1 Xenni tᵉttwaẓar ict n řeɛřamet tameqqrant deg ujenna: ict n tmeṭṭut tyarḍ tafuct, u taziri sadu iḍaren nnes uca ɣares x uzeǧif nnes ijj n ttaj s tenɛac n itran. 2 Tuɣa teksi ddeyset, tesɣuyyu s řewjeɛ, tᵉttwaḥṣar s unezbar n tarut.

3 Xenni tᵉttwaẓar ict n řeɛřamet nneɣni deg ujenna, aqa din ict n řhaycet tameqqrant tazeggwaɣt am tmessi, ɣares sebɛa n izeǧifen d ɛecra n waccawen, uca x izeǧifen nnes sebɛa n ttijan. ◼12:3 accawen - nitni d iqaccawen n lḥayawan. 4 uca akennas nnes ifarḍ ict n ttuřut n itran zeg ujenna, tessẓareyyeḍ i-ten ɣar temmurt. Uca řhaycet tuɣa tbedd zzat i tmeṭṭut i ɣa yarwen, ḥima ad tṣarḍ Mmis xmi t-i-dd i ɣa taruw. 5 Uca turuw-dd Mmis, Aryaz nni i ɣa iḥekmen x marra řegnus s uzeǧaḍ n wuzzař, uca Mmis immeksi deɣya ɣar AREBBI u ɣar řɛarc nnes. ◘12:5 Izhd. 2:9; Asa. 2:27. 6 Maca tameṭṭut tarweř ɣar řexřa, ɣar mani tuɣa d as igga AREBBI amcan ḥima ad as sseccen, řqedd n wařef u-mitayn u-settin n wussan. ◘12:6 Izhd. 55:7-19; Asa. 11:3.

7 Uca ikkar umenɣi deg ujenna. Mixayil d lmalakat nnes mmenɣent ak-d řhaycet, uca uřa d řhaycet d lmalakat nnes mmenɣent, 8 maca nitni war jhiden ca uca war ittwif ɛad wemcan deg ujenna i nitni. ◘12:8 Dan. 2:35. 9 Temmenḍar-dd řhaycet tameqqrant, nettat d ufiɣar nni tuɣa zic, qqaren as ‘ibřis’ niɣ ‘cciṭan’, wenni iɣekkwan marra tammurt, wah, aqa immenḍar-dd x temmurt uca lmalakat nnes mmenḍarent-i-dd ɛawed akides. ◘12:9 Lk. 10:18; Asa. 20:2. 10 Uca sřiɣ ict n tmijja tameqqrant zeg ujenna teqqar s jjehd:

“Aqa yusa-dd ufekki d ṣṣulṭa

d Tgeldit n AREBBI nneɣ,

minzi wenni iḍeřmen aytmatneɣ,

aqa immenḍar,

wenni i ten iḍeřmen ass d ǧiřet.

11 Ɣellben xas s Idammen n Izmar,

d wawař n cchadet nnes,

uca nitni war ssɛizzen ca tudart nsen

ař řmewt.

12 X uyenni, farḥem, a ijenwan

d yinni daysen izeddɣen!

Uct x temmurt d řebḥar,

ibřis aqa ihwa-dd ɣarwem

s tefqeḥt nnes imɣaren aṭṭas,

issen ad ɣares iqqim

drust n řweqt waha.” ◘12:12 Izhd. 96:11; Ica. 49:13; Asa. 8:13.

13 Ařami řhaycet tufa ixef nnes temmenḍar ɣar temmurt, teḍfar tameṭṭut i dd-yurwen Mmis d Awtem. 14 Mmewcen as i tmeṭṭut tnayen n wefriwen n ugider ameqqran, ḥima ad teḍwu ɣar wemcan nnes di řexřa, maḥend ad tᵉttwassecc dinni, ijj n řmijař n řweqt d řewqat d ijj n wezyen n yijj n řmijař n řweqt, mani war tt iẓarr ufiɣar. ◼12:14 ijj n řmijař n řweqt d řewqat d ijj n wezyen n yijj n řmijař n řweqt - man aya ixs ad yini ‘ijj n useggʷas d tnayen n iseggʷusa d wezyen n useggʷas’. Xzar Asa. 12:6.  ◘12:14 Asa. 2:6. 15 Afiɣar issusef zeg uqemmum nnes awarni i tmeṭṭut, igga ict n řḥemřet n waman am yeɣzar, ḥima ad tt awyen waman. 16 Tammurt tɛawen tameṭṭut uca tarzem temmurt aqemmum nnes, teḥruw iɣzar wenni dd-issusfen řhaycet zeg uqemmum nnes. 17 Uca řhaycet txeyyeq aṭṭas x tmeṭṭut uca tuyur ḥima ad temmneɣ ak-d yinni iqqimen zi zzariɛet nnes uca ak-d inni itteṭṭfen di tweṣṣa n AREBBI u di cchadet n Yasuɛ. ◼12:17 zzariɛet nnes - ixs ad yini Lmasiḥ (xzar Amz. 3:15) u yenni iqqimen aqa-ten d řmuminin inni yumnen di Lmasiḥ.