1 I umeqqran n imeɣnajen. Azehhed n Dawud.

2 Sseɛd n wenni ifehhmen i umarxu.

SIDI ad t ifekk deg wass n řɣar.

3 SIDI ggur ad t iḥḍa,

ad t yejj ad iddar,

netta ad yarr meẓri di temmurt.

War t ttsellam ca

ɣar min din iǧan

di řeɛmar n řɛedyan nnes.

4 SIDI ad kides ibedd

di tassut n řehřac.

Cek tᵉttbeddřed marra řectu nnes

umi iheǧec.

5 Necc nniɣ: “A SIDI, ḥinn xafi,

sgenfa řeɛmar inu,

maɣar xḍiɣ akidek.”

6 Řɛedyan inu ssawařen xafi s řɣar:

“Meřmi i ɣa immet

u ad ittwakkes isem nnes?”

7 Mařa yusa-dd ḥed

maḥend ad ayi iẓar,

issawař di řbaṭeř.

Uř nnes issmun ɣares řɣecc,

xenni itteffeɣ ɣar barra, issawař.

8 Marra inni d ayi icarrhen

ttemtamen xafi jmiɛ,

aqa aten ttxarriṣen dayi,

maḥend ad ayi ggen řɣar.

9 Iřqef i-t actab abarcan

u wenni dd-iwḍan ammu,

war dd-ittekkar ɛad.

10 Uřa d aryaz wi ak-d ddareɣ di řehna,

wenni di ttiqqeɣ,

wenni iccen aɣrum inu,

aqa issemɣar xafi anirz nnes. ◘41:10 Ɛub. 1:7, Yḥ. 13:18

11 Maca Cek, a SIDI, ḥinn xafi,

snekkar ayi-dd,

xenni necc ad ten xeǧṣeɣ.

12 S man aya ad ssneɣ

aqa usiɣ ac-dd x řxaḍar,

maḥend řeɛdu inu

war xafi ittduqqez s usřiwřew.

13 U xafi, aqa Cek tticed ayi afus

s wawař nnek x řekmaret inu,

tessbedded ayi

zzat i wudem nnec i řebda. ◘41:13 2 Ṣm. 7:16

14 Ad ittwabarek SIDI, AREBBI n Israil,

zi řebda ař i řebda! Amin, wah, amin!