1 Deg useggʷas wiss xemsa u-ɛicrin n lmenfa nneɣ, ɣar umezwar n useggʷas, deg wass wiss ɛecra n uyur, deg useggʷas wiss arbeɛṭac awarni ma wtin tandint, deg wass nni nnit, tuɣa afus n SIDI xafi uca indeh ayi din. ◘40:1 Ḥiz. 33:21 2 Di iweḥḥan n AREBBI indeh ayi ɣar temmurt n Israil uca issars ayi x ijj n wedrar yuɛřan mixef tuɣa ca n řebni am yict n tendint ɣar uɣezdis n ljanub nnes. ◘40:2 Ḥiz. 20:40; Ḥiz. 43:12 3 Yiwyi ayi din, u xzar, ijj n weryaz. Ṣṣifet nnes am ṣṣifet n nnḥas u deg ufus nnes ijj n ufiřu n řeqṭen d ijj n uɣanim n řeɛbar. Netta tuɣa ibedd ɣar tewwart. 4 Issiweř akidi weryaz nni: “A mmis n bnadem, xzar s tiṭṭawin nnec, seř s imezzuɣen nnec uca sars uř nnec i marra nni i d ac ɣa ssecneɣ, maɣar tᵉttwassqebded ɣar da ḥima ad ac t ssecneɣ. Marra min twařid, ini t i taddart n Israil!”

5 Xzar, ɣar barra n Taddart tuɣa din ijj n weɣbar nni tuɣa i d as dd-innḍen kuřci. Deg ufus n weryaz tuɣa d ijj n uɣanim n řeɛbar n setta n iɣaǧen, kuř ijjen zzaysen d ijj n uɣiř d ijj n cbar n ufus. Netta iɛbar tiru n řḥiḍ nni, aqa-t d ijj n uɣanim, u řuɛřa nnes uřa d ijj n uɣanim. ◼40:5 Taddart - awař-a ixs ad yini ‘Taddart n Arebbi’ niɣ ‘Zzawect Iqeddsen’. tiru n řḥiḍ - s Tɛibranit ‘tiru n řebni’.

6 Xenni yusa-dd ař řebni n tewwart nni ixezzaren ɣar ccarq uca igeɛɛed x ddruj nnes, uca iɛbar tanebdat n tewwart, tiru nnes anect n ijj n uɣanim u tiru n tnebdat nneɣni uřa d ijj n uɣamin. 7 Tuzeggart n ict n texxamt n tewwart d ijj n uɣanim u tiru nnes uřa d ijj n uɣanim. Jar texxamin n tewwart tuɣa din xemsa n iɣaǧen u tanebdat n řebni n tewwart ɣar uɣezdis n wesqif n řebni n tewwart ɣar uɣezdis n Taddart, aqa-tt d ijj n uɣanim. 8 Netta iɛbar asqif n řebni n tewwart ɣar daxeř, aqa-t d ijj n uɣanim. 9 Iɛbar asqif n řebni n tewwart, aqa-t di tmenya n iɣaǧen, uca řeḍruf n řḥiḍ nnes tuɣa aten di tnayen n iɣaǧen. Asqif n n řebni n tewwart tuɣa ɣar uɣezdis n Taddart. 10 Zi jjihet n texxamin n tewwart ɣar uɣezdis n ccarq n řebni n tewwart, aqa din třata zzaysent ɣar uɣezdis-a u třata zzaysent ɣar uɣezdis nneɣni. Aqa atent ɣarsent d ijj n řeɛbar. Řeḍruf n řḥid ɣarsen d řeɛbar d ijjen ɣar uɣezdis-a u ɣar uɣezdis nneɣni. 11 Iɛbar tiru n wadaf n řebni n tewwart, aqa-t di ɛecra n iɣaǧen, uřa d tuzzeggart n řebni n tewwart, aqa-tt di třeṭṭac n iɣaǧen. 12 Ttasiɛ zzat i texxamin n tewwart tuɣa ijj n uɣiř ɣar uɣezdis-a uca ɣar uɣezdis nneɣni tuɣa ttasiɛ uřa d ijj n uɣiř. Ict n texxamt ɣares setta n iɣaǧen ɣar ijj n uɣezdis d setta iɣaǧen ɣar ijj n uɣezdis nneɣni. 13 Iɛbar ɛawed řebni n tewwart zi tzeqqa n ict n texxamt ař tazeqqa n wenneɣni. Tiru nnes tuɣa-t di xemsa u-ɛicrin n iɣaǧen, adaf arendad n wadaf nneɣni. 14 Igga uřa d řeɛbar ɣar řeḍruf n řḥiḍ: settin n iɣaǧen, uca řemraḥ ikka x ṭṭarf n řḥiḍ, inneḍ as-dd řemraḥ i řebni n tewwart marra. 15 Zi zzat n tewwart n wadaf ař zzat n wesqif n tewwart n daxeř, aqa din xemsin n iɣaǧen. 16 Tuɣa řekwazi ḥṣaren ɣar texxamin n tewwart u ɣar řeḍruf n řḥiḍ ɣar uɣezdis n daxeř n řebni n tewwart deg wenneḍ, uřa di řeḥyuḍ n barra u tuɣa řekwazi deg wenneḍ xezzaren ɣar daxeř u x kuř ijj zi řeḍruf n řḥiḍ tᵉttafed din ticejjura n tini.

