1 Am tuɣa ittẓaǧa deg ijj n wemcan, imsar, umi ikemmeř Netta taẓaǧit nnes, aqa ijjen zeg imeḥḍaren nnes inna as: “A Siditneɣ, seřmed aneɣ ad neẓẓaǧ am mammec tuɣa Yuḥanna isseřmad ɛawed imeḥḍaren nnes.” ◘11:1 [Mt. 6:9-15; 7:7-11] 2 Yasuɛ inna asen: “Meřmi ma teẓẓuǧem, inim:

‘Babatneɣ i iǧan deg ijenwan,

ad ittwaqeddes Isem nnec,

ad dd-tas Tgeldit nnec,

ad tᵉttwagg am mammec texsed Cek,

am deg ujenna, ammu ɛawed di temmurt.

3 Ewc aneɣ kuř ass aɣrum nneɣ i kuř ass,

4 uca ɣfar aneɣ ddnub nneɣ,

minzi uřa d neccin nsameḥ i marra

inni dayneɣ ittursen.

War d aneɣ ssidif ca deg ujarreb,

maca senjem aneɣ zeg umɛeffan.’ ”

5 Xenni inna asen: “Man wen zzaywem i ɣar iǧa ijj n umeddukkeř, ad ɣares iraḥ deg wezyen n ǧiřet uca ad as ini: ‘A ameddukkeř, arḍeř ayi třata n tecnifin, ◘11:5 [Mt. 7:7-11] 6 minzi ijj n umeddukkeř inu, ixecc-dd ɣari zeg usafar, war ɣari min d as ɣa qeddmeɣ!’, 7 uca xenni ad xas dd-yarr umeddukkeř nnes zi daxeř, ad as yini: ‘War dd ayi ttṣeddaɛ, tawwart tbelleɛ u tarwa aqa-tt akidi di tassut, war zemmareɣ ad dd-kkareɣ maḥend ad ac wceɣ aɣrum.’ 8 Ad awem iniɣ, mařa war dd-ikkar ḥima ad as iwc umi netta d ameddukkeř nnes, iwa ad dd-ikkar ad as iwc mecḥař ma iḥdaj x ssibbet n řewɛaret n umeddukkeř nnes.

9 Ad awem iniɣ: Ttarem, xenni ad awem immewc, arzum, xenni ad tafem, ssqarqbem, xenni ad awem arezmen. ◘11:9 Mt. 7:7; 21:22; Mk. 11:24; Yḥ. 14:13; 15:7; 16:24; Yaɛ. 1:5, 6; 1 Yḥ. 3:22; 5:14. 10 Minzi marra wi ɣa ittaren ad iksi, u wi ɣa yarzun ad yaf, u wi ɣa issqarqben ad as ittwarzem. 11 Niɣ din jar awem babas, wenni umi d as i ɣa ittar mmis aɣrum, ad as iwc aẓru? Niɣ umi ɣa ittar asřem, ad as iwc afiɣar deg wemcan n wesřem? ◘11:11 Mt. 7:9. 12 Niɣ mařa ittar zzayes tameǧač, ad as iwc taɣarḍent? 13 Mařa kenniw, inni iǧan d iɛeffanen, tessnem ad tewcem timewca tiṣebḥanin i tarwa nwem, mecḥař s waṭṭas ad iwc Babatwem i iǧan deg ijenwan Arruḥ Iqeddsen i yinni d as t ittaren!”

14 Umi issuffeɣ Netta ijj n cciṭan agnaw, imsar, awarni řami issuffeɣ cciṭan nni, aqa agnaw ibda issawař. Uca xenni itebhet řɣaci marra. ◘11:14 [Mt. 12:22-30; Mk. 3:20-27] — Mt. 9:32; 12:22. 15 Maca ca zzaysen nnan: “Issuffuɣ ccwaṭen s Bᵉɛalzabub, ameqqran n ccwaṭen.” ◘11:15 Mt. 9:34; 12:24; Mk. 3:22. 16 Inneɣni jarrben t, ttaren zzayes ict n řeɛřamet zeg ujenna.

