1 Ibda isseřmad ɛawed ɣar řebḥar u imun-dd xas řɣaci aṭṭas ařami yenya di tɣarrabut uca iqqim dayes x řebḥar, am řɣaci marra tuɣa-t x tma n řebḥar x řbarr. ◘4:1 [Mt. 13:1-23; Lk. 8:4-15] — Mt. 13:1; Lk. 8:4 2 Tuɣa isseřmad i-ten s imedya aṭṭas. Inna di tɣuri nnes: 3 “Sřem! Xzar, ijj n ufeǧaḥ iffeɣ ḥima ad izarɛ. 4 Am tuɣa izarreɛ, tewḍa ca n zzariɛet x tma n webrid, ixecc-dd ijj n ujḍiḍ, ineqb i-tt. 5 Tewḍa ca n zzariɛet nneɣni x weẓru mani war dayes tuɣi bu ucař aṭṭas. Deɣya teɣmi s minzi tammurt war tuǧiɣ. 6 Maca umi dd-tenqar tfuct, tecmeḍ, minzi war ɣares tuɣi bu weẓwar, xenni tisřaw. 7 Tewḍa ca n zzariɛet nneɣni jar isennanen uca mɣaren xas isennanen uca jeyyḥen tt, war tewci ca řɣiǧet. 8 Tewḍa ca n zzariɛet nneɣni x temmurt teṣbeḥ uca teɣmi, tegma, tewca řɣiǧet. Ca n zzariɛet tusa-dd s třatin, ca s settin u ca s mya n tseqqar.” 9 Xenni inna: “Wenni ɣar iǧa imezzuɣen i useǧi, ejj i-t ad iseř.”

10 Umi tuɣa aten weḥḥedsen, sseqsan t inni d as dd-innḍen jmiɛ ak-d tenɛac x umedya nni. ◘4:10 [Mt. 13:10-17; Lk. 8:9-10] 11 Inna asen: “Aqa immewc awem maḥend ad tessnem ssirr n Tgeldit n AREBBI, maca inni di barra ad asen yiři kuřci s imedya, ◘4:11 Mt. 11:25; 2 Kur. 2:14; 3:14. 12 ḥima am ttwařan, ttwařan, maca war ttwiřin, am ttesřan, ttesřan, maca war fehhmen, ḥima war ttᵉtuben uca ad asen ittwaɣfar ddnub nsen.’ ” ◘4:12 Ica. 6:9-10; Mt. 13:14; Lk. 8:10; Yḥ. 12:40; Řex. 28:26; Rum. 11:8.

13 Inna asen: “Ma war tefhimem ca i umedya-ya? Mammec i ɣa tessnem marra imettiřen-a? ◘4:13 [Mt. 13:18-23; Lk. 8:11-15] 14 Afeǧaḥ nni izarɛen, izarreɛ Awař. ◘4:14 Mt. 13:19; Lk. 8:11. 15 Ina aqa d inni x webrid, aqa yina d yinni daysen ittwazarɛ Wawař, maca awarni řami d as sřin, řexdenni yusa-dd cciṭan uca ikkes Awař i ittwazarɛen deg wuřawen nsen. 16 Uca yina d inni ittwazarɛen x temmurt uḥejri, aqa yina d inni xmi ɣa sřen Awař, ad t qebřen deɣya s řefraḥet, 17 maca war ɣarsen bu jjadira deg ixef nsen, ad qqimen ɣar ijj n řmijař waha. Mařa temsar řmeḥnet niɣ umarret di ssibbet n Wawař, ad nqarḍen deɣya. 18 Uca yina d inni ittwazarɛen jar isennanen, aqa yina d inni xmi ɣa sřen Awař, 19 ad ɣarsen dd-adfent tḥissaf n ddunect-a d uɣekkʷi n wagřa d marra nnecwat inneɣni, ad jeyyfent Awař, xenni idakkʷař Wawař břa řɣiǧet. ◘4:19 Mt. 19:23; Mk. 10:23; Lk. 18:24; 1 Tim. 6:9. 20 Uca yina d inni ittwazarɛen x temmurt iṣebḥen, aqa yina d inni, xmi ɣa sřen Awař, ad t qebřen, ad wcen řɣiǧet, ca zzaysen třatin, inneɣni settin u inneɣni mya n tseqqar.”