17 Indeh ayi-dd ɣar řemraḥ n barra, uca xzar, aqa din ixxamen d ict n tisi n zzellij ittwaggen deg wenneḍ n řemraḥ. Tuɣa din třatin n ixxamen ɣar tisi n zzellij nni. 18 Tisi n zzellij tuɣa-tt ɣar uɣezdis n řebniyyat n tewwart, teqqen nican i tuzzeggart n řebniyyat n tewwart. Tanita tuɣa-tt d tisi n zzellij i iǧan wadday.

19 Netta iɛbar tiru zi zzat n řebni n tewwart i iǧan ɣar wadday n řemraḥ ař řemraḥ n daxeř ɣar uɣezdis nnes n barra, mya n iɣaǧen. Ammu i iɛbar ccarq d ccamal n řemraḥ.

20 Zi řebni n tewwart nni ixezzaren ɣar ccamal, ɣar řemraḥ n barra, iɛbar tuzzeggart nnes d tiru nnes. 21 Tuɣa třata n texxamin nnes ɣar uɣezdis-a d třata ɣar uɣezdis nneɣni, d řeḍruf nnes n řḥiḍ uřa d řeḥyuḍ nnes n barra ɣarsen d řeɛbar d ijjen am řebni n tewwart tamezwarut. Tuzzuggart tuɣa-tt xemsin n iɣaǧen d tiru nnes tuɣa-tt xemsa u-ɛicrin n iɣaǧen. 22 Řekwazi nnes d řeḥyuḍ nnes n barra uřa d ticejjura nnes n tini tuɣa ɣarsen řeɛbar d ijjen am řebni n tewwart nni ixezzaren ɣar ccarq. Ttgeɛɛaden ɣares x ijj n ddruj ak-d sebɛa n treffidin uca řeḥyuḍ nnes n barra tuɣa aten ɣar uɣezdis n zzat. 23 Řebni n tewwart n řemraḥ n daxeř tuɣa-tt zzat n řebni n tewwart n ccamal d tenni n ccarq. Zeg řebni n tewwart n barra ař řebni n tewwart n daxeř iɛbar mya n iɣaǧen.