17 Maca Netta yargeb x ixarriṣen nsen, inna asen: “Kuř tageldit i ibḍan x yixef nnes ad tᵉttwareddeǧ u taddart i ibḍan x yixef nnes, ad tewḍa. ◘11:17 Mt. 12:25; Mk. 3:24. 18 Mařa ibḍa cciṭan x yixef nnes, mammec ɣa teqqim tgeldit nnes? Minzi kenniw teqqarem belli Necc ssuffuɣeɣ ccwaṭen s Bᵉɛalzabub. 19 Mařa Necc ssuffuɣeɣ ccwaṭen s Bᵉɛalzabub, s minzi i ten ssuffuɣen tarwa nwem? S uyenni ad iřin nitni d lquḍat xawem. 20 Maca mařa tuɣa s uḍaḍ n AREBBI i zi ssuffuɣeɣ ccwaṭen, xenni aqa tqarreb-dd ɣarwem Tgeldit n AREBBI. 21 Min ɣa yekk weryaz ijehden iḥezzmen s řesnaḥ ittɛessa x řemraḥ nnes, ad yiři wagřa nnes di řaman. 22 Maca meřmi i dd ɣa yas wenni iǧan d jjiheř xas, uca ad t iɣřeb, aqa netta ad as ikkes řesnaḥ min xef tuɣa ittcař, uca ad ibḍa min tuɣa zzayes iksi.

23 Wenni war iǧin akidi, aqa-t ḍidd inu u wenni war kidi issmunin, aqa netta ittzeǧaɛ.” ◘11:23 Mt. 12:30; Mk. 9:39; Lk. 9:50; 11:23.

24 “Xmi ɣa iffeɣ řaryaḥ amengus zi bnadem, ad icuq deg imucan war daysen bu waman, ad yarzu arraḥet uca xmi war tt ittif, ad yini: ‘Ad ɛeqbeɣ ɣar taddart inu tenni zi dd-ffɣeɣ.’ ◘11:24 [Mt. 12:43-45] — Mt. 12:43. 25 Xmi dd ɣa yas, ad tt yaf, tfarḍ, teɛdeř. 26 Xenni ad iraḥ, ad iksi sebɛa n řaryaḥ nneɣni iɛeffanen xas, ad dd-adfen uca ad zedɣen dinni. Xenni ad idweř uneggar n bnadem nni d aɛeffan mahu x mammec t tuɣa ɣar umezwar.” ◘11:26 Yḥ. 5:14; Ɛbr. 6:4, 5; 10:26; 2 Bṭ. 2:20.

27 Am issawař s uya, tessgeɛɛed ict n temɣart zi řɣaci tmijja nnes, tenna as: “Sseɛd n uɛeddis i Cek iksin u tabbuct i zi tᵉṭṭḍed!” 28 Netta inna: “Sseɛd n yinni ittesřan awař n AREBBI uca ḥeffḍen t.” ◘11:28 Mt. 7:21; Yḥ. 6:29; Rum. 2:13.

29 Am tuɣa imun řɣaci, ibda iqqar: “Ttaṣiřet-a d taɛeffant tᵉttᵉttar řeɛřamet, war d as tᵉttmewci řeɛřamet mɣir řeɛřamet n Yunus anabi. ◘11:29 [Mt. 12:38-42; Mk. 8:12] — Yun. 2:1, 11. 30 Minzi am mammec tuɣa Yunus d řeɛřamet i aytbab n Ninwa, ammu i ɣa yiři Mmis n bnadem ɛawed d řeɛřamet i jjiř-a. 31 Tajeǧidt n ljanub ad tekkar deg wass n lḥisab ak-d yeryazen n jjiř-a, ad ten tḥaseb. Minzi tusa-dd zi tneggarut n temmurt, ḥima ad tseř i tiɣit n Suliman. Xzar, aqa da wenni imɣaren x Suliman. ◘11:31 1 Ij. 10:1; 2 Im. 9:1; Mt. 12:42. 32 Iryazen n Ninwa ad dd-kkaren deg wass n lḥisab ak-d jjiř-a uca ad t ḥasben, minzi nitni tuben awarni i ubarreḥ n Yunus. Xzar, aqa da wenni imɣaren x Yunus!” ◘11:32 Yun. 3:5.

33 Uřa d ijj war issreqqi řqendiř uca issrusa t deg wemcan inuffaren niɣ sadu řmud n imendi, maca issrusa i-t x řmerfeɛ, ḥima inni dd ɣa yadfen ad ẓaren tfawt. ◘11:33 [Mt. 5:15; 6:22-23] — Mt. 5:15; Mk. 4:24; Lk. 8:16. 34 Řqendiř n arrimet nnec d tiṭṭ nnec. Mařa tiṭṭ nnec teṣfa, ad tiři tfawt uřa di marra arrimet nnec. Mařa tiṭṭ nnec d taɛeffant, uřa d arrimet nnec ad tiři d taǧest. ◘11:34 Mt. 6:22. 35 Ḥḍa xenni, ḥima tafawt i dayek iǧan, war tᵉttiři d taǧest. 36 Mařa marra arrimet nnec teccur s tfawt, war dayes uřa d ijj n uɣezdis ibarrcen, xenni ad dayes tiři tfawt kuřci am mammec xmi yareqq řqendiř s uceɛɛař nnes.”

