1 Iřaɣa Yasuɛ x tenɛac n imeḥḍaren nnes, iwca asen ṣṣulṭa ḥima ad ssuffɣen řaryaḥ imengas u ḥima ad ssgenfan marra řeɛyubat d řehřacat. ◘10:1 [Mk. 3:13-19; 6:7-13; Lk. 6:12; 9:1-6] 2 Ismawen n tenɛac n rrusul d yina: amezwaru nsen Cimɛun umi qqaren Buṭrus, isem wanita ixs ad yini ‘Aẓru’, d umas Andrawus, d Yaɛqub, mmis n Zabdi, d umas Yuḥanna, ◼10:2 rrusul' - niɣ ‘imazanen’. 3 d Filippus d Bar-Tulumawus, Tuma d Matta, wenni d bu-ḍḍariba, d Yaɛqub, mmis n Ḥalfa, d Labbawus, umi qqaren Tadday, 4 d Cimɛun, wenni d Amɛessab, d Yahuda Isxariyuṭi wenni t isellmen. 5 Yasuɛ issekk tenɛac-a, yumur i-ten, inna: “War ttruḥem ca x webrid n lkuffar, war ttadfem ca ɣar tendint n Isamariyyen, 6 maca ḥsen ad traḥem ɣar wuǧi iweddaren n taddart n Israil. ◘10:6 Řex. 3:26; 13:26,46. 7 Xmi ɣa traḥem, barrḥem am teqqarem: ‘Tageldit n ijenwan aqa tiweḍ-dd!’ ◘10:7 Lk. 9:2. 8 Sgenfam imehřac, sizdgem inni di iǧa řbarṣ, suffɣem ccwaṭen. Kenniw teksim břa ca, xenni wcem tt břa ca. ◘10:8 Lk. 10:9; Řex. 8:18, 20. 9 War kessim ca wureɣ uřa d nnuqart uřa d nnḥas deg ibuyas nwem, ◘10:9 Mk. 6:8; Lk. 9:3; 22:35. 10 war kessim ca ttesṭim i webrid řa d tnayen n tcamirat řa d sandaliyat uřa d taɣɣarct nneɣni, minzi axeddam isdaheǧ macca nnes. ◘10:10 Lawi 19:13; Aɛwd. 24:14; 25:4; Lk. 10:7; 1 Kur. 9:4, 14; 1 Tim. 5:18. 11 Man tandint niɣ dcar i ɣa tadfem, arzum wi dayes isdaheǧ, uca qqimem din ař d traḥem. ◘10:11 Mk. 6:10; Lk. 9:4; 10:8. 12 Mařa tudfem ɣar taddart, seǧmem x aytbab n taddart s řehna. 13 Mařa taddart tesdaheǧ, jjem xas řehna nwem, mařa war t tesdiheǧ, xenni řehna nwem ad ɣarwem dd-iɛqeb. 14 Mařa tufim ca n yijjen war kenniw iqebbeř u war ittesři i wawařen nwem, ffɣem zi taddart nni niɣ zi dcar nni, zzerzem taɛejjajt zeg iḍaren nwem. ◘10:14 Mk. 6:11; Lk. 9:5; Řex. 13:51; 18:6. 15 S tidett, Necc ad awem iniɣ: Ad yiři řḥař i temmurt n Sadum d Ɛamurra ihwen zi tendint nni deg wass n lḥisab.” ◘10:15 Mk. 6:11; Lk. 10:12.

16 “Xzarem, řexxu ad kenniw ssekkeɣ am uǧi di řwesṭ n wuccanen. Iřim tfettnem amecnaw ifiɣran u ɣeffřem amecnaw idbiren. ◘10:16 [Mk. 9:41, 13:9–13; Lk. 12:2-9; 12:51-53; 14:26, 27; 21:12–17] — Lk. 10:3 17 Maca ḥḍam ixef nwem zeg iwdan, minzi nitni ad kenniw sellmen i taddart n ccreɛ, ad kenniw hettken s urekkuḍ di temzidawin nsen. ◘10:17 Mt. 24:9; Lk. 21:12; Yḥ. 15:20; 16:2; Asa. 2:1. 18 Ad kenniw nedhen zzat i řḥukkam d zzat i ijeǧiden di ssibbet inu, ḥima ad tiřim d cchadet i nitni uřa i řegnus. ◘10:18 Řex. 24:1; 25:4. 19 Mařa sellmen kenniw, war kessim ca s wemnus mammec d min ɣa tessiwřem, minzi ad awem immewc di tsaɛɛet nni min ittxeṣṣa ad tinim. ◘10:19 Mk. 13:11; Lk. 12:11; 21:14. 20 Maɣar war iǧi d kenniw inni issawařen, maca d Arruḥ n Babatwem d Netta i daywem issawařen.

21 Umas ad isellem umas ḥima ad itwaneɣ u babas mmis, uca ad kkaren tarwa d aɣezdis i lwalidin nsen, ad ten nɣen. ◘10:21 Mixa 7:2, 5; Lk. 21:16. 22 Ad kenniw carhen marra idsen x ssibbet n Yisem inu, maca wenni i ɣa iṣbaren ař aneggaru ad ittwassenjem. ◘10:22 Mt. 24:13; Mk. 13:13; Lk. 21:19; Asa. 2:10; 3:10. 23 Mařa darrcen xawem di tendint-a, arewřem ɣar tenneɣnit. S tidett, Necc ad awem iniɣ: kenniw war tᵉttekkem ca x marra tineddam n Israil ař dd ɣa yas Mmis n bnadem.” ◘10:23 Mt. 2:13; 4:12; 12:15; Řex. 8:1; 9:25; 14:6.