24 Xenni indeh ayi ɣar uɣezdis n ljanub, u xzar, tuɣa din ijj n řebni n tewwart nni ixezzaren ɣar ljanub. Iɛbar řeḍruf n řḥiḍ d řeḥyuḍ nnes n barra uca řeɛburat nsen tuɣa aten d ijj. 25 Řebni n tewwart ɣares řekwazi uca uřa d řeḥyuḍ n barra daysen řekwazi am wenneɣni. Tuzzuggart nnes tuɣa-tt di xemsin n iɣaǧen u tiru nnes di xemsa u-ɛicrin n iɣaǧen. 26 Drujj dayes sebɛa n treffidin u řeḥyuḍ nnes n barra tuɣa aten ɣar zzat. Tuɣa ɣares ticejjura n tinni x řeḍruf n řḥiḍ, icten ɣar ijj n uɣezdis u icten ɣar uɣezdis nneɣni. 27 Tuɣa din ɛawed ict n řebni n tewwart ɣar řemraḥ n daxeř nni ixezzaren ɣar ljanub. Iɛbar zeg ict n řebni n tewwart ař řebni n tewwart nneɣni ɣar uɣezdis n ljanub: mya n iɣaǧen. 28 Xenni yiwi ayi ɣar řebni n tewwart n ljanub ɣar řemraḥ n daxeř. Iɛbar řebni n tewwart n ljanub, tuɣa řeɛburat nnes d ijjen. 29 Ixxamen nnes d řeḍruf nnes n řḥiḍ uřa d řeḥyuḍ nnes n barra ɣarsen d řeɛburat d ijjen. Řebni n tewwart tuɣa ɣares řekwazi uca uřa d řeḥyuḍ nnes n barra ɣarsen řekwazi d ijjen am tinni. Tuzzuggart nnes tuɣa-tt di xemsin n iɣaǧen u tiru nnes di xemsa u-ɛicrin n iɣaǧen. 30 Nnḍen as-dd řeḥyuḍ n barra. Tuzzuggart nnes tuɣa-t di xemsa u-ɛicrin n iɣaǧen u tiru nnes di xemsa n iɣaǧen. 31 Tuɣa řeḥyuḍ nnes n barra ɣar řemraḥ n barra. Tuɣa din ticejjura n tini x řeḍruf n řḥiḍ u ddruj nnes dayes tmenya n treffidin.

32 Xenni yiwi ayi ɣar řemraḥ n daxeř, ɣar uɣezdis n ccarq. Iɛbar řebni n tewwart n ljanub, tuɣa řeɛburat nnes d ijjen. 33 Tixxamin nnes d řeḍruf nnes n řḥiḍ uřa d řeḥyuḍ nnes n barra ɣarsen d řeɛburat d ijjen. Řebni n tewwart tuɣa ɣares řekwazi uca uřa ɣar řeḥyuḍ nnes n barra i dd asen innḍen marra. Tuzzuggart nnes tuɣa-tt di xemsin n iɣaǧen u tiru nnes di xemsa u-ɛicrin n iɣaǧen. 34 Řeḥyuḍ nnes n barra tuɣa aten ɣar řemraḥ n barra. Tuɣa din ticejjura n tini x řeḍruf n řḥiḍ nnes, am ɣar uɣezdis-a uřa ɣar uɣezdis nneɣni, u ddruj nnes dayes tmenya n treffidin.

35 Xenni yiwi ayi ɣar řebni n tewwart n ccamal uca iɛbar xenni řeɛburat d ijjen. 36 Tixxamin nnes n tewwart d řeḍruf nnes n řḥid d řeḥyuḍ nnes n barra ɣarsen řekwazi deg wenneḍ nsen. Tuzzuggart nnes tuɣa di xemsin n iɣaǧen uca tiru nnes di xemsa u-ɛicrin n iɣaǧen. 37 Řeḍruf nnes n řḥiḍ tuɣa aten ɣar řemraḥ n barra. Tuɣa din ticejjura n tini ɣar uɣezdis-a u ɣar uɣezdis nneɣni x řeḍruf nnes. Ddruj nnes dayes tmenya n treffidin.