37 Am tuɣa issawař s man aya, iɛarḍ i-t ijj n Ufarisi ɣar umecři akides. Xenni yudef, iqqim ɣar ṭṭabřa. ◘11:37 [Mt. 23:1-36; Mk. 12:38-40; Lk. 20:45-47] 38 Umi t iẓra Ufarisi, itebhet minzi Netta war issird ca d amezwar qbeř i umecři. ◘11:38 Mk. 7:3, 4

39 Maca Yasuɛ inna as: “Kenniw, a Ifarisiyyen, tessizdagem barra n řkas d ṭṭebṣi, maca di daxeř nwem tcurrem s ṭṭmeɛ n tkeccaḍt d řɣar. ◘11:39 Mt. 23:25; Tit. 1:15. 40 Kenniw, a ifɣař, ma war iǧi Wenni iggin min iǧan ɣar barra, igga uřa d min iǧan daxeř? 41 Maca mařa ad tewcem marra min iǧan daxeř d ṣṣedqet, xzar, marra min daywem ad yiři d amezdag.” ◘11:41 Ica. 58:7; Dan. 4:24; Lk. 12:33.

42 Maca uct xawem, a Ifarisiyyen minzi tᵉttɛeccaram nneɛnaɛ d wazar d marra tibbi, maca tejjim řḥukm d tayri n AREBBI ɣar uɣezdis. Iwa ittxeṣṣa awem ad teggem timesřayin-a, nhřa ma ad tᵉttum inneɣni. ◘11:42 1 Ṣm. 15:22; Ḥuc. 6:6; Mixa 6:8; Mt. 9:13; 12:7; 23:23.

43 Uct xawem, a Ifarisiyyen, minzi iɛjeb awem ad teqqimem x řekrasi n zzat di temzidawin u iɛjeb awem ad xawem seǧmen iwdan di řeswaq. ◘11:43 Mt. 23:6; Mk. 12:38; Lk. 20:46.

44 Uct xawem, a imseřmaden n idlisen d Ifarisiyyen, kenniw, a imnafqen, minzi kenniw tᵉtteggem am yimeḍřan idduryen min xef gguren iwdan am war ssinen.” ◘11:44 Mt. 23:27.

45 Ijjen zeg imseřmaden n idlisen iṭṭef deg wawař, inna as: “A Amseɣɣar, aqa xmi teqqared aya, tessfeṭṭaḥed aneɣ uřa d neccin.”

46 Maca Netta inna: “Uct xawem, a imseřmaden n idlisen, minzi tessarebbum řeḥmuř iḍeqřen i tkessit x iwdan, maca kenniw s yixef nwem war tᵉttḥidim řeḥmuř nni uřa s ijjen zeg iḍewḍan nwem! ◘11:46 Ica. 10:1; Mt. 23:4; Řex. 15:10.

47 Uct xawem, minzi tbennam imeḍřan n inabiyyen, am řejdud nwem nɣin ten. ◘11:47 Mt. 23:29. 48 S man aya tneɛɛmem, aqa kenniw tareṭṭam s min ggin řejdud nwem, minzi nitni nɣin ten uca kenniw tbennam imeḍřan nsen. 49 S uyenni tiɣit n AREBBI tenna: “Aqa ad asen dd-ssekkeɣ inabiyyen d rrusul. Ad aẓẓřen nitni x ca zzaysen uca ad ten nɣen, ◘11:49 Mt. 10:16; Lk. 10:3; Yḥ. 16:2; Řex. 7:51; Ɛbr. 11:35. 50 ḥima ad ttwattaren zi jjiř-a idammen n marra inabiyyen i ittwassizzřen zeg wami tᵉttwagg ddunect: 51 zeg idammen n Habil ař idammen n Zakariyya, wenni nɣin jar Zzawect Tameqqrant d uɛalṭar! Wah, ad awem iniɣ belli ggur ad ttwattaren idammen nsen zi jjiř-a. ◘11:51 Amz. 4:8; 2 Im. 24:21; Ɛbr. 11:4.

52 Uct xawem, a imseřmaden n idlisen, minzi tkessim tisarutin n tussna. Kenniw s yixef nwem war tᵉttidfem u inni ittadfen, tᵉṭṭfem ten.” ◘11:52 Mt. 23:13.

53 Am tuɣa akidsen issawař s uya, bdan imseřmaden n idlisen d Ifarisiyyen ttḍaddan t aṭṭas. Ffugmen, ḥeccen x wawařen nnes, 54 uca ggin zzayes s tḥraymect aṭṭas, arezzun ad t ṭṭfen s ca zeg uqemmum nnes, ḥima ad t ḍeřmen.