24 “War iǧi umeḥḍar yuɛřa x umseřmad nnes, uřa d amsexxar x bab nnes. ◘10:24 Lk. 6:40; Yḥ. 13:16; 15:20. 25 Ikfa i umeḥḍar ad yiři am umseřmad nnes u amsexxar am bab nnes. Mařa řaɣan as i Bab n taddart ‘Bᵉɛalzabul’, ixs ad yini ‘ibřis’, mecḥař ɛad i aytbab n taddart nnes! ◘10:25 Mt. 9:34; 12:24; Mk. 3:22; Lk. 11:15; Yḥ. 8:48. 26 War tteggʷedem ca zzaysen. Minzi war din min idřin ad iqqim war ittwaɛarri, uřa war din min inuffaren ad iqqim war ittwissen.” ◘10:26 Ayub 12:22; Ica. 8:12; Irm. 1:8; Mk. 4:22; Lk. 8:17; 12:2.

27 “Min d awem qqareɣ di taǧest, inim t di tfawt, min tesřim, qqaren t deg imezzuɣen nwem, barrḥem zzayes x tzeɣwin. 28 War tteggʷedem ca zeg inni ineqqen arrimet, maca war zemmaren ad nɣen řeɛmar. Ggʷedem d amezwaru zeg Wenni izemmaren ad isshellek řeɛmar d arrimet di jᵉhennama. ◘10:28 Irm. 1:8; Lk. 12:4. 29 Ma war ttmenzin tnayen n ẓẓawec s yijj n uṣuldi n nnḥas? Uřa d ijj zzaysen war dd-iweṭṭi ca x temmurt břa Babatwem, 30 maca uřa d iẓuṭṭan n ucuwwaf n uzeǧif nwem ttwaḥessben marra. ◘10:30 1 Ṣm. 14:45. 31 S uyenni war tteggʷedem ca, aqa kenniw teɛdum ẓẓawec aṭṭas. 32 S uya kuř ijjen wenni zzayi i ɣa icehden zzat i iwdan, uřa d Necc ad zzayes cehdeɣ zzat i Baba i iǧan deg ijenwan. ◘10:32 Mk. 8:38; Lk. 9:26; 12:8; 2 Tim. 2:12. 33 Maca wenni d ayi ɣa inkaren zzat i iwdan, uřa d Necc ad t nkareɣ zzat i Baba i iǧan deg ijenwan.”

34 “War ttɣiřem ca belli usiɣ-dd ḥima ad awyeɣ řehna i ddunect. Necc war dd-usiɣ ca ḥima ad awyeɣ řehna, maca ssif. ◘10:34 Lk. 12:51. 35 Usiɣ-dd ḥima ad bḍiɣ aryaz x babas, d yeǧis x yemmas, d tesřit x řallas. ◘10:35 Mixa 7:6. 36 Aytbab n taddart n bnadem ad iřin d řɛedyan nnes. ◘10:36 Izhd. 41:10; 55:13; Yḥ. 13:18. 37 Wenni ittexsen babas niɣ d yemmas xafi, war d ayi isdiheǧ ca, uca wenni ittexsen mmis niɣ d yeǧis xafi, war d ayi isdiheǧ ca. ◘10:37 Lk. 14:26. 38 Wenni war ikessin ṣṣalib nnes uca ad ayi dd-iḍfar, aqa netta war d ayi isdiheǧ ca. ◼10:38 ṣṣalib - di řweqt n řḥukm arumani, tuɣa Irumaniyyen neqqen iwdan inni war ǧin d Irumaniyyen di ṣṣalib. D man aya tuɣa d ijj n řɛiqab iqseḥ aṭṭas.  ◘10:38 Mt. 16:24; Mk. 8:34; Lk. 9:23; 14:27. 39 Wenni i ɣa yafen tudart nnes ad tt ixsar, d wenni i ɣa ixsaren tudart nnes di ṭṭweɛ inu ad tt yaf. ◘10:39 Mt. 16:25; Mk. 8:35; Lk. 9:24; 17:33; Yḥ. 12:25.

40 Wenni kenniw i ɣa iqebřen, iqebbeř ayi, u wenni d ayi ɣa iqebřen, iqebbeř wenni d ayi dd-issekken. ◘10:40 Lk. 10:16; Yḥ. 13:20.

41 Wenni i ɣa iqebřen anabi minzi netta d anabi, ad iṭṭef řmunet n unabi, d wenni i ɣa iqebřen amseggad s minzi netta d amseggad, ad iṭṭef řmunet n umseggad. ◘10:41 1 Ij. 17:10; 18:4; 2 Ij. 4:8. 42 Wenni i ɣa iwcen i yijjen zeg ina imeẓyanen ijj n řkas n waman d asemmaḍ, mɣir minzi netta d ameḥḍar inu, s tidett, Necc ad awem iniɣ, war d as tᵉttriḥ řmunet nnes ɛemmarṣ.” ◘10:42 Mt. 25:40; Mk. 9:41; Ɛbr. 6:10.