38 Tuɣa din ijj n wexxam s ict n tewwart ɣar řeḍruf n řeḥyuḍ n řebniyyat n tewwart, ad din ssirden taɣarṣt n wecmaḍ. 39 Di daxeř n wesqif n řebni n tewwart tuɣa din tnayen n ṭṭabřat ɣar uɣezdis-a u tnayen n ṭṭabřat ɣar uɣezdis nneɣni ḥima ad xasent ɣarṣen taɣarṣt n wecmaḍ d tɣarṣt n ddenb d tɣarṣt n umarwas. 40 Barra ɣar ijj n uɣezdis n zzat ɣar mani geɛɛden ɣar wadaf n řebni n tewwart n ccamal tuɣa din tnayen n ṭṭabřat, u ɣar uɣezdis n zzat nneɣni ɣar wesqif n řebni n tewwart tuɣa din ɛawed tnayen n ṭṭabřat. 41 Ammu tuɣa din arebɛa n ṭṭabřat ɣar ijj n uɣezdis u arebɛa n ṭṭabřat ɣar uɣezdis nneɣni ɣar iɣezdisen n řebni n tewwart, aqa din tmenya n ṭṭabřat i min xef zemmaren ad ɣarṣen. 42 Tuɣa din arebɛa n ṭṭabřat zi tṣuḍar ittwaneqcen ɣar ddruj n řebni n tewwart. Tuzzuggart n ṭṭabřa tuɣa-tt d ijj n uɣiř d wezyen u tiru nnes d ijj n uɣiř d wezyen u řuɛřa nnes d ijj n uɣiř. Mmarsen xas řeqcuɛ i zi ɣarrṣen taɣarṣt n wecmaḍ d tewhibt n tɣarṣt. 43 Taryiwin n ijj n cbar n ufus ttwaggent deg wenneḍ ɣar daxeř n wesqif n řebni n tewwart, u tuɣa ittxeṣṣa ad mmarsen aysum i tewhibt n tɣarṣt x ṭṭabřat i din iǧan.

44 Ɣar barra n řebni n tewwart n daxeř tuɣa din tixxamin n imeɣnajen di řemraḥ n daxeř nni iǧan ɣar uɣezdis n zzat n řebni n tewwart n ccamal. Udem nnes ɣar zzat tuɣa ixezzar ɣar ljanub. Tawwart nni ɣar uɣezdis n řebni n tewwart n ccarq tuɣa txezzar ɣar ccamal. 45 Netta issiweř akidi: “Taxxamt-a nni zi ixezzar wudem nnes ɣar ljanub, aqa-tt i ikehhanen nni iḥeṭṭan x tsexxart n Taddart. 46 Taxxamt nni txezzar wudem nnes ɣar ccamal, aqa-tt i ikehhanen nni iḥeṭṭan x tsexxart n uɛalṭar. Nitni d ayt n Ṣaduq nni ɣa dd-iqarrben ɣar SIDI zeg ayt n Lawi, maḥend ad as sexxaren.” 47 Iɛbar řemraḥ: tuzzeggart nnes mya n iɣaǧen u tiru nnes mya n iɣaǧen, ijj n ukwadrun. Aɛaltar tuɣa-t zzat n Taddart.

48 Xenni yiwi ayi ɣar wesqif n Taddart uca iɛbar řeḍruf n řḥiḍ n wesqif, xemsa n iɣaǧen ɣar ijj n uɣezdis u xemsa n iɣaǧen ɣar uɣezdis nneɣni, uřa d tiru n tewwart, třata n iɣaǧen ɣar ijj n uɣezdis u třata n iɣaǧen ɣar uɣezdis nneɣni. 49 Tuzzuggart n wesqif tuɣa-tt ɛicrin n iɣaǧen u tiru nnes ḥiṭac n iɣaǧen, d man aya ɣar uɣezdis n treffidin n ddruj i zi zemmaren ad geɛɛden. Tuɣa din ɛawed ipilaren ɣar řeḍruf n řḥiḍ, ijj ɣar uɣezdis-a u ijj ɣar uɣezdis nneɣni. *