1 “Sřem ɣari, a kenniw inni iḍaffaren tasegda, kenniw inni yarezzun SIDI! Xzarem ɣar teṣḍart manis tᵉttwaneqcem u ɣar wexbuc n wanu manis dd-tᵉttwaɣzem. 2 Xzarem ɣar Ibrahim, jedditwem, u ɣar Sara, tenni kenniw i dd-yurwen. Maɣar tuɣa-t ɛad ḥafi umi t řaɣiɣ, maca Necc barkeɣ t u arzfeɣ as aṭṭas n wara. 3 Maɣar SIDI ad issfewwej Ṣihyun, ad issfewwej marra řxirbat nnes uca ad tt yarr am jjennet n Ɛadn u řexřa nnes am weḥwic di jjennet n SIDI. Arcaq d řefraḥet ad dayes ten afen, aqadi d řḥess n izehhiden.”

4 “Sřem-dd ɣari, a cceɛb inu, u wcem ayi amezzuɣ, a řgens inu, maɣar ad zzayi teffeɣ Ccariɛa u Necc ad ḍemneɣ řḥeqq inu ař ɣa yiři řḥeqq inu d tafawt i řegnus. 5 Tasegda inu tudes-dd, asenjem inu itteffeɣ-dd u iɣaǧen inu ad carrɛen řegnus, ad ayi rajant tegzirin uca ad ssitment x uɣiř inu.”

6 “Sgeɛɛdem tiṭṭawin nwem ɣar ujenna, xzarem tammurt da swadday, maɣar ajenna ad iffarfar am ddexxan, tammurt ad tedduysar am warruḍ, uca ammu i ɣa mmten uřa d imezdaɣ nnes, maca asenjem inu ad iqqim i řebda, tasegda inu ɛemmarṣ war tt qeṭṭin.”

7 “Sřem-dd ɣari, a kenniw inni issnen tasegda, a cek řgens nni yarebbun Ccariɛa inu deg wuř. War tteggʷdem zi řḥegra n yewdan u war ten ttejjim ad cem arẓen s uɛeyyeb nsen! ◘51:7 Izhd. 37:31; 118:6; Ica. 51:12 8 Maɣar tacinda ad ten tecc am tᵉttett arruḍ, uca akiccu ad ten yecc am taḍuft, maca tasegda inu ad teqqim i řebda u asenjem inu zi jjiř ař jjiř.” ◘51:8 Ica. 50:9

9 “Faq, faq, arḍ s jjhed, a aɣiř n SIDI! Faq am deg wussan n zic, am di jjiřat n zzmanat n wecḥar uya. Ma war iǧi d Cek, wenni iqessen Rahab, d wenni issnuqqben řhaycet? 10 Ma war iǧi d Cek wenni issiẓɣen řebḥar, aman n řḥemřet n waman imeqqranen innhewřen Ma war iǧi d Cek wenni yarrin abrid deg waman yuǧɣen n řebḥar, ařami zemmaren ad ẓwan inni ittwafekken? ◘51:10 Ica. 43:16 11 Inni ifda i-ten SIDI ad dd-dewřen, ad dd-asen ɣar Ṣihyun s usřiwřew. Řefraḥet n řebda ad tiři x izeǧifen nsen, nitni ad sswiẓẓḍen ifassen nsen ɣar warcaq d řefraḥet, am i ɣa yarweř zzaysen wecḍan d wesḥissef.”

12 “D Necc, wah, d Necc wenni kenniw issfewwjen. Min teɛnid cek, aqa cek tᵉtteggʷeded zeg weryaz ifennan, zi mmis n bnadem nni iǧan am arbiɛ, ◘51:12 Izhd. 118:6; Ica. 51:7 13 tᵉttettud SIDI wenni cek iggin, wenni ibezzɛen ajenna d wenni issarsen dsusa n temmurt, aqa cek tᵉtteggʷeded řebda, ass ikmeř, zi ssibbet n wesɛar n wenni iḥeṣṣaren umi issewjad ixef nnes maḥend ad yareddeǧ? Mani iǧa xenni wesɛar n wenni iḥeṣṣaren? ◘51:13 Ayub 9:8; Izhd. 104:2; Ica. 40:22; 42:5; 44:24 14 Wenni icarrfen s ssnaseř am ittefriɣ ad ittwafekk daweḥda. War ittmetti deg weḥfur n imeḥbas, war zzayes ineqqeṣ weɣrum. 15 Maɣar Necc d SIDI, AREBBI nnec, wenni issehwařen řebḥar ař ɣa hajan řemwaj nnes, SIDI n řɛeskarat d Isem nnes. 16 Tteggeɣ ac awařen inu deg uqemmum nnec u ssdurruyeɣ cek di tiři n ufus inu, maḥend ad ẓẓuɣ ajenna, ad ssarseɣ dsusa n temmurt u ad iniɣ i Ṣihyun: ‘Cek d řgens inu!’ ”

17 “Faq, faq, kkar-dd a Urcalim! Zeg ufus n SIDI teswid zi řkas n wesɛar nnes ameqqran. Teccid řexmira zi řkas nni issdewwaxen, wah, tẓemmed tt. ◘51:17 Izhd. 60:5; Ica. 52:1 18 War tt ittgewwid uřa d ijjen zi marra iḥenjiren nni dd-turuw, u zi marra iḥenjiren nni tessyem, war tt yeṭṭif uřa d ijj zeg ufus. 19 Tnayen n tmesřayin-a řeqfent cem, maca wi xam i ɣa iḥinnen? Xzar, axarreb d weřbez d řaẓ d ssif! Mammec cem i ɣa ssfewwjeɣ? ◘51:19 Ica. 47:9 20 Wḍan iḥenjiren nnem, ɣacan, zzřen ɣar marra tiɣemmar n ibriden am tɣayḍin n wezɣar di tracca. Nitni jjiwnen s wesɛar n SIDI, s usiggʷed n AREBBI nnem.” ◘51:20 Igjd. 2:11, 12

21 “S uya seř aya, a cem řmiskina, d tamescart, maca war iǧi s binu! 22 Ammu i iqqar Sidi nnem, SIDI, AREBBI nnem, wenni iccaten ddeɛwet x řgens nnes: ‘Xzar, Necc ad kkseɣ řkas issdewwaxen zeg ufus nnem, war tsessed ɛad ktar zi řexmira n řkas n wesɛar inu. 23 Necc ad t ggeɣ deg ufus n yinni dayem iɣezzan, inni innan i řeɛmar nnem: Saḍar ixef nnem ɣar temmurt, neccin ad xam neẓwa! Ammu i teggid aɛrur nnem am mammec teǧid d tammurt, uca tuɣa cek d abrid di ṭṭweɛ n yinni xam iẓwan.’ ”