1 Uca immewc ayi ijj n uɣanim, igga am yijj n uqeṭṭab n řeɛbar, uca ibedd din lmalak, inna: “Kkar uca ɛbar Zzawect Tameqqrant n AREBBI d uɛalṭar d yinni dayes iɛebbden, ◼11:1 dayes - ixs ad yini ‘di Zzawect Tameqqrant’.  ◘11:1 Ḥiz. 40:3-49; 41; 42; 43. 2 maca řemraḥ nni ɣar daxeř n Zzawect Tameqqrant, ejj i-t, war t ttɛebbar, minzi aqa immewc i řegnus uca nitni ad ɛefsen x tendint iqeddsen tnayen u arebɛin n iyuren. ◼11:2 ad ɛefsen - niɣ: ‘ad ɛejnen’.  ◘11:2 Asa. 13:5. 3 Necc ad wceɣ ṣṣulṭa i tnayen n řechud inu, maḥend ad nebban s wawař n Arebbi ařef u mitayen u-settin n wussan, am yarḍen txancet n wecḍan.”

4 Nitni d tnayen n tzitunin d tnayen n řeqnadeř i ibedden zzat i wudem n Sidi n marra tammurt. ◘11:4 Zak. 4:3, 14. 5 Mařa din ca n yijjen ixs ad ten ihweř, ad teffeɣ tmessi zeg uqemmum nsen uca ad tecc řɛedyan nsen. Ammu i ɣa ttwanɣen inni ixsen ad ten ḍarren. 6 Nitni ɣarsen ṣṣulṭa maḥend ad qqnen ajenna, ḥima war dd-iweṭṭi wenẓar deg wussan nni di ɣa nebban nitni, u ɣarsen ṣṣulṭa ḥima ad arren aman d idammen u ḥima ad seyyḥen tammurt s marra jjriḥect meřmi ma xsen. ◘11:6 Uf. 7; 8; 9; 10; 12; 1 Ij. 17:1.

7 Xmi ɣa kemmřen cchadat nsen, ad dd-igeɛɛed řweḥc zi řaǧaɣ, ad kisen immneɣ, ad xasen iɣelleb uca ad ten ineɣ. ◘11:7 Dan. 7:21; Asa. 13:7, 11. 8 Řxecbat nsen ad iřint deg wazzay n tendint tameqqrant umi qqaren s řmeɛna arruḥi nnes ‘Sadum’ d ‘Miṣra’, mani nɣin Siditsen x ṣṣalib. ◘11:8 Irm. 23:14; Asa. 7:2, 5; 18:10. 9 Uca zi ccuɛub d tqebbař d iřsawen d řegnus ad ẓaren iwdan řxecbat nsen, řqedd n třata n wussan d wezyen, war ttejjin řxecbat nsen ad ttwammarsent deg imeḍřan. 10 Imezdaɣ n temmurt ad zzaysen farḥen, ad ɛeyyden, ad arezfen ijjen ɣar wenneɣni, ad ssekken ikaduten i wayawya, minzi tnayen n inabiyyen-a tuɣa ɣezzan deg imezdaɣ n temmurt.

11 Maca awarni třata n wussan d wezyen yudef daysen Arruḥ Iddaren zi AREBBI uca kkaren, bedden x iḍaren nsen u tewḍa-dd xasen Arruḥ n Tudart uca tiggʷudi temɣar tewḍa-dd x marra inni ten iẓrin. ◘11:11 Ḥiz. 37:5, 10 12 Nitni sřin ict n tmijja tejhed tᵉttřaɣa zeg ujenna, teqqar asen: “Geɛɛdem-dd da!” Uca nitni geɛɛden ɣar ujenna deg useynu uca řɛedyan nsen ẓrin ten.

13 Di tsaɛɛet nni imsar ijj n wenhezzi n temmurt d ameqqran. Ict n tɛeccart n tendint tehdem uca sebɛa-ařaf n yeryazen ɣarsen isem icennɛen mmuten s wenhezzi-ya n temmurt. Wi iqqimen, dewřen ggʷeden aṭṭas uca ssuɛřan zi AREBBI n ujenna.

14 ‘Xzar, tnayen n wuctat ɛdunt, uca xzar ‘Uct!’ wiss třata ad dd-tas deɣya. ◘11:14 Asa. 8:13; 9:12; 15:1.

15 Lmalak wiss sebɛa isuḍ di řbuq nnes uca kkarent-i-dd tmijjawin timeqqranin deg ujenna, ttřaɣant:

“Tagelda n ddunect aqa-tt n AREBBI nneɣ u n Lmasiḥ nnes, uca Netta ad iḥkem am Ujeǧid i řebda qaɛ.”

16 Arebɛa u ɛicrin n imɣaren, inni iqqimen zzat i AREBBI x řekrasi nsen igellden, wḍan s uɣembub nsen ɣar temmurt uca sejden i AREBBI, 17 nnan:

“Neccin nettqada Cek, a SIDI AREBBI,

Amzemmar x kuřci,

Cek d wenni iǧan d wenni tuɣa,

aqa teksid jjehd nnec ameqqran

deg ufus nnec,

uca tebdid ad tḥekmed am Ujeǧid. ◘11:17 Asa. 1:4, 8; 4:18; 16:5.

18 Řegnus tuɣa xeyyqen xak,

maca yusa-dd weɣḍab nnec,

uca tiweḍ-dd řweqt n imettinen

ḥima ad ttwaḥasben

u ḥima ad temmewc řmunet

i imsexxaren nnec,

inabiyyen, u i imqeddasen

u i yinni itteggʷeden Isem nnec,

am imeẓyanen am yimeqqranen,

u Cek ad tareyybed

inni ittaredǧen tammurt.”

19 Tᵉnnurzem Zzawect Tameqqrant deg ujenna ařami tᵉttwaẓar Ttabut n Řɛahd nnes di Zzawect Tameqqrant, uca kkaren wassamen d wajjajen d tmijjawin uca imsar ijj n wenhezzi n temmurt u wḍan ibquqen imeqqranen n tebruri. ◼11:19 Ttabut - netta d ijj n ssenduq n ukeccuḍ n ukasiya iɣeǧfen s wureɣ. Tuɣa dayes tnayen n teřwiḥin n weẓru n Ccariɛa d taɣɣarct n Harun nni ittwannuwcen d ij n uzenbiř dayes ‘manna’. Xzar Ɛib. 9:4.  ◘11:19 Asa. 15:5.