1 Awarni man aya iřeqqem Yasuɛ ɛawed sebɛin nneɣni zeg imeḥḍaren nnes uca issekk i-ten tyuya tyuya qibač i uɣembub nnes ɣar marra tineddam d jjwayeh mani tuɣa Netta igga ad iraḥ. ◘10:1 [Mt. 11:20-27; 13:16-17] 2 Inna asen: “Tameyra aṭṭas, maca ixeddamen drus, s uyenni ttarem i Bab n tmeyra, ḥima ad issekk ixeddamen ɣar tmeyra nnes. ◘10:2 Mt. 9:37; Yḥ. 4:35; 2 Ts. 3:1. 3 Ruḥem! Aqa ad kenniw ssekkeɣ am wuǧi jar wuccanen. ◘10:3 Mt. 10:16. 4 War kiwem kessim ticyarin řa d ttesṭayem uřa d sandaliyat, war ttseǧamem x ḥed deg webrid. ◘10:4 2 Ij. 4:29; Mt. 10:9; Mk. 6:8; Lk. 9:3; 22:35. 5 Man ma taddart i ɣa tadfem, inim d amezwaru: ‘Řehna x taddart-a.’ ◘10:5 Mt. 10:12; Mk. 6:10. 6 Mařa din mmis n řehna, řehna nwem ad xas yarsa, mařa war iǧi amenni, řehna nwem ad ɣarwem dd-iɛqeb. 7 Qqimem di taddart nni, ccem, swem zi min ɣarsen, minzi axeddam isdaheǧ řmunet nnes. S uya war ggurem ca zi taddart ɣar taddart nneɣni. ◘10:7 Lawi 19:13; Aɛwd. 24:14; 25:4; Mt. 10:10; 1 Kur. 9:4, 14; 10:27; 1 Tim. 5:18. 8 Man tandint i ɣa tadfem uca ad kenniw qebřen, ccem din min d awem ɣa wcen. 9 Sgenfam imehřac i din iǧan, inim asen: “Aqa tqarreb-dd ɣarwem Tgeldit n AREBBI.” 10 Man ma tandint i ɣa tadfem, war kenniw qbiřen, ffɣem ɣar zznaqi nnes, inim: ◘10:10 Mt. 10:14; Mk. 6:11; Lk. 9:5. 11 “Ɛad uřa d taɛejjajt i dayneɣ iřeṣqen x iḍaren nneɣ n tendint nwem, ad tt nezzerz xawem. Maca snem aya, aqa tqarreb-dd ɣarwem Tgeldit n AREBBI! ◘10:11 Řex. 13:51; 18:6. 12 Ad awem iniɣ belli deg wass nni ad yiři řḥař n Sadum ihwen zi tendint nni.”

13 Uct xam, a Xurazin, uct xam, a Bayt-Ṣayda! Mři msarent di Ṣur d Ṣaydun řeɛjayeb i ittwaggen daykent, ad tiři tubent zi zzman am qqiment di txancet n wecḍan d yiɣɣeḍ x izeǧifen nsent. ◘10:13 Mt. 11:20-24 14 Maca ad yiři řḥař n Ṣur d Ṣaydun ihwen zi řḥař nkent di lḥisab. 15 U cem, a Kafarnaḥum, tenni tuɣa ittwassgeɛɛden ɣar ujenna, aqa ad tᵉttwassehwid ɣar řaxart!

16 Wi zzaywem i ɣa isřen, ad zzayi iseř, wi kenniw ɣa yagin, ad ayi yagi, u wi d ayi ɣa yagin, ad yagi wenni d ayi dd-issekken.” ◘10:16 Mt. 10:40; Mk. 9:37; Yḥ. 13:20.

17 Xenni ɛeqben sebɛin nni s řefraḥet aṭṭas, nnan as: “A Siditneɣ, uřa d ccwaṭen ṭṭaɛen aneɣ s Yisem nnec.” 18 Xas uca inna asen: “Ẓriɣ cciṭan iwḍa-dd amecnaw assam zeg ujenna. ◘10:18 Asa. 12:8, 9. 19 Xzar, Necc ad awem wceɣ ṣṣulṭa ḥima ad tɛefsem x ifiɣran d iɣarḍmiwen uřa d ṣṣulṭa x marra jjehd n řeɛdu. Uřa d ict n řḥajjet war kenniw tḍarri. ◘10:19 Mk. 16:18; Řex. 28:5. 20 Maca war farrḥem ca s uya, belli aqa ccwaṭen ad awem ṭṭaɛen, maca farḥem belli aqa ismawen nwem ttwazemmemen deg ijenwan.” ◘10:20 Uf. 32:32; Ica. 4:3; Dan. 12:1; Fil. 4:3.