21 Inna asen: “Ma ad dd-asen s řqendiř, ḥima ad immars sadu řmud n imendi niɣ sadu qama? Ma war ittmarsi ca x řmerfeɛ? ◘4:21 [Lk. 8:16-18] — Mt. 5:15; Lk. 8:16; 11:33. 22 Minzi war din min inuffaren war dd-ittwassargeb, uca war din uřa d ict n řḥajjet di tnuffra war tᵉtwasseḍhari. ◘4:22 Ayub 12:22; Mt. 10:26; Lk. 8:17; 12:2. 23 Mařa din ḥed i ɣar iǧa imezzuɣen i useǧi, ejj i-t ad iseř.”

24 Inna asen: “Ḥḍam min ɣa tesřem. S řeqyas nni zzayes i ɣa teɛbarem, zzayes i d awem ɣa ɛbaren ɛawed, uca i kenniw inni ittesřan ad asen immarni ɛad. ◘4:24 Mt. 7:2; Lk. 6:38. 25 Minzi wenni ɣar iǧa ad as immarni, u wenni war ɣar iǧi, uřa d min ɣares ad as ittwakkes.” ◘4:25 Mt. 13:12; 25:29; Lk. 8:18; 19:26.

26 Inna: “S uyenni ad tiři Tageldit n AREBBI am yijj n weryaz ineṭṭar zzariɛet di temmurt, 27 xenni ad iṭṭeṣ, ad dd-ikkar, ǧiřet d wass. Uca zzariɛet ad tgeɛɛed, ad tegma, maca netta war issin mammec. 28 Minzi tammurt tᵉttawi-dd řɣiǧet s yixef nnes: amezwar aɣemmuy, xenni tidart, awarni as irden ikemmřen di tidart. 29 Řami dd-tiweḍ řɣiǧet, řexdenni issekk amjar, minzi tameyra tiweḍ-dd.” ◘4:29 Yuw. 3:13

30 Inna: “Min di i ɣa narwes Tageldit n AREBBI niɣ s man amedya i zi tt i ɣa narcem? ◘4:30 [Mt. 13:31-32; 34-35; Lk. 13:18-19] — Mt. 13:31; Lk. 13:18. 31 Aqa-tt am tḥebbuct n zzariɛet n uxerdel, tenni, řami tᵉttwazarɛ di temmurt, aqa nettat d tameẓyant x marra tiḥebba n zzariɛet i iǧan di temmurt. 32 Awarni řami tᵉttwazarɛ, teɣmi-dd, temɣar x marra tibbi, ad tegg řefruɛ imɣaren ařami ijḍaḍ n ujenna zemmaren ad ggen řeɛwacc di tiři nnes.”

33 Tuɣa Yasuɛ issawař awař akidsen s imedya aṭṭas am yina, s imedya ittřiqen maḥend ad ten sřen iwdan.◘4:33 Mt. 13:34. 34 Břa imedya war kisen issiweř ca, maca tuɣa issefham kuřci i imeḥḍaren nnes weḥḥedsen.

35 Deg wass nni, řami d tewḍa tmeddit, inna asen: “Ejj aneɣ ad neẓwa ɣar ujemmaḍin.” ◘4:35 [Mt. 8:23-27; Lk. 8:22-25] — Mt. 8:23; Lk. 8:22. 36 Semḥen di řɣaci, iwyen t umi t tuɣa ɛad di tɣarrabut, uca tuɣa din akidsen ɛawed tiɣarruba nneɣni. 37 Uca tekkar-dd ict n tḥaryaḍt temɣar, řemwaj ccaten di tɣarrabut ařami tebda tᵉttcura. 38 Maca Yasuɛ tuɣa iṭṭeṣ x ict n tsunta ɣar ḍeffar n tɣarrabut. Nitni ssfaqen t, nnan as: “A Amseřmad nneɣ, ma war d ac necqi ca neccin mařa nettwahellek?” 39 Xenni ikkar, iwebbex asemmiḍ, inna i řebḥar: “Ars! Sqar!” Yarsa usemmiḍ uca idweř kuřci yarsa. ◘4:39 Ayub 26:12; Izhd. 107:29; Ica. 51:10. 40 Xenni inna asen: “Mayemmi teggʷedem ammu? Min kenniw yuɣin war daywem bu l’iman?” 41 Tudef i-ten tiggʷudi temɣar, nnan i wayawya: “Min iɛna Wa, aqa uřa d asemmiḍ d řebḥar ttᵉṭṭaɛen as?”