṣebḥanin řexdayem nnec,

a, SIDI AREBBI, Amzemmar x kuřci,

řexdayem nnec d tasegda d tidett,

a Ajeǧid n n zzmanat! ◘15:3 Uf. 15:1-21; Aɛwd. 32:1-44; Izhd. 111:2; 139:14; 145:17.

4 Man wen war Cek itteggʷeden, a SIDI,

man wen war issemɣaran Isem nnec?

Cek weḥḥdek i iǧan d amezdag qaɛ,

maɣar marra řegnus ad dd-asen,

ad sejden zzatek,

minzi Cek tbaned d amsegged

di řeḥkamat nnec.” ◘15:4 Irm. 10:6, 7; Zak. 14:16-20

5 Awarni as ẓriɣ, aqa tennurzem Zzawect Tameqqrant n Tzeddiɣt n Cchadet deg ujenna. ◘15:5 Asa. 11:19. 6 uca sebɛa n lmalakat nni ɣar ǧant sebɛa n jjrayeḥ ffɣent-i-dd zi Zzawect Tameqqrant, yarḍent řeqṭen azdad izdigen ittissiqen, uca ɣarsen x idmaren ijj n webyas n wureɣ. ◘15:6 Asa. 1:13. 7 Uca ijjen zi arebɛa n imuddaren iwca asen i sebɛa n lmalakat sebɛa n ṭṭawyat, ccurent s weɣḍab n AREBBI, wenni d Tudart i řebda qaɛ. “Amin!” 8 Uca tᵉttwaɛemmar Zzawect Tameqqrant s ddexxan i dd-itteffɣen zeg uɛuǧi n AREBBI u zi jjehd nnes. Uřa d ijjen war izemmar ad dd-yadef ɣar Zzawect Tameqqrant ař ɣa kkent qaɛ sebɛa n jjrayeḥ tinni dd-iwyen sebɛa n lmalakat. ◘15:8 Uf. 40:34; 1 Ij. 8:10; 2 Im. 5:14; Ica. 6:4.