21 Di tsaɛɛet nni ifarḥ Yasuɛ di Arruḥ Iqeddsen, inna: “Necc ttqadiɣ Cek, a Baba, Bab n ujenna d temmurt, minzi tessnuffared timesřayin-a x imiɣisen u x aytbab n řeɛqeř uca tessaregbed tent i iḥenjiren. Wah, a Baba, ammu i tuɣa ixs řxaḍar nnec!” ◘10:21 [Mt. 11:25-27; 13:16-17] — Ayub 5:12; Ica. 29:14; Mt. 11:25; 1 Kur. 1:19; 2:7, 8; 2 Kur. 3:14. 22 Xas uca inneqřeb ɣar imeḥḍaren nnes, inna: “Kuřci immewc ayi zi Baba uca uřa d ijj war issin man wen d Mmis mɣir Babas uca uřa d ijj war issin man wen d Babas mɣir Mmis, d wenni umi ixs Mmis ad t issargeb.” ◘10:22 Izhd. 8:7; Yḥ. 1:18; 3:35; 6:44, 45; 17:2; 1 Kur. 15:27; Fil. 2:10; Ɛbr. 2:8.

23 Xenni inneqřeb-dd ɣar imeḥḍaren weḥḥedsen, inna: “Sseɛd n tiṭṭawin i ittwařan min tᵉttwařam kenniw. ◘10:23 Mt. 13:16. 24 Minzi Necc ad awem iniɣ, aqa aṭṭas n inabiyyen d ijeǧiden tuɣa xsen ad ẓaren min tᵉttwařam kenniw, maca war tt ttwiřin, uřa ad sřen min tᵉttesřam, maca war tt sřin.” ◘10:24 1 Bṭ. 1:10.

25 Xzar, ijj n umseřmad n idlisen ikkar ḥima ad t ijarreb, inna: “A Amseɣɣar, min ɣa ggeɣ ḥima ad warteɣ Tudart ittduman?” 26 Yasuɛ inna as: “Mammec t yurin di Ccariɛa? Mammec teqqared?” 27 Yarra-dd, inna as: “Ad texsed SIDI, AREBBI nnec s marra wuř nnec, s marra řeɛmar nnec, s marra jjehd nnec, s marra řeɛqeř nnec, uca ad texsed jjar nnec amecnaw ixef nnec.” ◘10:27 Lawi 19:18; Aɛwd. 6:5; 10:12; 30:6; Mt. 22:37; Mk. 12:30; Rum. 13:9; Gal. 5:14; Yaɛ. 2:8. 28 Inna as Yasuɛ: “Aqa tarrid nican. Egg man aya uca ad teddared.” 29 Maca netta ixs ad issegged ixef nnes, inna as: “Man wen iǧan d jjar inu?”

30 Yarra-dd xas Yasuɛ, inna as: “Ijj n weryaz ihwa-dd zi Urcalim ɣar Ariḥa uca iwḍa deg ifassen n iceffaren, kksen as arruḍ, wtin t s weɛmud, xenni ruḥen, jjin t jar řmewt d tudart. 31 Xenni ihwa-dd ijj n ukehhan ɣar webrid nni. Netta iẓra i-t, maca ikka xas. 32 Ammu ɛawed uřa d ijj n Ulawi iɛdu-dd x wemcan nni, iẓra i-t, maca ikka xas. 33 Maca ijj n weryaz Asamiri, tuɣa-t deg usafar, yiweḍ-dd ɣares, iẓra i-t uca iḥinn xas. 34 Iqarreb-dd ɣares, icedd as iyezzimen nnes, iseyyeḥ xasen binu d zzect. Xenni issenya i-t x zzayřet nnes, yiwyi i-t ɣar wenwař, ithella dayes. 35 Tiwecca nnes řami iruḥ, iwca tnayen dinar i bab n wenwař, inna as: ‘Thilla dayes u mařa txeǧṣed ktar zi man aya, ad cek xeǧṣeɣ xmi dd ɣa ɛeqbeɣ.’ 36 Man wen zi třata nni tᵉttwařid d jjar n wenni iwḍan deg ifassen n iceffaren?” 37 Inna as: “Wenni xas iḥinnen!” Inna as Yasuɛ: “Iwa uyur, uřa d cek tegged amenni!”

38 Am tuɣa gguren nitni, yudef ɣar ijj n dcar, uca ict n temɣart, qqaren as Marta, tareḥḥeb zzayes di taddart nnes. 39 Tuɣa ɣar ta ict n učmas, qqaren as Maryam, tenni tuɣa teqqim ɣar iḍaren n Siditneɣ uca tuɣa tessḥessa i wawař nnes. 40 Maca Marta tuɣa tecɣeř aṭṭas s tsexxart. Nettat tusa-dd ɣares, tenna as: “A Sidi, ma war d ac icqi belli učma tejja ayi ttsexxareɣ weḥḥdi? Ini as ḥima ad ayi tɛawen.” 41 Maca Yasuɛ yarra-dd, inna as: “Marta, Marta, cem tceɣřed u tqeǧiqed x waṭṭas n tmesřayin, 42 maca ittxeṣṣa ict n řḥajjet waha! Aqa Maryam tixḍar tasɣart taṣebḥant tenni war zzayes ittwattekksen.”